Maciu 27 - Vakavakadewa Makawa

Era sa kauti Jisu vei Pailato, 1,2. Sa kukunataki koya ko Jutasa, 310. Sa lewai ko Jisu; sa talaki vei Pailato na watina, 1125. Sa soli Jisu vei ira na kai Jutia ko Pailato; a ra sa vakacacana, ka vakalialia, ka vakota ki na kauveilatai, 2649. Sa qai ciba ko Jisu, a sa yaco e muri eso na ka mana, 5056. Sa buluta ko Josefa, 5761. A ra sa qai sogota deivaki nai bulubulu na kai Jutia, ka vakatawana, 6266.

¹ Ni sa mataka, era sa bosei Jisu ko ira kecega na bete levu kei ira na nodra qase na tamata, me ra vakamatea;

² ia ni ra sa vesuka, era sa kauta yani, ka solia vei Ponitio Pailato na kovana.

³ Ia ko Jutasa, ko koya ka solia yani, ni sa raica sa lewai ko koya me mate, sa qai veivutuni, a sa vakasuka na tiki ni siliva e tolusagavulu vei ira na bete levu kei ira na qase,

⁴ ka kaya, Au sa cala ni kau a soli koya sa sega ni cala me mate. A ra sa kaya, Sa bale vakacava vei keitou? Sa baleti iko ga.

⁵ A sa biuta ko koya na veitiki ni siliva e na vale ni soro, ka curu yani; ka laki kukunataki koya.

⁶ A ra sa kauta na veitiki ni siliva ko ira na bete levu, ka kaya, Sa sega ni tara me biu ki na kato ni kamunaga ni vale ni soro, ni sai sau ni mate.

⁷ A ra sa qai bosea, ka volia kina na tiki ni vanua ni dautuli kuro, me ra bulu kina na vulagi.

⁸ O koya oqo sa vakatokai kina na tiki ni vanua ko ya, na tiki ni vanua ni dra, ka yacova na siga oqo.

⁹ Sa qai vakayacori na ka sa tukuna ko Jeremaia na parofita, ka kaya, Era sa kauta na tiki ni siliva e tolusagavulu, ai voli kei koya sa volitaki, ko koya era sa volia ko ira eso na luve i Isireli;

¹⁰ a ra sa solia mei voli ni tiki ni vanua ni dautuli kuro; me vaka sa vosa vei au na Turaga.

¹¹ A sa tu ko Jisu e na mata ni kovana, a sa tarogi koya na kovana ka kaya, O sa nodra Tui na kai Jutia, se segai? A sa kaya vua ko Jisu, O sa kaya dina mai.

¹² Ia ni ra sa beitaka ko ira na bete levu kei ira na qase, sa sega ni vosa ko koya.

¹³ Sa qai kaya vua ko Pailato, O sa sega beka ni rogoca na kena levu ni ka era sa beitaki iko kina?

¹⁴ A sa sega tale ni sauma ko koya e dua na nona vosa; a sa kurabui vakalevu kina na kovana.

¹⁵ A sa dau nonai valavala na kovana e na kana vata ni lako sivia ko ya me sereka vei ira na lewe vuqa e dua na tamata vesu, ko koya era sa digitaka.

¹⁶ A sa tiko vei ira e dua sa vesu tu, e rogo sara, sa vakatokai ko Parapa.

¹⁷ O koya, ni ra sa soqoni vata mai, sa kaya kina vei ira ko Pailato, Ko cei dou sa vinakata meu sereka vei kemudou? ko Parapa, se ko Jisu, ko koya sa vakatokai na Karisito?

¹⁸ Ni sa kila ko koya era a soli koya yani ni ra sa vuvutaka.

¹⁹ Ia ni sa tiko sobu ko koya e nai tikotiko ni veilewai, sa talatala vua ko koya na watina, ka kaya; Me kakua e dua na ka ko cakava vua na tamata dodonu ko ya: ni kau sa rarawa vakalevu edaidai ni kau sa tadrai koya.

²⁰ A sa vakadreta vei ira na lewe vuqa ko ira na bete levu kei ira na qase, me ra kerei Parapa, ka me mate ko Jisu.

²¹ Sa qai vosa na kovana, ka kaya vei ira, Ko cei vei rau na lewe rua dou sa vinakata meu sereka vei kemudou? Era sa kaya, Ko Parapa.

