Maciu 15 - Vakavakadewa Makawa

Sa vunauci ira na Farisi kei na vunivola ko Jisu, ni ra sa vakabauta na vosa ni tamata ka biuta na vosa ni Kalou, 19. Sa vakatakila ni sa vu ni ka ca kecega na yalo ni tamata, 1020. A sa vakabula e dua na goneyalewa, a luve ni yalewa ni Kenani, 2128; kei ira na lewe vuqa, 2931. Sa vakani ira na lewe vuqa, 3239.

¹ Sa qai lako mai vei Jisu ko ira na vunivola kei ira na Farisi mai Jerusalemi, ka kaya,

² A cava sa talaidredre kina ko ira na nomu tisaipeli ki na nodrai vakavuvuli na qase? ni ra sa kana ka sa sega mada ni vuluvulu.

³ A sa vosa ko koya, ka kaya vei ira, A cava dou sa talaidredre talega kina ki na vunau ni Kalou e na nomudoui vakavuvuli?

⁴ Ni sa vakarota na Kalou, ka kaya, Vakarokoroko vei rau na tamamu kei na tinamu: ia, Ko koya sa vosavakacacataka na tamana se na tinana, me sa vakamatei.

⁵ Ia dou sa kaya, O koya yadua ena kaya vei tamana se tinana, Sa vakatabui me nona na Kalou na noqu ka sa yaga vei iko:

⁶ me sa qai sega ni vakarokoroko vei tamana se tinana. Ia dou sa vakawaletaka na vunau ni Kalou e na nomudoui vakavuvuli.

⁷ A dauveivakaisini koi kemudou! sa tukuni kemudou vakavinaka eliu ko Aisea, ni sa kaya,

⁸ O ira na tamata oqo era sa vakarokorokotaki au e na gusudra, Ia na yalodra sa yawa tani vei au:

⁹ A sa sega ni yaga na nodra masuti au, Ni ra sa vakatavuvulitaka na vunau ni tamata mei vakavuvuli.

¹⁰ A sa kacivi ira na lewe vuqa, ka kaya vei ira, Dou rogoca, ka vakasama:

¹¹ a ka sa curu ki na gusuna sa sega ni vakadukadukalitaka na tamata; ia na ka ga sa lako mai na gusuna, sai koya ga sa vakadukadukalitaka na tamata.

¹² Sa qai lako mai ko ira na nona tisaipeli, ka kaya vua, O ni sa kila beka era sa lomaca na Farisi, ni ra sa rogoca na vosa ko ya?

¹³ A sa vosa ko koya, ka kaya, A kau vakaaduaga, e sega ni tea ko Tamaqu vakalomalagi, ena cavu laivi.

¹⁴ Dou laivi ira ga: era sa mataboko, a ra sa tuberi ira na mataboko. Ia kevaka e tubera na mataboko na mataboko, erau na sikalutu ruarua ki na keli.

¹⁵ Sa qai vosa ko Pita, ka kaya vua, Mo ni tukuna mai vei keitou na vosa vakatautauvata oqo.

¹⁶ A sa kaya ko Jisu, Oi kemudou talega, dou sa sega li ni kila rawa?

¹⁷ Dou sa sega beka ni kila, na ka kecega sa curu ki na gusu sa lutu ki na kete, a sa biu yani ki nai benubenu?

¹⁸ Ia na veika sa curu mai na gusu, sa lako dina mai na yalo; a veika ga oqo sa vakadukadukalitaka na tamata.

¹⁹ Ni sa curu yani mai na yalo na nanuma ca, na daulaba, na dauyalewa, na daudara, na daubutako, na veibeitaki vakailasu, na vosa vakacaca:

²⁰ a veika ga oqo sa vakadukadukalitaka na tamata: ia ka sega ni vakadukadukalitaka na tamata, ni sa kana ka sega mada ni vuluvulu.

²¹ Sa qai lako tani ko Jisu, ka lako ki na veiyasana i Taia kei Saitoni.

²² Ka raica, sa dua na yalewa ni Kenani sa lako mai na yasana ko ya, a sa tagi vua, ka kaya, Ni lomani au mai, na Turaga, na Luve i Tevita; na luvequ-yalewa sa rarawa vakalevu ni sa curumi koya e dua na tevoro.

²³ A sa sega ni kaya vua e dua na vosa ko koya. A ra sa lako mai na nona tisaipeli ka masuti koya, ka kaya, Vakatalai koya tani; ni sa mai tagi muri keda tikoga.

²⁴ A sa vosa ko koya, ka kaya, Au sa sega ni talai vei ira na tani, vei ira ga na sipi ni mataqali i Isireli era yali tu.

²⁵ Sa qai lako mai na yalewa, ka cuva vua, ka kaya, Kemuni na Turaga, ni vukei au mai.

²⁶ A sa vosa ko koya, ka kaya, Sa sega ni vinaka me kau na kedra na gone, ka me biu vei ira na koli.

²⁷ A sa kaya na yalewa, E dina ga, na Turaga: ia ko ira na koli era kania na meme ni kakana sa lutu mai na tepeli ni nodra turaga.

²⁸ Sa qai vosa ko Jisu, ka kaya vua, Yalewa, sa levu na nomu vakabauta: me yaco vei iko me vaka na ka ko sa vinakata. A sa bula na luvena-yalewa e na tiki-ni-siga ko ya.

²⁹ A sa lako tani maikea ko Jisu, ka lako voleka ki na wasawasa ko Kalili; a sa cabe ki na ulu-ni-vanua, ka tiko sobu kina.

³⁰ A ra sa lewe vuqa sara sa lako mai vua, era sa kauta mai na lokiloki, na mataboko, na galu, na gera, ka lewe vuqa tale; a ra sa kotori ira sobu ki na yava i Jisu; a sa vakabulai ira ko koya:

³¹ a ra sa kurabui kina ko ira na lewe vuqa, ni ra sa raica sa vosa rawa na galu, sa bula na gera, sa lako rawa na lokiloki, a sa rai rawa na mataboko: a ra sa vakacaucautaka na Kalou i Isireli.

³² Sa qai kacivi ira mai na nona tisaipeli ko Jisu, ka kaya, Au sa lomani ira na lewe vuqa, sa qai bogi tolu era sa tiko ga vei au, a sa sega na ka me ra kania: ia kau sa sega ni via vakatalai ira yani ni ra sa sega ni kana, de ra malumalumu e gau-ni-sala.

³³ A sa kaya vua ko ira na nona tisaipeli, Eda na rawata maivei na madrai e lekutu, me ra mamau kina ko ira na lewe vuqa oqo?

³⁴ A sa kaya vei ira ko Jisu, E vica nai buli madrai sa tu vei kemudou, A ra sa kaya, E vitu, ka so na ika lalai.

³⁵ A sa vosa ko koya vei ira na lewe vuqa me ra tiko sobu e na qele.

³⁶ A sa taura ko koya nai buli madrai e vitu kei na ika, a sa vakavinavinaka, a sa dovia, a sa solia vei ira na nona tisaipeli, ia ko ira na tisaipeli era solia vei ira na lewe vuqa.

³⁷ A ra sa kana kecega, a ra sa mamau: a ra sa tomika vata na vo ni ka sa dovi, ka sa vitu na sova sa sinai kina.

³⁸ Ia ko ira sa kana era sa lewe va na udolu na tagane, ia ko ira na yalewa kei na gone era sa sega ni wili.

³⁹ A sa talai ira yani na lewe vuqa ko koya, a sa qai vodoka na waqa, a sa tadu ki na yasayasa vaka-Makitala.