Maciu 23 - Vakavakadewa Makawa

Sa vakavulici ira na tamata ko Jisu me ra muria na nodrai vakavuvuli vinaka na Farisi kei na vunivola ia me ra kakua ga ni muria na nodrai valavala ca, 112. Sa qai vunauci ira na Farisi, a sa vakatakila ni na ca ko Jerusalemi, 1339.

¹ Sa qai vosa ko Jisu vei ira na lewe vuqa, vei ira talega na nona tisaipeli,

² ka kaya, Sa tiko e nai tikotiko i Mosese ko ira na vunivola kei ira na Farisi;

³ ia na ka kecega era sa kaya vei kemudou mo dou vakabauta, dou vakabauta ga ka cakava; ia dou kakua ga ni muria na nodrai valavala, ni ra sa vosa ga ka sega ni cakava.

⁴ Ni ra sa vauca nai colacola bibi e dredre sara ni colati, ka vakataqara e na usouso-ni-domodra na tamata; a ra sa sega ni via vakayavalata e na dua na nodrai qaqalo.

⁵ Ia na nodra cakacaka kecega era sa kitaka me raici ira kina na tamata: era sa vakarabailevutaka na nodra veivakananumi tabu, ka ra sa vakalevutaka na tutu ni nodrai sulu,

⁶ a ra sa vinakata nai tikotiko vakaturaga ni ra kana vata, kei nai tikotiko ni qase e na veivale ni lotu,

⁷ kei na veikidavaki e na veirara ni veivoli, me vakatokai talega vei ira na tamata, Vakavuvuli.

⁸ Ia koi kemudou, dou kakua ni vakatokai mei Vakavuvuli: ni sa dua bauga na nomudoui Vakavuvuli; ia dou sa veiwekani kecega.

⁹ Dou kakua talega ni vakatoka e dua me tamamudou e vuravura; ni sa dua bauga na Tamamudou, ko koya mai lomalagi.

¹⁰ Dou kakua talega ni vakatokai me Turaga: ni sa dua bauga na nomudou Turaga, ko koya na Karisito.

¹¹ Ia ko koya sa uasivi cake vei kemudou, me nomudou tamata ko koya.

¹² Ia ko koya ena vakalevulevui koya, ena vakamalumalumutaki; ia ko koya ena vakamalumalumutaki koya, ena vakalevulevui.

¹³ Ia e ca vei kemudou, na vunivola kei na Farisi, na dauveivakaisini! ni dou sa sogota na matanitu vakalomalagi vei ira na tamata: ni dou sa sega ni curu rawa kina koi kemudou, se laivi ira era sa curu tiko me ra curu kina.

¹⁴ E ca vei kemudou, na vunivola kei na Farisi, na dauveivakaisini! ni dou sa kovea na nodrai yau na yada, ni dou sa masu vakabalavu tiko me veivakaisini: ko koya oqo dou na cudruvi vakalevu cake kina.

¹⁵ E ca vei kemudou, na vunivola kei na Farisi, na dauveivakaisini; ni dou sa lakova na wasawasa kei na vanua mo dou vukica e dua me lotu vakataki kemudou; ia ni sa rawa, dou sa cakava me luve ni eli me uasivi vakarua vei kemudou.

¹⁶ E ca vei kemudou, nai vakavuvuli mataboko! dou sa kaya, O koya ena bubului ki na vale ni soro, a ka wale ko ya; ia ko koya ena bubului ki na koula ni vale ni soro, sa vauci kina ko koya.

¹⁷ Na lialia ka mataboko! a cava vei rau e levu cake, na koula, se na vale ni soro sa vakatabui kina na koula?

¹⁸ Ia, O koya ena bubului ki nai cabocabo-ni-madrali, a ka wale ko ya; ia ko koya ena bubului ki nai madrali sa koto kina, sa vauci kina ko koya.

¹⁹ Na lialia ka mataboko! a cava vei rau e levu cake, ai madrali, se nai cabocabo-ni-madrali sa vakatabuya nai madrali?

