Maciu 2 - Vakavakadewa Makawa

Ni sa sucu ko Jisu, sa lako mai na tu i cake eso na tamata vuku me ra cuva vua; a sa kidroa ko Eroti, kei ira kecega na kai Jerusalemi; a sa vereti Jisu ko Eroti me vakamatea, 112. Sa drotaki rau na veitinani ki Ijipita ko Josefa, a sa mokuti ira na gonetagane lalai ko Eroti, 1318. Sa mate ko Eroti, sa qai lesu tale ki Jutia ko Josefa kei rau na veitinani, 1923.

¹ Ia ni sa sucu ko Jisu mai Pecileema e Jutia e na gauna sa tui kina ko Eroti, raica, eso na tamata vuku mai na tu i cake era sa lako mai ki Jerusalemi,

² a ra sa kaya, Evei ko koya sa sucu me nodra tui na kai Jutia? ni keitou a raica na nona kalokalo mai na tu i cake, ka keitou sa lako mai me cuva vua.

³ Ia ni sa rogoca ko Eroti na tui, sa kidroa, kei Jerusalemi taucoko vata kaya:

⁴ ia ni sa vakasoqoni ira vata kecega na bete levu kei ira na vunivola ni tamata, sa tarogi ira ko koya se na sucu beka evei na Karisito.

⁵ Era sa kaya vua, Mai Pecileema e Jutia: ni sa vola vakaoqo na parofita,

⁶ Ia ko iko Pecileema, e na vanua ko Juta, Ko sa sega ni lailai sara vei ira na veiyasana e Juta: Ni na tubu maivei iko e dua na Turaga, Ko koya ena lewai ira na noqu tamata na Isireli.

⁷ Ia ko Eroti, ni sa kacivi ira lo na tamata vuku, sa qai taroga matua vei ira na gauna sa rairai kina na kalokalo.

⁸ A sa talai ira ki Pecileema, ka kaya, Dou laki vakasaqara matua sara na gone lailai; ia ni dou sa kunea, tukuna mai vei au, meu laki cuva talega vua.

⁹ Ia ni ra sa rogoca na vosa ni tui, era sa lako; ka raica, na kalokalo era a raica mai na tu i cake, sa liutaki ira, a sa laki tu vakadua, ni sa donuya na tikina sa koto kina na gone lailai.

¹⁰ Ia ni ra sa raica na kalokalo, era sa reki vakalevu sara.

¹¹ Ia ni ra sa curu ki vale, era sa raica na gone lailai kei Meri na tinana, a ra sa cuva sobu, ka vakarokoroko vua: ia ni ra sa sereka na nodra i solesole kamunaga, era sa vakacabora vua eso nai solisoli; na koula, kei na drega me vakamai, kei na mura.

¹² Ia ni sa vakasala vei ira e na tadra na Kalou me ra kakua ni lako tale vei Eroti, era sa lesu tale ki na nodra vanua e na sala tani.

¹³ Ia ni ra sa lako tani, raica, sa qai rairai vei Josefa e na tadra e dua na agilose ni Turaga, ka kaya, Mo cavu tu, mo kauta na gone lailai kei tinana, ka dro ki Ijipita, ka waraka kina na noqu vosa vei iko; ni na vakasaqara na gone lailai ko Eroti me vakamatea.

¹⁴ Sa qai cavu tu ko koya, ka kauta na gone lailai kei tinana e na bogi, ka lako ki Ijipita:

¹⁵ a sa tiko kina ka yacova na mate i Eroti: me vakayacori kina na vosa ni Turaga ko ya sa tukuna na parofita, ka kaya, Au a kaciva na luvequ mai Ijipita.

¹⁶ Ia ko Eroti, ni sa qai kila era a vakaisini koya ko ira na tamata vuku, sa cudru vakalevu sara, ka sa talatala yani, me vakamatei ira kecega na gonetagane lalai era sa tiko mai Pecileema, kei na kena veiyasana kecega, ko ira era yabaki yarua kei ira era lalai sobu, me rauta na gauna ka taroga matua kina ko koya vei ira na tamata vuku.

¹⁷ Sa qai vakayacori na ka sa vosataka ko Jeremaia na parofita, ka kaya,

¹⁸ E dua na domo sa rorogo mai Rama, A qoqolou, kei na tagi, kei na somate levu, Sa tagicaki ira na luvena ko Rejeli, A sa bese ni vakacegui, ni ra sa yali.

¹⁹ Sa mate ko Eroti, sa qai rairai vei Josefa mai Ijipita e na tadra, e dua na agilose ni Turaga,

²⁰ ka kaya, Cavu tu, mo kauta na gone lailai kei tinana, ka lako ki na nodra vanua na Isireli: ni ra sa mate ko ira sa vakasaqara na gone me ra vakamatea.

²¹ Sa qai cavu tu ko koya, ka kauta na gone lailai kei tinana, a sa lako mai ki na nodra vanua na Isireli.

²² Ia ni sa rogoca sa tui mai Jutia ko Arikeleo nai sosomi kei Eroti na tamana, sa rere ni lako kina; ia ni sa vakasala vua na Kalou e na tadra, sa lesu ko koya ki na yasayasa vaka-Kalili:

²³ a sa laki tiko vakadua ki na koro na yacana ko Nasareci, a sa vakayacori kina na ka era sa vosataka ko ira na parofita, Ena vakatokai ko koya, a kai Nasareci.