Maciu 21 - Vakavakadewa Makawa

Sa vodoka na asa ko Jisu, ka curu ki Jerusalemi, 111. A sa vakasevi ira era veivoli e na vale ni-soro, 1216. Sa vakamatea na lolo sa sega ni vua, 1722. Sa vagalui ira na bete kei ira na qase, 2327. A vosa vakatautauvata ni gone e le rua sa vosa, ka dua tani na ka erau sa dui cakava; kei nai vakatau-ni-were era cidroi, 2846.

¹ Ia ni ra sa qai toro voleka ki Jerusalemi, ka yaco ki Pecifaki, ki na ulu-ni-vanua ni veiolive, sa tala e lewe rua na tisaipeli ko Jisu,

² ka kaya vei rau, Drau lako ki na koro lailai sa donui kemudrau, ka drau na kunea sara e dua na asa sa noka tu, ka sa tu vata kaya na luvena: drau sereka, ka kauta mai vei au:

³ ia kevaka e dua sa vosa kina vei kemudrau, drau kaya Erau sa yaga vua na Turaga: ena qai solia sara kina ko koya.

⁴ A sa caka oqo, me vakayacori kina na vosa sa tukuna na parofita, ka kaya,

⁵ Tukuna vua sa toka mai Saioni, Raica, sa lako mai vei iko na nomu Tui, Sa yalomalua, a sa vodoka e dua na asa, Kei na luve ni asa.

⁶ A rau sa lako na tisaipeli, ka kitaka me vaka ka vakarota vei rau ko Jisu,

⁷ ka kauta mai na asa, kei na luvena; ka tevuka kina na nodraui sulu, ka vakavodoki koya kina.

⁸ A ra sa lewe vuqa sara sa tevuka na nodrai sulu e gau-ni-sala; ka so tale era tamusuka eso na taba ni kau, ka duibiuta e na gau-ni-sala.

⁹ Ia ko ira na lewe vuqa sa liu, kei ira sa muri, era sa kaci, ka kaya, Osana vua na Luve i Tevita! sa kalougata ko koya sa lako mai e na yaca ni Turaga! Osana kicake sara!

¹⁰ Ia ni sa yaco ki Jerusalemi ko koya, sa yavala kecega na lewe ni koro, ka kaya, O cei li oqo?

¹¹ A ra sa kaya na lewe vuqa, Oqo ko Jisu na parofita mai Nasareci e Kalili.

¹² A sa curu ko Jisu ki na vale ni soro ni Kalou, ka vakasevi ira kecega era sa veivoli e na vale ni soro; sa vukica talega na nodra tepeli era sa veisau i lavo, kei na nodrai tikotiko era sa volitaki ruve;

¹³ a sa kaya vei ira, Sa volai, A noqu vale ena vakatokai me vale ni masu, ia dou sa cakava me nodra qara na daubutako.

¹⁴ A sa lako mai vua ki na vale ni soro eso na mataboko kei na lokiloki; a sa vakabulai ira ko koya.

¹⁵ Ia ni ra sa raica ko ira na bete levu kei ira na vunivola na veika e veivakurabuitaki sa cakava ko koya, kei ira na gone lalai era sa kaci e na vale ni soro, ka kaya, Osana vua na Luve i Tevita! era sa cudru sara,

¹⁶ ka kaya vua, O sa rogoca na ka era vosataka ko ira oqo, se segai? A sa kaya vei ira ko Jisu, Io; dou sa sega beka ni wilika, Mai na gusudra na gone lalai kei ira sa sucu tiko, ko sa cakava me vinaka sara na vakarokoroko?

¹⁷ A sa biuti ira yani ko koya, ka lako tani e na koro ki Pecani; a sa moce kina.

¹⁸ Ia e na mataka ni sa lesu tale tiko ki na koro, sa viakana.

¹⁹ A sa raica e dua na vu ni lolo e na gau-ni-sala, e sa lako kina, a sa sega ni kunea kina e dua na ka, a drauna walega, a sa kaya kina, Mo kakua tale ni vua ka tawa mudu. A sa malai sara vakasauri na vu ni lolo.

²⁰ Ia ni ra sa raica na tisaipeli, era sa kurabui, ka kaya, Sa vakaevei ni sa tei malai vakasauri na lolo?

²¹ A sa vosa ko Jisu, ka kaya vei ira, Au sa kaya vakaidina vei kemudou, kevaka e tu vei kemudou na vakabauta, ka sega ni vakatitiqa, dou na sega ni cakava walega na ka sa yaco ki na vu ni lolo, ia kevaka dou na kaya talega ki na ulu-ni-vanua oqo, Mo cavu laivi, ka mo biu ki na wasaliwa; ena yaco ga.

²² Kei na ka kece sara ga dou na kerea e na masu, ni dou sa vakadinata, dou na rawata.

²³ A sa curu ko koya ki na vale ni soro, ia ni sa vakavuvuli tiko, sa lako mai vua ko ira na bete levu kei ira na nodra qase na tamata, ka kaya, Ko sa lesi maivei mo cakava na veika oqo? ia ko cei sa solia vei iko nai lesilesi oqo?

