Maciu 14 - Vakavakadewa Makawa

Ni sa rogoca ko Eroti nai rogorogo kei Jisu, sa kaya sai Joni na dauveipapitaiso, 1,2. A ka ka vakamatei Joni kina ko Eroti, 312. Sa lako ko Jisu ki na dua na vanua lala, a sa vakani ira na lewe vuqa, 1321. Sa lako ko Jisu e dela ni wai vei ira na nona tisaipeli, 2233. Ni sa udu ki Kenisareti, sa vakabulai ira era tauvimate, 3436.

¹ E na gauna ko ya sa rogoca ko Eroti na turaga nai rogorogo kei Jisu;

² a sa kaya vei ira na nona tamata, Oqo ko Joni na dauveipapitaiso; sa tu cake tale mai na mate ko koya; o koya sa vu kina vei koya na kaukauwa mana.

³ Ni sa tauri Joni eliu ko Eroti, a sa vesuka, ka biuta ki na vale ni veivesu e na vuku i Erotiasa, na wati i Filipi na tacina:

⁴ ni sa kaya vua ko Joni, E sega ni tara mo drau veiwatini kaya.

⁵ Ia ni sa via vakamatea ko koya, sa rerevaki ira na lewe vuqa, ni ra sa vakasama sa parofita ko koya.

⁶ Ia ni sa ia na magiti ni siga ni sucu i Eroti, sa meke e matadra na goneyalewa na luve i Erotiasa, a sa rekitaka ko Eroti.

⁷ O koya oqo sa yalataka vua ko koya ka bubului kina me solia vua na ka kecega ena kerea.

⁸ Ia ni sa vakavulici koya mada eliu ko tinana, sa kaya ko koya, Solia mai vei au eke e na dua na dari na ulu i Joni na dauveipapitaiso.

⁹ Sa qai rarawa na tui: ia sa kaya ga me soli, e na vuku ni nona bubului, e na vukudra talega era sa kana vata kaya.

¹⁰ A sa talaki ko koya ka sa tamusuki na ulu i Joni e na vale ni veivesu.

¹¹ A sa kau mai na uluna e na dua na dari, a sa soli vua na goneyalewa: ka sa kauta ko koya vei tinana.

¹² Sa qai lako mai ko iratou na nona tisaipeli, a ratou sa kauta na yagona, ka buluta; a ratou sa qai laki tukuna vei Jisu.

¹³ Ia ni sa rogoca ko Jisu, sa soko vakatikitiki tani e na waqa ki na dua na vanua lala: ia ni ra sa rogoca ko ira na lewe vuqa, era sa taubale e vanua mai na veikoro ka muri koya.

¹⁴ A sa lako mai ko Jisu, ka raici ira era sa lewe vuqa sara a sa lomani ira, a sa vakabulai ira na nodra era tauvimate.

¹⁵ Ia ni sa yakavi mai, sa lako mai vei koya ko ira na nona tisaipeli, ka kaya, Oqo na vanua lala, a sa kala na siga; mo vakatalai ira yani na le vuqa, me ra lako ki na veikoro lalai, me ra volia kina na kedra.

¹⁶ A sa kaya vei ira ko Jisu, E sega ni yaga me ra lako; mo dou solia mada e dua na kedra.

¹⁷ Era sa qai kaya vua, E sega ga vei keitou eke, e lima walega nai buli madrai, ka rua na ika.

¹⁸ A sa kaya ko koya, Dou kauta mai vei au.

¹⁹ Sa qai vosa ko koya vei ira na lewe vuqa me ra tiko sobu e na co, a sa taura nai buli madrai e lima, kei na ika e rua, a sa ta cake ki lomalagi, ka lotutaka, a sa dovia na veibuli madrai, ka solia vei ira na tisaipeli, ia ko ira na tisaipeli era sa solia vei ira na lewe vuqa.

²⁰ A ra sa kana kecega, a ra sa mamau: a ra sa tomika vata na vo ni ka sa dovi, a sa tinikarua nai su sa sinai kina.

²¹ Ia ko ira sa kana era sa lewe lima beka na udolu na tagane, ia ko ira na yalewa kei na gone era sa sega ni wili.

²² A sa qai vakarota sara ko Jisu vei ira na nona tisaipeli me ra vodoka na waqa, me ra liutaki koya ki tai kadua, me sa vakatalai ira mada yani na lewe vuqa ko koya.

²³ Ia ni sa vakatalai ira oti yani na lewe vuqa, sa cabe taudua ko koya ki na ulu-ni-vanua, me masu; ia ni sa yakavi mai, sa tiko duaduaga kina ko koya.

²⁴ A sa qai tiko eloma ni wasawasa na waqa, a suaigelegele e na ua: ni sa cagi leca.

²⁵ Ia e nai kava ni wase ni bogi sa lako vei ira ko Jisu, a sa lako voli e dela ni wai.

²⁶ Ia ni ra sa raica ko ira na tisaipeli, ni sa lako voli ko koya e dela ni wai, era sa kidroa, ka kaya, Sa dua na yalo; a ra sa qoqolou, ni ra sa rere.

²⁷ A sa vosa sara vei ira ko Jisu, ka kaya, Dou vakacegu; koi au ga; dou kakua ni rere.

²⁸ A sa vosa vei koya ko Pita, ka kaya, na Turaga, kevaka sai kemuni, kacivi au meu bau yani vei kemuni e dela ni wai.

²⁹ A sa kaya ko koya, Lako ga mai. Ia ni sa sobu mai waqa ko Pita, sa lako e na dela ni wai, me lako vei Jisu.

³⁰ Ia ni sa raica sa kaukauwa na cagi, sa qai rere; ia ni sa vakatekivu me lutu dromu, sa kaci sara, ka kaya, Na Turaga, ni vakabulai au.

³¹ Sa qai dodoka sara na ligana ko Jisu, a sa taura, ka kaya vua, O iko sa lailai na nomu vakabauta, o sa vakatitiqa e na vuku ni cava?

³² Ia ni rau sa vodo ki waqa, sa ruru na cagi.

³³ Ia ko ira sa tiko mai waqa, era sa lako mai ka cuva vua, ka kaya, Sa dina sara kemuni sa Luve ni Kalou.

³⁴ A ra sa lako ki tai kadua, a ra sa yaco ki na vanua ko Kenisareti.

³⁵ Ia ni ra sa kilai koya ko ira na tamata mai na yasana ko ya, era sa talatala ki na yasana kecega sa vakavolivolita, a ra sa kauti ira kecega mai vua era sa tauvi-mate;

³⁶ a ra sa masuti koya me ra tara walega na tutu ni nonai sulu; a ra sa bula sara ko ira kecega sa tara.