Maciu 28 - Vakavakadewa Makawa

E dua na agilose sa tukuna vei rau na yalewa ni sa tu cake tale mai ko Jisu, 18. Sa qai rairai mai vei rau ko Jisu, 9,10. Sa solia nai lavo ko ira na bete levu vei ira nai vakatawa, me ra kaya sa butakoci koya ko ira na nona tisaipeli, 1115. Sa rairai vei ira na nona tisaipeli ko Jisu; a sa vakarota me vakalotutaki ko ira na lewe ni veivanua kecega, 1620.

¹ Ia ni sa oti na siga ni vakacecegu, a sa kida nai matai ni siga ni wiki, sa qai lako mai ko Meri na yalewa ni Makitala kei na Meri kadua, me rau raica nai bulubulu.

² Ka raica, sa tavuki oti vakalevu na vanua; ni sa dua na agilose ni Turaga sa lako sobu mai lomalagi, a sa lako mai ka vaqiqica tani na vatu, a sa tiko e delana.

³ A sa vaka na liva na matana, a sa vulavula na nonai sulu me vaka na uca-vulavula.

⁴ A ra sa sautaninini na sotia era sa vakatawa ni ra sa rerevaka, a ra sa yaco me vakataki ira sa mate.

⁵ A sa qai vosa na agilose, ka kaya vei rau na yalewa, Drau kakua ni rere; ni kau sa kila drau sa vakasaqarai Jisu, ko koya ka lauvako ki na kauveilatai.

⁶ Sa sega eke ko koya: sa tu cake tale, me vaka na nona vosa. Drau lako mai, mo drau raica na yasana ka koto kina na Turaga.

⁷ Ia drau lako kusarawa, ka tukuna vei ira na nona tisaipeli ni sa tu cake tale mai na mate ko koya; ka kila, sa liutaki kemudou ki Kalili: dou na raici koya kina: kila, au sa tukuna vei kemudrau.

⁸ A rau sa lako kusarawa mai nai bulubulu ni rau sa rere ka reki vakalevu; a rau sa cici me tukuna vei ira na nona tisaipeli.

⁹ Ka raica, sa tavaki rau ko Jisu, ka kaya, Sa loloma. Erau sa qai toro vua ka taura na yavana, ka vakarokoroko vua.

¹⁰ Sa qai kaya vei rau ko Jisu, Drau kakua ni rere; drau laki tukuna ga vei ira na wekaqu me ra lako ki Kalili; ia era na raici au maikea.

¹¹ Ia ni rau sa lako yani, raica, eso vei ira nai vakatawa era sa lako ki na koro, a ra sa tukuna kivei ira na bete levu na ka kece sa qai yaco.

¹² Ia ni ra sa soqoni vata kei ira na qase, ka sa bosea, era sa qai solia vakalevu nai lavo vei ira na sotia,

¹³ ka kaya, Dou vaka, Sa lako mai e na bogi ko ira na nona tisaipeli, ka butakoca na yagona, ni keimami a moce tu.

¹⁴ Ia kevaka ena rogoca na kovana, keitou na vakalomavinakataki koya, ka vakarurugi kemudou.

¹⁵ A ra sa taura nai lavo, a ra sa kitaka me vaka era sa vakatavulici kina: a sa dautukuni tikoga na vosa oqo vei ira na kai Jutia ka yacova na siga edaidai.

¹⁶ A sa lako ki Kalili ko ira na tisaipeli na lewe tinikadua, ki na ulu-ni-vanua ka tukuna vei ira ko Jisu.

¹⁷ Ia ni ra sa raici koya, era sa vakarokoroko vua: ia sa sega ni vakadinata ko ira eso.

¹⁸ A sa lako mai ko Jisu ka vosa vei ira, ka kaya, Sa soli mai vei au na lewa kecega mai lomalagi kei vuravura.

¹⁹ O koya mo dou qai lako, ka vakalotutaki ira na lewe ni veivanua kecega, ka papitaisotaki ira e na yaca ni Tamamudou, kei na Luvena, kei na Yalo Tabu;

²⁰ vakavulici ira me ra vakabauta na ka kece kau a vosa kina vei kemudou: ka mo dou kila, au sa tiko vata kei kemudou e na veisiga kecega, ka yacova nai vakataotioti kei vuravura. Emeni.