²⁰ O koya sa bubului ki nai cabocabo-ni-madrali, sa bubului ki na ka ko ya, kei na ka kecega sa koto kina:

²¹ ia ko koya sa bubului ki na vale ni soro, sa bubului kina, vei koya talega sa tiko kina:

²² ia ko koya sa bubului ki lomalagi, sa bubului ki nai tikotiko vakaturaga ni Kalou vei koya talega sa tiko kina.

²³ E ca vei kemudou, na vunivola kei na Farisi, na dauveivakaisini! ni dou sa solia nai katini ni botebotekoro, kei na co vakaoqo, ia dou sa biuta laivi na veika bibi e na vunau, nai valavala dodonu, kei na loloma, kei na vakadinata: o koya sa kilikili mo dou kitaka, me kakua talega ni biu laivi ko ya.

²⁴ Ai vakavuvuli mataboko! dou sa tauvulona me biu na nana, ia na kameli dou sa tiloma ga.

²⁵ E ca vei kemudou, na vunivola kei na Farisi, na dauveivakaisini! ni dou sa vakasavasavataka na bilo kei na dari etaudaku, ia e loma sa sinai e na daubutako kei na garogaro.

²⁶ A Farisi mataboko! mo vakasavasavataka mada na loma ni bilo kei na dari, me qai savasava talega kina etaudaku.

²⁷ E ca vei kemudou na vunivola kei na Farisi, na dauveivakaisini! ni dou sa vaka na veivale ni bulubulu sa boro vulavula, ka sa rairai vinaka e taudaku, ia eloma sa sinai e na sui ni mate, kei na ka kecega sa velavela.

²⁸ Sa vaka talega kina koi kemudou, dou sa rairai etaudaku vei ira na tamata me tamata dodonu, ia eloma dou sa sinai e na dauveivakaisini kei na ka e sega ni dodonu.

²⁹ E ca vei kemudou na vunivola kei na Farisi, na dauveivakaisini! ni dou sa tara na nodra veivale ni bulubulu na parofita, ka vakaiukuukutaka na nodra veivale ni bulubulu na tamata yalododonu,

³⁰ ka kaya, Kevaka eda sa bula e na gauna ni noda qase, eda a bese ni lomavata kei ira e na nodra vakamatei ira na parofita.

³¹ O koya oqo dou sa tukuni kemudou kina, ni dou sa luvedra era vakamatei ira na parofita.

³² Ia mo dou vakasinaita nai vakarau ni nomudou qase.

³³ Na gata, a luve ni gata loaloa! dou na dro rawa vakaevei mai na cudruvi mai eli?

³⁴ Ia ka raica, au na tala yani vei kemudou eso na parofita, kei na tamata vuku, kei na vunivola; ia eso vei ira dou na vakamatea ka vakota ki na kauveilatai; ka so dou na vakanakuitataka e na nomudou veivale ni lotu, ka vakasevi ira mai na koro e dua ki na koro e dua:

³⁵ me yaco kina vei kemudou nai sau ni kedra dra na tamata yalododonu kecega ka vakadavei e vuravura: mai na dra nei Epeli na yalododonu ka yaco ki na dra nei Sakaraia na luvei Parakaia, ko koya dou a vakamatea e na tadrua ni vale ni soro kei nai cabocabo-ni-madrali.

³⁶ Au sa kaya vakaidina vei kemudou, A ka kecega oqori ena yaco ki nai tabatamata oqo.

³⁷ Isa! Jerusalemi, Isa! Jerusalemi, ko iko sa vakamatei ira na parofita, ka vakaviriki ira sa talai yani vei iko, au a nanuma vakavica meu vakasoqoni ira vata na nomu gone, me vaka na toa yalewa sa vakasoqoni ira na luvena e ruku ni tabana, ia dou a sega ni vinakata!

³⁸ Raica, sa qai biu vei kemudou na nomudou vale me lala didi:

³⁹ niu sa kaya vei kemudou, Dou na sega ni raici au tale, ka malua dou na kaya mada, Sa kalougata ko koya sa lako mai e na yaca ni Turaga.