Maciu 13 - Vakavakadewa Makawa

A vosa vakatautauvata ni tamata dau kaburaki sila, kei na kenai balebale, 123, A sila vinaka kei na sila ca, 2430; kei na sore ni musita, 31,32; kei na leveni, 33. Ai balebale ni sila vinaka kei na sila ca, 3443. E vaka nai yau sa vuni tu na matanitu vakalomalagi, 44; e vaka na mata-ni-civa talei sara, 45,46; e vaka na lawa ni yavi, 4750. Sa tarabe e na vuku i Jisu ko ira na kai nona, 5358.

¹ E na siga ko ya sa lako tani mai vale ko Jisu, ka laki tiko sobu e matasawa.

² A sa lewe vuqa sara era sa soqoni vata vei koya, a sa vodoka kina e dua na waqa ko koya, ka tiko sobu: a sa tu kecega mai matasawa na lewe vuqa.

³ A sa levu na ka sa vosataka vei ira ko koya e na vosa vakatautauvata, ka kaya: Raica, sa dua na dauveikaburaki sa laki kabukaburaki;

⁴ ia ni sa kabukaburaki lako, sa lutu eso e na tutu ni sala, a sa lako mai na manumanu vuka ka kania.

⁵ A sa lutu eso ki na vanua veivatu, sa sega ni levu kina na qele: a sa tubu cake vakatotolo sara, ni sa sega ni vavaku na kena qele:

⁶ ia ni sa cabe na siga, sa malai; ia ni sa sega na wakana, sa raqosa sara.

⁷ A sa lutu eso ki na veiwa-vakavotona; a sa tubu cake na veiwa-vakavotona, ka vakaruguta.

⁸ A sa lutu eso ki na vanua vinaka, a sa vuavua vinaka, sa vuai drau eso, a sa onosagavulu eso, a sa tolusagavulu eso.

⁹ O koya sa vakadaligana me rogoca, me mani rogoca sara.

¹⁰ Sa qai lako mai ko ira na tisaipeli, ka tarogi koya, O sa vosa tikoga vei ira e na vosa vakatautauvata e na vuku ni cava?

¹¹ Sa qai vosa ko koya, ka kaya vei ira, Ni sa soli vei kemudou mo dou kila na veika vuni ni matanitu vakalomalagi, ia ka sega ga ni soli vei ira.

¹² Ni sa tu vua na tamata e dua na ka, ena qai soli vakalevu vua ka na levu na nona; ia na tamata sa sega ni tu vua e dua na ka, ena qai kau tani mai vua na ka sa tu vua.

¹³ O koya oqo kau sa vosa kina vei ira e na vosa vakatautauvata: ni ra sa raica ka sega ni kunea; a ra sa rogoca ka sega ni rogoca, ka lecava tu.

¹⁴ Ia sa vakayacori kina vei ira na parofisai i Aisea, ka vaka, Dou na daurogoca tikoga, ka lecava tu; Ia dou na dauraica tikoga, ka sega ni kunea;

¹⁵ Ni sa uro mai na lomadra na tamata oqo, A sa didivara na daligadra, A sa bobo na matadra; De dua na siga ena rai na matadra, Ka rogo na daligadra, Ka kila na lomadra, A ra saumaki mai, Ia kau na vakabulai ira.

¹⁶ A sa kalougata na matamudou, ni dou sa raica, kei na daligamudou, ni dou sa rogoca.

¹⁷ Niu sa kaya vakaidina vei kemudou, Era lewe vuqa na parofita kei na tamata yalododonu era a via raica na ka dou sa qai raica, ka ra a sega ni raica; ka rogoca na ka dou sa qai rogoca, ka ra a sega ni rogoca.

¹⁸ O koya mo dou qai rogoca na vosa vakatautauvata ni dauveikaburaki:

¹⁹ Ni sa dua e rogoca na vosa ni matanitu, ka lecava tiko, sa qai lako mai na vu-ni-ca, a sa kovea na ka sa kaburaki ki lomana. Sai koya oqo sa kaburaki e na tutu ni sala.

