Maciu 20 - Vakavakadewa Makawa

A vosa vakatautauvata ni tamata sa lavaka vei ira na tamata cakacaka na nona were-ni-vaini, 116. Sa vakatakila ko Jisu na nona mate, 1719. Sa vakavulici ira na tisaipeli me ra yalomalumalumu, 2028. Sa vakabula e lewe rua na mataboko, 2934.

¹ Ni sa tautauvata na matanitu vakalomalagi kei na tamata sa taukena e dua na vale, a sa lako ko koya e na mataka caca me voli ira eso na tamata me mai cakacaka e nona were-ni-vaini.

² Ia ni sa veivosaki kei ira na tamata cakacaka me ra tauyadua na pene e na dua na siga me kedrai voli, sa qai talai ira ki na nona were-ni-vaini.

³ A sa lako ko koya e nai katolu ni aua, a sa raici ira eso tale era sa tu walega e na rara ni veivoli,

⁴ a sa kaya vei ira, Dou lako talega ki na were-ni-vaini, ia na ka e dodonu, kau na solia vei kemudou. A ra sa lako.

⁵ Sa lako tale ko koya enai kaono kei nai kaciwa ni aua, a sa kitaka vakakina.

⁶ Sa qai lako ko koya enai katinikadua ni aua, a sa raici ira eso tale era sa tu walega, a sa kaya vei ira, Dou sa tu walega vakacava eke e na siga ka bogicaka?

⁷ Era sa kaya vua, Ni sa sega e dua sa lavaka vei keitou. Sa kaya vei ira ko koya, Dou lako talega ki na were-ni-vaini.

⁸ Ia ni sa yakavi mai, sa kaya na turaga ni were-ni-vaini vua na nona tamata, Kacivi ira mai na tamata cakacaka, ka solia vei ira na kedrai voli, mo vakatekivu vei ira sa muri, mo tinia vei ira sa liu.

⁹ Ia ni ra sa lako mai ko ira na tamata ni kenai katinikadua ni aua, era sa tauyadua, na pene.

¹⁰ Ia ni sa lako mai ko ira era sa liu, era sa nanuma era na rawata vakalevu cake; ia ka ra sa tauyadua ga na pene.

¹¹ Ia ni ra sa taura, era sa qai didi vua nai taukei ni vale,

¹² ka kaya, O ira oqo era sa muri, sa dua bau ga na aua era sa cakacaka kina, ia ko sa vakatautauvatataki keimami kei ira, ia keimami sa colata na kena bibi kei na todra ni siga.

¹³ A sa vosa ko koya vua e dua vei ira, ka kaya, Noqui tau, au sa sega ni vakacacani iko: edaru sa sega li ni veivosaki me dua ga na nomu pene?

¹⁴ mo kauta oqori sa nomu, ka lako; sa lomaqu meu solia vua oqo ka muri, me vaka vei iko;

¹⁵ sa sega beka ni tara meu veitaliataka na noqu ka? se sa ca beka na matamu niu sa yalovinaka?

¹⁶ Ena sa vakakina, ena liu ko ira ka muri, ka na muri ko ira ka liu.

¹⁷ A sa lako cake ki Jerusalemi ko Jisu, ka sa kauti ira vakatikitiki tani na tisaipeli e le tinikarua mai na salatu, ka kaya vei ira.

¹⁸ Raica, eda sa lako cake ki Jerusalemi; ka na soli yani na Luve ni tamata vei ira na bete levu, kei ira na vunivola; ia era na lewai koya me mate,

¹⁹ era na qai solia vei ira na matanitu tani me ra vakalialia, ka vakanakuitataka, ka vakota ki na kauveilatai; ena qai tu cake tale mai ko koya e nai katolu ni siga.

²⁰ Sa qai lako mai vua na tinadrau na luve i Sepete, kei rau na luvena-tagane, ka cuva, ka kerea vua e dua na ka.

²¹ A sa kaya vua ko koya, A cava ko sa vinakata? Sa kaya vua ko koya, Mo ni lewa me rau tiko na luvequ oqo, e dua e na ligamu i matau, ka dua e na ligamu i mawi, e na nomuni matanitu.

²² A sa vosa ko Jisu, ka kaya, Dou sa sega ni kila na ka dou kerea: drau sa rawata beka mo drau gunuva na bilo kau na gunuva? Erau sa kaya vua, Keirau sa rawata.

²³ A sa kaya ko koya vei rau, Drau na gunuva dina na mequ bilo: ia me tiko e na ligaqu i matau, kei na ligaqu i mawi, sa sega ni noqu meu solia vakailoa, vei ira ga sa vakarautaka ko Tamaqu me nodra.

²⁴ Ia ni ra sa rogoca ko ira na lewe tini, era sa cudru sara vei rau na veitacini.

²⁵ A sa kacivi ira mai ko Jisu, ka kaya, Dou sa kila, ni ra sa lewai ira na veimatanitu na nodra turaga, ka sa veitalia vei ira ko ira sa qaqa.

²⁶ Ia ena sega ni vakakina vei kemudou; ia me nomudou tamata ga ko koya yadua vei kemudou sa viavialevu:

²⁷ ka me nomudou tamata ko koya yadua vei kemudou sa viaviaturaga:

²⁸ me vaka sa sega ni lako mai na Luve ni tamata me qaravi, ka me dauveiqaravi ga, ka me solia na nona bula me kedrai voli e lewe vuqa.

²⁹ A ra sa lako tani mai Jeriko, a sa lewe vuqa sara sa muri koya.

³⁰ Ka raica, e lewe rua na tamata mataboko sa tiko e na bati ni sala, ia ni rau sa rogoca sa lako voli yani ko Jisu, erau sa kacikaci, ka kaya, Mo ni lomani keirau mai, na Turaga, na Luve i Tevita.

³¹ A sa vunauci rau ko ira na lewe vuqa me rau tiko lo: a rau sa qai kaci vakalevu kina, ka kaya, Mo ni lomani keirau mai, na Turaga, na Luve i Tevita.

³² Sa qai tu vakadua ko Jisu, ka kacivi rau, ka kaya, A cava drau sa vinakata meu cakava vei kemudrau?

³³ Erau sa kaya vua, Na Turaga, me rai rawa na mata i keirau.

³⁴ Sa qai yalololoma ko Jisu, a sa tara na matadrau: a sa rai vinaka vakasauri na matadrau, a rau sa muri koya.