Maciu 8 - Vakavakadewa Makawa

Sa vakabula na vukavuka ko Jisu, kei na nona tamata na turaga ni valu, kei na tina ni wati i Pita, 117. Sa qai tukuna vei ira na nona tisaipeli nai valavala ni tamata sa muri koya, 1822. Sa qai vunauca na wai, 2327; a sa vakasevi ira na tevoro mai na tamata e le rua, 2834.

¹ Ia ni sa lako sobu mai na ulu-ni-vanua ko koya, era sa lewe vuqa sara sa muri koya.

² Ka raica, sa dua na tamata vukavuka sa lako mai ka cuva vua, ka kaya, Na Turaga, kevaka ko ni sa vinakata, ko ni sa vakasavasavataki au rawa.

³ A sa dodoka na ligana ko Jisu, ka tarai koya, ka kaya, Au sa vinakata; mo savasava mai. A sa savasava vakasauri na nona vukavuka.

⁴ A sa kaya vua ko Jisu, Raica, mo kakua mada ni tukuna vua e dua; ia mo laki vakaraitaki iko ga vua na bete, ka vakacabora nai madrali sa vakarota ko Mosese, me kenai vakadinadina vei ira.

⁵ Ia ni sa curu ko koya ki Kapenaumi, sa lako mai vua e dua na turaga ni valu, ka masuta,

⁶ ka kaya, Noqu Turaga, sa davo koto mai neitou na noqu tamata sa tauvi-paralasi, a sa yaluma vakalevu sara.

⁷ A sa kaya vua ko Jisu, Au na laki vakabulai koya.

⁸ Sa qai vosa na turaga ni valu, ka kaya, Na Turaga, au sa sega ni yaga mo ni curu ki na noqu vale: mo ni cavuta walega na vosa, ena bula kina na noqu tamata:

⁹ niu sa turaga lailai ga koi au, kau sa lewa na sotia eso: ia kau sa kaya vua e dua, Mo lakani, a sa lakani; ka vei koya e dua tani, Mo lako mai, a sa lako mai; ka vei koya na noqu tamata, Mo kitaka oqo, a sa kitaka.

¹⁰ Ia ni sa rogoca ko Jisu, sa kurabui, a sa kaya vei ira era sa muri tiko, Au sa kaya vakaidina vei kemudou, Au sa sega ni kunea vei ira na Isireli e dua na vakabauta levu vakaoqo:

¹¹ au sa kaya talega vei kemudou ni ra na lewe vuqa ena lako mai na tu i cake, mai ra talega; ka tiko sobu kei Eparaama, kei Aisake, kei Jekope, e na matanitu vakalomalagi:

¹² ia ko ira na gone ni matanitu era na biu ki na butobuto e tautuba; era na dautagi kina, ka vakasequruquru bati.

¹³ Sa qai kaya vua na turaga ni valu ko Jisu, Mo lako ga; ia me vaka ko sa vakabauta, me yaco vei iko. A sa bula na nona tamata e na tiki-ni-siga ko ya.

¹⁴ A sa lako ki na vale i Pita ko Jisu, a sa raica na tina ni watina, sa davo koto, ka tauvi-katakata.

¹⁵ A sa tara na ligana ko koya, a sa takali vua na katakata: a sa tu cake ko koya, ka qaravi iratou.

¹⁶ Ia ni sa qai yakavi, sa kau mai vei koya e lewe vuqa sa curumi ira na tevoro eso: a sa vakasevi ira na tevoro ko koya e na vosa, a sa vakabulai ira kecega sa tauvi-mate:

¹⁷ o koya sa vakayacori kina na vosa sa tukuna ko Aisea na parofita, ka kaya, O koya ga sa kauta vua na noda malumalumu, ka colata na noda mate.

¹⁸ Ia ni sa raica ko Jisu era sa lewe vuqa sara sa vakavolivoliti koya, sa kaya me ia na lako ki tai kadua.

¹⁹ A sa lako mai e dua na vunivola, ka kaya vua, Vakavuvuli, au na muri iko ki na veiyasana ko na lako kina.

²⁰ Sa qai kaya vua ko Jisu, Sa vaqara na fokise, a sa vakairoro na manumanu vuka; ia na Luve ni tamata, sa sega vua na tikina me kotora kina na uluna.

²¹ A sa dua tale na nona tisaipeli sa kaya vua, Kemuni na Turaga, laivi au meu lako mada meu buluti tamaqu.

²² A sa kaya vua ko Jisu, Mo muri au; ka biuta na mate me ra buluta na nodra mate.

²³ Ia ni sa laki vodoka na waqa ko koya, era sa muri koya na nona tisaipeli.

²⁴ Ka raica, sa tubu na cava levu e na wasawasa, a sa luvu na waqa e na biau: a sa moce ko koya.

²⁵ Sa qai lako mai ko ira na nona tisaipeli, ka vakayadrati koya, ka kaya, Kemuni na Turaga, vakabulai keda: eda sa mate.

²⁶ A sa kaya vei ira ko koya, Dou sa rere e na vuku ni cava, koi kemudou sa lailai na nomudou vakabauta? Sa qai tu cake ko koya, ka vunauca na cagi kei na wasawasa; a sa maravu sara mai.

²⁷ A sa kidacala ko ira na tamata, ka kaya, E vakabeka evei nai tovo ni tamata oqo, ni sa talairawarawa vua na cagi kei na wasawasa!

²⁸ Ia ni sa udu ko koya ki tai kadua, ki na nodra vanua na kai Kerikesa, sa sota kaya e lewe rua sa curumi rau eso na tevoro, erau sa lako mai nai bulubulu, a rau sa yalocudrucudru sara, a sa sega kina na tamata sa lako rawa e na sala ko ya.

²⁹ Ka raica, era sa qoqolou, ka kaya, E vakaevei koi kedatou, kemuni Jisu na luve ni Kalou? ko ni sa lako beka mai ki ke me vakararawataki keimami ni sa sega ni yaco na kena gauna?

³⁰ A sa dua na qele ni vuaka levu sa vakani, sa vakayawa vei ira.

³¹ A ra sa masuti koya ko ira na tevoro, ka kaya, Kevaka ko sa vakasevi keimami, laiva me keimami curuma na qele ni vuaka.

³² A sa kaya vei ira ko koya, Dou lako ga. A ra sa lako tani, ka ra sa curuma na qele ni vuaka; ka raica, sa cici sara na qele ni vuaka taucoko e na baba ki na wai, ka ra sa mate e wai.

³³ Ia ko ira sa vakania, era sa dro, ka lako ki na koro, ka tukuna na ka kecega, kei na ka sa yaco vei rau ka curumi rau ko ira na tevoro.

³⁴ Ka raica, era sa lako kece yani na lewe ni koro me ra tavaki Jisu: ia ni ra sa raici koya, era sa masuta me lako tani yani e na nodra vanua.