²⁰ Ia ko koya sa kaburaki e na vanua veivatu, sai koya oqo sa rogoca na vosa, a sa vakabauta sara e na reki:

²¹ ia ni sa sega na wakana e lomana, sa tu dede vakalailai ga: ia ni sa tubu na rarawa, se na veivakacacani e na vuku ni vosa, sa tarabe sara.

²² Ia ko koya sa kaburaki e na veiwa-vakavotona, sai koya oqo sa rogoca na vosa: ia na lomaocaoca e na vuku ni vuravura oqo, kei nai yau e dauveivakaisini, sa vakaruguta na vosa, a sa sega kina ni vua.

²³ Ia ko koya sa kaburaki e na vanua vinaka, sai koya oqo sa rogoca na vosa, a sa kila na kenai balebale; a sa vua, ka vuai drau eso, sa onosagavulu eso, sa tolusagavulu eso.

²⁴ Sa dua tale na vosa vakatautauvata sa tukuna vei ira ko koya, ka kaya, Sa vakatautauvatataki na matanitu vakalomalagi kei na dua na tamata sa kaburaka na sila vinaka e na nona were;

²⁵ ia ni ra sa moce ko ira na tamata, sa lako mai na nona meca ka kaburaka vata na sila ca e loma ni witi, a sa qai lako yani.

²⁶ Ia ni sa tubu mai na sila ka vua, sa qai rairai talega na sila ca.

²⁷ Sa qai lako mai vua na kenai taukei ko ira na nona tamata, ka kaya vua, O a sega saka li ni kaburaka na sila vinaka e na nomu were? sa qai kau maivei na sila ca?

²⁸ Sa qai kaya vei ira ko koya, A ka oqo sa kitaka e dua na meca. A ra sa kaya vua ko ira na tamata, O sa vinakata beka me keitou laki kumuna vata oqori?

²⁹ A sa kaya ko koya, Tei kakua mada, de dou cavuraka talega na witi ni dou kumuna vata na sila ca:

³⁰ laiva ga me rau tubu vata ruarua me tei cava mada na yabaki: ia ni sa cava na yabaki kau na kaya vei ira na dautamusuka, Dou kumuna vata mada na sila ca, ka vauca e na veivau me visa: ia dou kumuna vata na witi ki na noqu lololo.

³¹ Sa dua tale na vosa vakatautauvata sa tukuna vei ira ko koya, ka kaya, Sa tautauvata na matanitu vakalomalagi kei na dua na sore ni musita, o koya sa kauta e dua na tamata, ka tea e na nona were:

³² ia ko ya sa lailai sobu e na sore ni kau kecega; ia ni sa tubu cake, sa levu cake e na kena mataqali ko ya, a sa yaco me kau dina, a sa laki ro e na tabana na manumanu vuka.

³³ Sa dua tale na vosa vakatautauvata sa tukuna vei ira ko koya: Sa tautauvata na matanitu vakalomalagi kei na leveni, sa taura e dua na yalewa, ka vunia e loma ni madrai droka e tolu nai vakarau, me sa vakalevenitaki kece mada.

³⁴ Na ka kecega oqo sa tukuna ko Jisu kivei ira na lewe vuqa e na vosa vakatautauvata; a sa sega ni vosa walega vei ira, sa vosavakatautauvata tikoga:

³⁵ o koya oqo sa vakayacori kina na vosa sa tukuna na parofita, ni sa kaya, Au na vosa ga e na vosa vakatautauvata; Au na tukuna eso na ka sa vuni tu mai na gauna sa caka kina ko vuravura.

³⁶ Sa qai talai ira yani na le vuqa ko Jisu, ka curu ki vale: a sa lako mai vua ko ira na nona tisaipeli, ka kaya, Ni vakamacalataka mai vei keitou na vosa vakatautauvata ni sila ca mai na were.

