Maciu 17 - Vakavakadewa Makawa

Sa matalia na yago i Jisu, a sa sikavotu vua ko Mosese kei Ilaija, 113. Sa vakabula ko koya e dua sa tauvi-mate era a dredreta na tisaipeli, 1421. A sa vakatakila na nona mate vei ira na tisaipeli, 22,23. Sa ia na soli ki na vale ni Kalou, 2427.

¹ Sa bogi ono sa qai kauti Pita kei Jemesa, kei Joni na tacina, ko Jisu, a sa kauti iratou vakatikitiki ki na dua na ulu-ni-vanua cecere.

² A sa matalia na yagona e matadratou; a sa serau na matana me vaka na mata-ni-siga, ka sa vulavula mai na nonai sulu me vaka na rarama.

³ Ka raica, sa sikavotu vei iratou ko Mosese kei Ilaija, a ratou sa veivosaki kaya.

⁴ Sa qai vosa ko Pita, ka kaya vei Jisu, Na Turaga, sa vinaka na nodatou tiko eke: kevaka ko ni sa vinakata, me keitou tara eke e tolu na vale-vakacevaceva; e dua me nomuni, ka dua me nei Mosese, ka dua me nei Ilaija.

⁵ Ni sa vosa tiko ko koya, raica, sa dua na o lumilumisa sa vakarurugi iratou: ka raica, sa rogo e dua na vosa mai na o, sa kaya, Oqo na noqu Gone ni toko, au sa dauvinakata vakalevu; dou vakarogoci koya.

⁶ Ia ni ratou sa rogoca na tisaipeli, eratou sa cuva vakatoboicu, ka ra sa rere vakalevu.

⁷ A sa lako mai ko Jisu ka tarai iratou, ka kaya, Tu cake, ka kakua ni rere.

⁸ Ia ni ratou sa ta cake, eratou sa sega ni raica e dua tale, ko Jisu duaduaga.

⁹ Ia ni ratou sa lako sobu tiko mai na ulu-ni-vanua, sa vakarota vei iratou ko Jisu, ka kaya, Kakua ni tukuna vua e dua na veika sa rairai, ka malua me tu cake tale mai na mate na Luve ni tamata.

¹⁰ A sa tarogi koya ko iratou na nona tisaipeli, ka kaya, A cava era kaya kina na vunivola ni sa dodonu me liu mada mai ko Ilaija?

¹¹ A sa vosa ko Jisu, ka kaya vei iratou, Sa lako dina mada mai ko Ilaija, me vukica na ka kece me vinaka tale.

¹² Ia kau sa kaya vei kemudou, Sa tale eke ko Ilaija, a ra sa sega ni kilai koya, a ra sa kitaka vua na ka kecega era sa vinakata: era na vakararawataka vaka talega kina na Luve ni tamata.

¹³ Eratou sa qai kila na tisaipeli ni sa vosataki Joni na dauveipapitaiso vei iratou ko koya.

¹⁴ Ia ni ratou sa yaco vei ira na lewe vuqa, sa lako mai vua e dua na tamata, ka tekiduru vua, ka kaya,

¹⁵ Kemuni na Turaga, ni lomani koya na luvequ-tagane: ni sa tauvi koya na lialia, a sa rarawa vakalevu: sa bale vakavuqa ki na bukawaqa, ka vakavuqa ki na wai:

¹⁶ ia kau a kauta vei iratou na nomuni tisaipeli, a ratou sa sega ni vakabulai koya rawa.

¹⁷ Sa qai vosa ko Jisu, ka kaya, Ai tabatamata sega ni vakabauta ka yalo vakatani! a cava na kena dede meu tiko kei kemudou? a cava na kena dede meu vosoti kemudou? kauti koya mai vei au kike.

¹⁸ Sa qai vunauca na tevoro ko Jisu; a sa lako tani mai vua: a sa bula na gone e na tiki-ni-siga ko ya.

¹⁹ Era sa qai lako vakatikitiki mai na tisaipeli vei Jisu, a ra kaya, E na vuku ni cava keitou sa sega ni vakasevi koya tani rawa kina?

²⁰ A sa kaya vei ira ko Jisu, E na vuku ni dou sa sega ni vakabauta: niu sa kaya vakaidina vei kemudou, Kevaka e tu vei kemudou na vakabauta e vaka na sore ni musita, dou na kaya ki na ulu-ni-vanua oqo, Lako tani kikea! ka na lako tani: a sa sega na ka ena dredre vei kemudou:

²¹ ia ko ira sa vakaoqo era sa sega ni vakasevi tani wale, e na daumasu ga kei na daulolo.

²² Ia ni ra sa lako voli e Kalili, sa kaya vei ira ko Jisu, Ena soli yani na Luve ni tamata ki na ligadra na tamata:

²³ ka ra na vakamatei koya, ka na vakaturi cake tale mai ko koya e nai katolu ni siga. A sa rarawa vakalevu na lomadra.

²⁴ Ia ni ra sa tadu ki Kapenaumi, sa lako mai vei Pita ko ira sa kumuna vata na soli ki na vale ni Kalou; ka kaya, sa sega li ni ia na soli ki na vale ni Kalou na nomudoui vakavuvuli?

²⁵ Sa kaya ko koya, Sa solia. Ia ni sa curu ki vale, sa vosa taumada ko Jisu, ka kaya, A cava ko lewa, Saimoni? era sa taroga vei cei nai vakacavacava se na soli ko ira na turaga vakavuravura? vei ira na nodra gone, se vei ira ga na tani?

²⁶ Sa kaya vua ko Pita, Vei ira ga na tani. Sa kaya vua ko Jisu, Sa qai lalaga na gone:

²⁷ ia me da kakua ni vakacalai ira, mo lako ki matasawa, ka viritaka na siwa, ka taura na ika ena yavi mada mai; ia ni ko sa basuka na gusuna, ko na kunea kina e dua nai lavo: oqori mo kauta, ka solia vei ira me nodarui tavi.