Maciu 12 - Vakavakadewa Makawa

Sa beitaki ira na tisaipeli ko ira na Farisi, e na vuku ni siga ni vakacecegu, a sa vakadonui ira ko Jisu, 1 8. Sa vakabula ko Jisu e dua na tamata e na siga ni vakacecegu, 9 13. Sa sega ni via rogo ko Jisu, 1421. Sa vakabula na tamata sa mataboko ka galu, 22. A sa tukuna ni sa cakava na ka mana e na kaukauwa ni Kalou, 2337. Sa vunauci ira eso ni ra sa sega ni vakabauta, 3845. Sa qai vakatakila na tamata era sa wekana dina, 4650.

¹ Ena gauna ko ya sa lako ko Jisu e loma ni veiwere ni sila e na siga ni vakacecegu; a sa viakana ko ira na nona tisaipeli, ka vakatekivu me doloka na veisola ni sila, ka kania.

² Ia ni sa raica ko ira na Farisi, era sa kaya vua, Raica, sa kitaka ko ira na nomu tisaipeli na ka e sega ni tara me caka e na siga ni vakacecegu.

³ A sa kaya vei ira ko koya, Dou sa sega beka ni wilika na ka sa kitaka ko Tevita, ni sa viakana, ko koya kei ira sa tiko vata kaya:

⁴ Ni sa curu ko koya ki na vale ni Kalou, ka kania na madrai dauraici, oqori sa sega ni tara vua me kania, se vei ira sa tiko vata kaya, vei ira duaduaga na bete?

⁵ Se dou a sega beka ni wilika e na vunau, ni ra sa vakacacana na siga ni vakacecegu ko ira na bete e na vale ni soro, ka ra sa sega ni cala kina?

⁶ Ia kau sa kaya vei kemudou, Sa dua eke sa uasivi cake e na vale ni soro.

⁷ Ia kevaka dou a kila na kenai balebale ni vosa oqo, Au sa vinakata na yalololoma, ka segai nai soro, dou a sega ni beitaki ira era sa sega ni cala.

⁸ Ni sa Turaga talega ni siga ni vakacecegu na Luve ni tamata.

⁹ A sa lako tani maikea ko koya, ka curu ki na nodra vale ni lotu:

¹⁰ ka raica, sa tiko kina e dua na tamata sa malai na ligana. A ra sa tarogi koya, Sa tara beka me ia na veivakabulai e na siga ni vakacecegu, se segai? ka ni ra via beitaki koya.

¹¹ A sa kaya vei ira ko koya, O cei vei kemudou, kevaka e dua na nona sipi sa lutu ki na davuke e na siga ni vakacecegu, ena sega ni laki taura, ka tubera cake mai?

¹² Ka vakaevei na kena uasivi cake na tamata e na sipi! O koya gona oqo sa tara kina me caka na ka vinaka e na siga ni vakacecegu.

¹³ Sa qai kaya ko koya vua na tamata, Dodoka mai na ligamu. A sa dodoka yani; a sa vakabulai, ka yaco me vaka na ligana kadua.

¹⁴ Sa ra qai curu ki tuba na Farisi, a ra sa bosea, se ra na vakamatei koya vakaevei.

¹⁵ Ia ni sa kila ko Jisu, sa lako tani maikea: a sa muri koya na lewe vuqa, ka sa vakabulai ira vakaaduaga ko koya:

¹⁶ ka sa vakarota vei ira me ra kakua ni tukuni koya:

¹⁷ o koya oqo sa vakayacori kina na vosa sa tukuna ko Aisea na parofita, ka kaya,

¹⁸ Raica na noqu i talatala, ko koya kau a digitaka; Na noqu gone ni toko, au sa vinakati koya vakalevu e na vu ni lomaqu: Au na solia vei koya na noqu Yalo Tabu, Ia ena tukuna ko koya na lewa dodonu vei ira na veimatanitu tani:

¹⁹ Ena sega ni veileti, se domolevu; Ena sega e dua ena rogoca na domona e na saqata-ni-koro:

²⁰ Ena sega ni musuka na gasau sa bibivoro ko koya, Se bokoca na wa-ni-cina e kubou walega, Ka me tala mada yani na lewa dodonu me gumatua:

²¹ A ra na vakararavi ki na yacana ko ira na veimatanitu tani.

²² Sa qai kau mai vei koya e dua sa curuma e dua na tevoro, sa mataboko, ka galu talega: a sa vakabulai koya ko koya, ia sa vosa ka rai kina ko koya sa mataboko ka galu.

²³ A sa kurabui ko ira kecega na lewe vuqa, ka kaya, O koya oqo na luve i Tevita, se segai?

²⁴ Ia ni ra sa rogoca ko ira na Farisi, era sa kaya, O koya oqo e sega ni vakasevi ira na tevoro e na ka tani, e na kaukauwa ga i Pielisipupi na nodra turaga na tevoro.

²⁵ A sa kila na nodra vakanananu ko Jisu, ka kaya vei ira, A matanitu yadua sa veisei vakai koya, ena vakarusai; kei na koro yadua se na vale sa veisei vakai koya, ena sega ni tu dei.

²⁶ Ia kevaka sa vakasevi Setani ko Setani, sa qai veisei vakai koya; ena qai tu dei vakaevei na nona matanitu?

