Maciu 4 - Vakavakadewa Makawa

Sa dauveretaki Jisu na tevoro, 111. Sa laki tiko ki Kapenaumi ko Jisu, 1216. Sa dauvunau ko Jisu; a sa kacivi Pita, kei Adriu, kei Jemesa, kei Joni, me ratou nonai talatala, 1722. Sa veilakoyaki ko Jisu me vunau ka vakabulai ira na mate, 2325.

¹ Sa qai kauti Jisu cake na Yalo Tabu ki na veikau, me dauveretaki koya na tevoro.

² Ia ni sa lolo ko koya e na siga e vasagavulu kei na bogi e vasagavulu, sa qai viakana.

³ A sa lako mai vei koya na dauvere, ka kaya, Kevaka ko sa Luve ni Kalou, mo kaya mada me vuki mei buli madrai na veivatu oqo.

⁴ A sa vosa ko koya, ka kaya, Sa volai, Ena sega ni bula na tamata e na madrai duaduaga, sa bula ga e na vosa kecega sa lako mai na gusu ni Kalou.

⁵ Sa qai kauti koya na tevoro ki na koro tabu, ka vakatikori koya ki dela ni vale ni soro,

⁶ a sa kaya vua, Kevaka ko sa Luve ni Kalou, mo rika sobu: ni sa volai, Ena vakaroti ira na nona agilose ko koya e na vukumu: Ia era na keveti iko e na ligadra, De dua na siga sa tavutu kina na yavamu ki na vatu.

⁷ Sa kaya vua ko Jisu, Sa volai talega, Mo kakua ni vakatovolei Jiova na nomu Kalou.

⁸ Sa kauti koya tale na tevoro ki na dua na ulu-ni-vanua cecere sara, a sa vakaraitaka vei koya na matanitu kecega e vuravura, kei na kedrai ukuuku;

⁹ a sa kaya vua, A ka kecega oqori kau na solia vei iko, kevaka ko na cuva sobu ka vakarokoroko vei au.

¹⁰ Sa qai kaya vua ko Jisu, Mo lako tani, Setani, ni sa volai, Mo vakarokoroko vei Jiova na nomu Kalou, ia mo qaravi koya duaduaga.

¹¹ Sa qai biuti koya na tevoro, ka raica, sa lako mai eso na agilose ka qaravi koya.

¹² Ia ni sa rogoca ko Jisu sa biu ki na vale ni veivesu ko Joni, sa lako tale ki Kalili;

¹³ a sa biuti Nasareci, ka sa laki tiko vakadua ki Kapenaumi, o koya sa tu e na baravi, e nai yalayala kei Sepuloni kei Nafitalai:

¹⁴ me vakayacori kina na vosa sa tukuna ko Aisea na parofita, ka kaya,

¹⁵ A vanua ko Sepuloni, kei na vanua ko Nafitalai, E na yasayasa ni wai, e na tai kadua ni Joritani, ko Kalili ni veimatanitu tani,

¹⁶ Ko ira na tamata ka tiko e na butobuto, Era sa raica na rarama levu; Ia vei ira ka tiko e na vanua ni mate kei na kena yaloyalo Sa cabe cake na rarama.

¹⁷ Mai na gauna ko ya sa vakatekivu kina ko Jisu me dauvunau, ka kaya, Dou veivutuni! ni sa voleka na matanitu vakalomalagi.

¹⁸ A sa lako voli ko Jisu e na baravi mai Kalili, a sa raica e le rua erau veitacini, ko Saimoni sa vakatokai ko Pita, kei Adriu na tacina, erau sa viritaka na lawa ki wai: ni rau sa gonedau.

¹⁹ A sa kaya vei rau ko koya, Drau muri au mai, kau na qisi kemudrau mo drau gonedau ni tamata.

²⁰ A rau sa biuta sara tu na nodrau lawa, ka muri koya

²¹ A sa lako tani maikea ko koya vaka ki liu, a sa raica e le rua tale erau veitacini, ko Jemesa na luve i Sepete, kei Joni na tacina, eratou sa toka vata kei Sepete na tamadrau mai waqa, a rau sa oneva na nodratou lawa; a sa kacivi rau ko koya.

²² A rau sa biuta sara tu na waqa kei na tamadrau, ka muri koya.

²³ A sa veilakoyaki voli e Kalili taucoko ko Jisu, a sa vakatavuvuli e na nodra veivale ni lotu, a sa vunautaka nai tukutuku-vinaka ni matanitu, a sa vakabulai ira na tamata mai na mate kecega, kei na malumalumu kecega.

²⁴ A sa rogovaki yani na kenai rogorogo ki Siria taucoko: a sa kau vua ko ira kecega sa tauvi-mate, era sa tauvi e na mate tani eso kei na yaluma, kei ira sa curumi ira na tevoro, kei ira sa tauvi-lialia, kei ira sa tauvi-paralasi; a sa vakabulai ira ko koya.

²⁵ A ra sa lewe vuqa sara sa muri koya mai Kalili, kei Tikapoli, kei Jerusalemi, kei Jutia, kei na tai kadua ni Joritani.