²² Sa kaya vei ira ko Pailato, A cava meu qai kitaka vei Jisu, ko koya sa vakatokai na Karisito? Era sa kaya kecega vua, Me lauvako ga ki na kauveilatai.

²³ Sa qai kaya na kovana, A cava na ka ca sa cakava ko koya? A ra sa qai qoqolou vakalevu cake, ka kaya, Me lauvako ga ki na kauveilatai.

²⁴ Ni sa raica ko Pailato sa sega ni yaco na nona vosa, ka sa ue mai ko ira na tamata, sa qai kauta e dua na wai, a sa vuluvulu e matadra na lewe vuqa, ka kaya, Oi au. Kau na sega ni tarogi e na vuku ni mate ni tamata dodonu oqo: sa baleti kemudou ga.

²⁵ A ra sa qai vosa kece na tamata, ka kaya Me baleti keimami kei ira talega na luveimami, na nona mate.

²⁶ Sa qai sereki Parapa vei ira ko koya, ia ni sa vakanakuitataki Jisu mada, sa qai solia yani me vakoti ki na kauveilatai.

²⁷ Ia ko ira na sotia ni kovana era sa kauti Jisu ki na vale ni turaga, ka vakasoqoni ira vata kina na mata sotia taucoko.

²⁸ A ra sa luvata na nonai sulu, ka vakasuluma e na dua nai sulu damudamu.

²⁹ Ka ra sa qai talia e dua nai sala e na wa-votovotoa, era sa vakaisalataki koya kina, ka tura e na ligana i matau e dua na gasau: a ra sa tekiduru e matana, a ra sa vakalialiai koya, ka kaya, Sa loloma, na nodra Tui na kai Jutia!

³⁰ A ra sa qai kasivita, ka kauta na gasau, ka waroca na uluna.

³¹ Ia ni ra sa vakalialia oti, era sa luvata vua nai sulu, ka vakasuluma e na nonai sulu dina; ka kauta yani mera vakota ki na kauveilatai.

³² Ia ni ra sa lako yani, era sa kunea e dua na kai Kirini, ko Saimoni na yacana: ko koya era sa vakasaurarataka me colata na nona kauveilatai.

³³ Ia ni ra sa yaco ki na yasana sa vakatokai ko Kolikoca, (a kenai balebale, Na yasana ni qavokavoka,)

³⁴ era sa solia vua na wai wiwi sa veiwaki vata kei na ka gaga me gunuva: ia ni sa tovolea ko koya, sa bese ni gunuva.

³⁵ Era sa qai vakota ki na kauveilatai, a ra sa vota na nonai sulu, e na vakawiri madigi: me vakayacori kina na ka sa vosataka na parofita, Era sa vota vei ira na noqui sulu, ia na noqui tutuvi era sa ia kina na vakawiri madigi.

³⁶ A ra sa tiko sobu ka vakatawai koya maikea.

³⁷ A ra sa vakota ecake me donuya na uluna nai vola ni ka sa beitaki vua: OQO KO JISU, NA NODRA TUI NA KAI JUTIA.

³⁸ Sa qai lauvako vata kaya ki na kauveilatai e lewe rua na daubutako, e dua e na ligana i matau, ka dua e na ligana i mawi.

³⁹ Ia ko ira sa lako voli, era sa vosavakacacataki koya, ni ra sa kurea na uludra,

⁴⁰ ka kaya, O iko sa basuka na vale ni soro, ka tara e na bogi e tolu, vakabulai iko mada: kevaka ko sa Luve ni Kalou, mo kevu sobu mai na kauveilatai.

⁴¹ Sa vaka talega kina ko ira na bete levu, kei ira na vunivola kei ira na qase, era sa vakalialia, ka kaya,

⁴² O koya sa dau vakabulai ira na tani; sa sega ni vakabulai koya rawa: Sa nodra Tui na Isireli ko koya, me kevu sobu e daidai mai na kauveilatai, keimami na qai vakabauti koya:

⁴³ sa dauvakararavi ko koya vua na Kalou; me vakabulai koya edaidai ko koya, kevaka e vinakati koya: ni sa kaya, Oi au na Luve ni Kalou.

⁴⁴ Oi rau talega na daubutako, eratou a vakoti vata kaya ki na kauveilatai, erau sa vakalialiai koya vakakina.