²⁷ Ia kevaka kau vakasevi ira na tevoro e na kaukauwa i Pielisipupi, sa vakasevi ira e na kaukauwa i cei ko ira na kai nomudou? o koya oqo era na vakalewai kemudou kina.

²⁸ Ia kevaka kau vakasevi ira na tevoro e na kaukauwa ni Yalo ni Kalou, sa qai yaco dina vei kemudou na matanitu ni Kalou.

²⁹ Se na rawata vakaevei e dua me curuma na vale ni qaqa, me kovea na nonai yaya, kevaka ena sega ni vesuka mada na qaqa? ena qai kovea emuri na nonai yau.

³⁰ O koya sa sega ni totaki au, sa to tani; ia ko koya sa sega ni kumuna vata vei au, sa duibiubiuta.

³¹ O koya oqo, kau sa kaya kina vei kemudou, Sa rawa me ra kakua ni cudruvi na tamata e na vuku ni nodra i valavala ca, kei na nodra vosa ca kecega; ia sa sega ni rawa me ra kakua ni cudruvi na tamata era sa vosavakacacataka na Yalo Tabu.

³² Ia ko koya yadua sa vosavakacacataka na Luve ni tamata ena rawa me kakua ni cudruvi kina: ia ko koya yadua sa vosavakacacataka na Yalo Tabu, ena sega sara ni rawa me kakua ni cudruvi, e na gauna oqo, se na gauna ena muri mai.

³³ Dou vakalewa ni vinaka na kau, ka vinaka talega kina na vuana: se vakalewa ni ca na kau, ka ca talega kina na vuana: ni sa kilai na kau e na vuana.

³⁴ Oi kemudou na kawa ni gata! dou na rawata vakaevei, ni dou sa tamata ca, mo dou vosataka na ka vinaka? ni sa vosataka na gusuda na ka sa oso vakalevu kina na lomada.

³⁵ A tamata vinaka sa kauta mai na ka vinaka mai na lololo vinaka ni lomana; kei na tamata ca sa kauta mai na ka ca mai na lololo ca.

³⁶ Ia kau sa kaya vei kemudou, A vosa ca vakaaduaga era na cavuta na tamata, era na tarogi kina e na siga ni lewa:

³⁷ ni ko na vakadonui e na vuku ni nomu vosa, ka ko na cudruvi e na vuku ni nomu vosa.

³⁸ Sa qai vosa eso na vunivola kei na Farisi, ka kaya, Vakavuvuli, keitou sa via raica e dua nai vakatakilakila maivei iko.

³⁹ A sa vosa ko koya, ka kaya vei ira, Sa dauvakasaqara nai vakatakilakila nai tabatamata ca kai valavala vakatani: ia ena sega nai vakatakilakila me soli kina, nai vakatakilakila ga i Jona na parofita:

⁴⁰ ia me vaka ka siga tolu ka bogi tolu ko Jona e na kete ni ika levu; ena siga tolu ka bogi tolu vaka talega kina na Luve ni tamata e na loma ni qele.

⁴¹ Era na tu cake e na veilewai na kai Ninive ka vakadinadinataka na nodra cala nai tabatamata oqo, ni ra a veivutuni e na vunau i Jona; ka raica, sa dua eke sa uasivi vei Jona.

⁴² Ena tu cake na radi ni ceva e na veilewai ka vakadinadinataka na nodra cala nai tabatamata oqo, ni sa lako mai ko koya mai na yasana vakayawa sara e vuravura me rogoca na vuku i Solomoni; ka raica sa dua eke sa uasivi vei Solomoni.

⁴³ Ia ni sa lako tani e na tamata na yalo velavela, sa veilakoyaki voli e na vanua dravuisiga, ni vakasaqara nai vakavakacegu a sa sega ni kunea:

⁴⁴ sa qai kaya ko koya, Au na lesu tale ki na noqu vale kau a lako tani maikina; ia ni sa tadu, sa kunea ni sa lala tu, sa tataviraki, ka vakaiukuukutaki.

⁴⁵ Sa qai lako ko koya, ka kauta vata kaya e lewe vitu tale na yalo sa uasivi vei koya e na ca, a ratou sa curuma, ka tiko kina; a sa ca vakalevu emuri na tamata ko ya, ka ca vakalailai eliu. Ena vaka talega kina vei ira nai tabatamata ca oqo.

⁴⁶ Ia ni sa vosa tikoga ko koya vei ira na lewe vuqa, raica, sa tu e tautuba na tinana kei na tacina, eratou sa via vosa vua.

⁴⁷ Sa qai kaya vua e dua, Raica, sa tu e tautuba na tinamu kei iratou na tacimu, eratou sa via vosa vei iko.

⁴⁸ Sa qai vosa ko koya, ka kaya vei koya sa tukuna vua, O cei na tinaqu? se ko cei ko iratou na taciqu?

⁴⁹ A sa dodoka na ligana kivei ira na nona tisaipeli, ka kaya, Raica na tinaqu kei ira na taciqu!

⁵⁰ ko koya yadua ena kitaka na loma i Tamaqu sa tiko mai lomalagi, sai koya oqo na taciqu, kei na ganequ, kei na tinaqu.