³⁷ A sa vosa ko koya, ka kaya vei ira, O koya sa kaburaka na sila vinaka, ko ya na Luve ni tamata:

³⁸ ia na were ko vuravura; ia na sila vinaka ko ira na gone ni matanitu; ia na sila ca ko ira luve ni vu-ni-ca:

³⁹ ia na meca sa kaburaka sai koya na tevoro: ia na yabaki nai vakataotioti kei vuravura: ia na dautamusuka ko ira na agilose.

⁴⁰ Ia me vaka sa kumuni vata na sila ca ka visa e na buka; ena vakakina e nai vakataotioti kei vuravura oqo:

⁴¹ ena talai ira yani na nona agilose na Luve ni tamata, me ra soqona vata mai na nona matanitu na ka kecega sa dauveivakacalai, kei ira sa kitaka tiko na ka ca;

⁴² ia era na biuti ira ki na lovo ni buka waqa; era na dautagi kina, ka vakasequruquru bati.

⁴³ Era na qai serau na tamata yalododonu, me vaka na siga, e na matanitu nei Tamadra. O koya sa vakadaligana, me mani rogoca sara.

⁴⁴ Sa dua tale, sa tautauvata na matanitu vakalomalagi kei nai yau sa vuni tu e na dua na were; ka sa dua na tamata sa kunea, ka sega ni tukuna, ia ni sa rekitaka, sa laki volitaka na ka kecega sa tu vua, a sa volia na were ko ya.

⁴⁵ Sa dua tale, sa tautauvata na matanitu vakalomalagi kei na tamata dauveivoli, sa vakasaqara eso na mata-ni-civa vinaka:

⁴⁶ ia ni sa kunea e dua na mata-ni-civa talei sara, sa lako ka volitaka na ka kecega sa tu vua, ka sa volia na ka ko ya.

⁴⁷ Sa dua tale, sa tautauvata na matanitu vakalomalagi kei na lawa-ni-yavi, sa viritaki ki wai: a sa rawa kina eso mai na veimataqali kecega;

⁴⁸ ia ni sa sinai, era sa yavia ki matasawa, a ra sa tiko sobu, ka tugana na kena vinaka ki na sova, ka biuta tani na kena ca.

⁴⁹ Ena vakakina e nai vakataotioti kei vuravura: era na lako mai na agilose, ka tawasei ira tani na tamata ca maivei ira na yalododonu,

⁵⁰ ka biuti ira laivi tu ki na lovo ni buka waqa: era na dautagi kina, ka vakasequruquru bati.

⁵¹ Dou sa kila nai balebale ni ka kecega oqo? Era sa kaya vua, Io.

⁵² Sa qai kaya vei ira ko koya, Ia na vu-ni-vola kecega sa vakatavulici e na ka ni matanitu vakalomalagi, sa tautauvata kei na tamata sa taukena e dua na vale, ko koya sa kauta mai na nona lololo na veika vou kei na veika makawa talega.

⁵³ A sa yaco, ni sa vakaotia ko Jisu na vosa vakatautauvata kece oqo, sa lako tani maikea.

⁵⁴ Ia ni sa tadu ki na nona vanua, sa vakavulici ira ko koya e na nodra vale ni lotu, a ra sa kurabui kina, ka kaya, E rawata maivei ko koya oqo na vuku oqo, kei na cakacaka-mana oqo?

⁵⁵ sa sega li ni luve ni matai ko koya oqo? sa sega li ni yaca i tinana ko Meri? kei na tacina ko Jemesa, kei Josefa, kei Saimoni, kei Jutasa?

⁵⁶ kei na ganena, eratou sa sega li ni tiko vata kece kei keda? sa qai rawata maivei ko koya na ka kecega oqo?

⁵⁷ A ra sa tarabe e na vukuna. A sa kaya vei ira ko Jisu, Sa vakarokorokotaki na parofita e na veivanua tani, ia sa sega ga e na nona vanua, se nona vale.

⁵⁸ Ia ka sega ni cakava maikeri ko koya e vuqa na cakacaka-mana, ni ra sa sega ni vakabauta.