⁴⁵ Sa qai butobuto na vanua taucoko, sa vakatekivu mai nai kaono ni aua ka yacova nai kaciwa ni aua.

⁴⁶ Ia e nai kaciwa ni aua sa kaci ko Jisu e na domo levu, ka kaya, Ilai, Ilai, lama sapakicani? a kenai balebale, Noqu Kalou, noqu Kalou, ko sa biuti au e na vuku ni cava?

⁴⁷ Ia ka so vei ira sa tu voleka, ni ra sa rogoca, era sa kaya, Na tamata oqo sa kacivi Ilaija.

⁴⁸ A sa cici sara e dua vei ira, a sa taura e dua na vutovuto, ka tonisua e na wai wiwi, ka vivia ki na dua na gasau, a sa vagunuvi koya.

⁴⁹ A sa kaya ko ira sa vo, Laiva mada; me da raica se na lako mai ko Ilaija me vakabulai koya, se segai.

⁵⁰ Ia ko Jisu, ni sa kaci tale e na domo levu, sa qai laiva na yalona.

⁵¹ Ka raica, sa sei rua nai lati ni vale ni soro mai na tikina e cake ka kauta kira; a sa tavuki na vanua, a sa kavida rua na veivatu lelevu;

⁵² a sa dolavi na veibulubulu; sa vuqa talega na yagodra na yalododonu ka moce, sa tu cake tale mai;

⁵³ ia ni sa tu cake tale mai na mate ko koya, era sa lako mai na veibulubulu, ka lako ki na koro tabu, ka sa rairai vei ira na lewe vuqa.

⁵⁴ Ia na turaga ni valu, kei ira sa tiko vata kaya me vakatawai Jisu, ni ra sa raica na tavuki ni vanua, kei na veika sa yaco, era sa rere vakalevu, ka kaya, E dina ga sa Luve ni Kalou ko koya oqo.

⁵⁵ Era sa lewe vuqa talega na yalewa era sa vakaraica vakayawa, ko ira era a muri Jisu mai Kalili, ni ra sa dauqaravi koya:

⁵⁶ e dua vei ira ko Meri na yalewa ni Makitala, kei Meri na tinai Jemesa kei Josese, kei na tinadrau na luve i Sepete.

⁵⁷ Ia ni sa yakavi, sa lako mai e dua na tamata vutuniyau, na kai Arimacea, na yacana ko Josefa, ko koya talega sa tisaipeli i Jisu:

⁵⁸ sa lako vei Pailato ko koya, ka kerea na yagoi Jisu. Sa qai kaya ko Pailato me soli na yagona:

⁵⁹ a sa kauta na yagona ko Josefa, ka solega e na dua nai sole lineni sa savasava,

⁶⁰ a sa vakotora e na nonai bulubulu vou, ka taya ko koya e na vatu: a sa vaqiqica e dua na vatu levu ki na katuba ni bulubulu, ka lako tale yani.

⁶¹ A sa tiko maikina ko Meri na yalewa ni Makitala, kei na Meri kadua, erau sa tiko sobu ka donuya nai bulubulu.

⁶² Ia e na mataka e na siga sa tarava na siga Vakarau, era sa soqoni vata vei Pailato ko ira na bete levu kei ira na Farisi,

⁶³ a ra sa kaya, Kemumi na Turaga, keitou sa nanuma ni sa kaya na dauveivakacalai ko ya, ni sa bula tiko, Me oti mada e tolu na bogi kau na qai tucake-take mai:

⁶⁴ o koya mo ni qai lewa me sogo vakaukauwa nai bulubulu me oti mada nai katolu ni bogi, de ra lako mai na nona tisaipeli, ka butakoca, ka qai kaya vei ira na tamata, Sa tu cake tale mai na mate ko koya: ena qai levu cake kina na veivakacalai emuri, ka ca vakalailai ko ya eliu.

⁶⁵ Sa qai kaya vei ira ko Pailato, Sa tu ga vei kemudou nai vakatawa eso: dou lako, dou vakadeitaka me vaka dou sa rawata.

⁶⁶ Era sa qai lako, a ra sa sogota vakaukauwa nai bulubulu, ka ra sa dregata na vatu, ka lesia eso na sotia me vakatawa.