²⁴ Sa qai vosa ko Jisu, ka kaya vei ira, Au na tarogi kemudou talega e na dua na ka; kevaka dou na tukuna vei au, au na qai tukuna talega vei kemudou se kau sa lesi maivei meu cakava na veika oqo:

²⁵ Sa vu maivei na papitaiso i Joni? mai lomalagi, se mai na tamata? A ra sa veivosakitaka vakai ira, ka kaya, Kevaka eda kaya, E vu mai lomalagi; ena qai kaya ko koya vei keda, Ia dou a sega ni vakadinati koya e na vuku ni cava?

²⁶ Ia kevaka eda na kaya, E vu mai na tamata; eda sa rerevaki ira na lewe vuqa; ni ra sa vakasama kecega sa parofita ko Joni.

²⁷ A ra sa vosa vei Jisu, ka kaya, Keitou sa sega ni kila. Sa qai kaya vei ira ko koya, Au na sega talega ni tukuna vei kemudou se kau sa lesi maivei meu cakava na veika oqo.

²⁸ Ia ka cava dou lewa? Sa dua na tamata sa lewe rua na luvena-tagane; a sa lako vua sa qase, ka kaya, Na luvequ, laki cakacaka edaidai ki na noqu were-ni-vaini.

²⁹ A sa vosa ko koya, ka kaya, Au sa sega ni vinakata; ia sa qai veivutuni emuri ka lako.

³⁰ Sa qai lako vua sa gone, ka vosa vakakina. A sa vosa ko koya, ka kaya, au sa lako, saka; ia ka sa sega ni lako.

³¹ Ko cei vei rau sa muria na loma i tamana? Era sa kaya vua, O koya sa qase. Sa kaya vei ira ko Jisu, Au sa kaya vakaidina vei kemudou, O ira sa kumuna nai vakacavacava kei ira na dautagane, era sa curu eliu vei kemudou ki na matanitu ni Kalou.

³² Ni sa lako mai vei kemudou ko Joni e nai valavala ni yalododonu, ia dou sa sega ni vakadinata: Ia ko ira sa kumuna nai vakacavacava kei ira na dautagane, era sa vakadinata: ia koi kemudou, ni dou sa raica, dou sa sega ni veivutuni emuri, mo dou vakadinata.

³³ Dou rogoca e dua tale na vosa vakatautauvata: Sa dua na tamata sa taukena e dua na vale, sa tea e dua na were-ni-vaini, a sa viribaita vakavolivolita, a sa kelia kina nai keli-ni-waini, a sa tara na nodra vale nai vakatawa, a sa lisitaka vei ira eso nai vakatau-ni-were, a sa qai lako ki na vanua tani.

³⁴ Ia ni sa voleka mai na vula i matua, sa talai ira na nona tamata ko koya vei ira nai vakatau-ni-were, me ra kauta mai na vuana me nonai votavota.

³⁵ A ra sa tauri ira na nona tamata ko ira nai vakatau-ni-were, a ra sa yavita e dua, ka vakamatea e dua, ka vakavirika e dua.

³⁶ A sa tala tale eso tani na tamata, era lewe vuqa cake vei ira ka liu; a ra sa kitaka vakakina vei ira.

³⁷ Sa oti, sa qai tala na luvena kivei ira, ka kaya, Era na vakarokorokotaka na luvequ.

³⁸ Ia ni ra sa raica na luvena ko ira nai vakatau-ni-were, era sa kaya vakai ira, O koya oqo nai taukei emuri; tou mai vakamatea, me da suguta na nona vanua me noda.

³⁹ A ra sa taura ka biliraka ki taudaku ni were-ni-vaini, ka vakamatea.

⁴⁰ Ia ni sa lako mai na turaga ni were-ni-vaini, a cava ena kitaka vei ira nai vakatau-ni-were oqo?

⁴¹ Era sa kaya vua, Ena vakamatei ira vakararawa na tamata ca oqori, ka lisitaka na were-ni-vaini kivei ira eso tani nai vakatau-ni-were, era na solia vua na vuana e na kena yabaki.

⁴² Sa kaya vei ira ko Jisu, Dou a sega beka ni wilika e nai Vola Tabu, Na vatu era sa cata ko ira na matai ni vale. Sa yaco me kenai vakadei e na tutu ni vale: Oqo na cakacaka i Jiova, Ka sa ka e veivakurabuitaki e matada?

⁴³ O koya oqo kau sa kaya kina vei kemudou, Ena kau tani vei kemudou na mata-ni-tu ni Kalou, me soli vei ira na lewe-ni-vanua era na vuataka mai na vuana.

⁴⁴ Ia ko koya ena lutu ki na vatu oqo, ena dasila kina; ia ko koya ena lutuka, ena vurumemea me vaka na nuku.

⁴⁵ Ia ni ra sa rogoca ko ira na bete levu kei ira na vunivola na nona vosa vakatautauvata, era sa kila sa vosataki ira ko koya.

⁴⁶ Ia ni ra sa via taura, era sa rerevaki ira na lewe vuqa, ni ra sa vakasama sa parofita ko koya.