Maciu 11 - Vakavakadewa Makawa

Sa mai tarogi Jisu e lewe rua na tisaipeli i Joni na dauveipapitaiso se sai koya na Karisito se segai, a sa tukuna ko Jisu ni sai koya, 1 6. Sa qai tukuni Joni ko Jisu, 7 15. Sa vunauci ira na kai Jutia ni ra sa beitaki Joni kei koya talega, 1619. Sa vunauci ira vakalevu na kai Koresini kei Peciseita, kei Kapenaumi, 2024. Sa qai vakavinavinaka vei Tamana ni sa vakavulici ira sa vinakata ko koya, 2527. Sa kaya me vakararavi vei koya ko ira sa via vakacegui, 2830.

¹ Ia ko Jisu ni sa vakaotia na nona vakaroti ira na nona tisaipeli e lewe tinikarua, sa lako tani maikea, ka laki vakatavuvuli ka vunau e na nodra veikoro.

² Ia ni sa rogoca ko Joni mai na vale ni veivesu na cakacaka i Karisito, sa qai tala e lewe rua na nona tisaipeli,

³ me kaya vua, O iko beka ko Koya e lako mai, se da waraka e dua tani?

⁴ A sa vosa ko Jisu, ka kaya vei rau, Drau lako, ka tukuna vei Joni na veika drau sa rogoca ka raica:

⁵ Era sa rai na mataboko, ka lako na lokiloki; sa vakasavasavataki na vukavuka, ka rogo rawa na didivara; sa vakaturi cake tale na mate sara, a sa vunautaki nai tukutuku-vinaka vei ira na dravudravua.

⁶ A sa kalougata ko koya ena sega ni tarabe e na vukuqu.

⁷ Ia ni rau sa lako tani, sa kaya ko Jisu vei ira na lewe vuqa e na vuku i Joni, A cava dou a lakova ki na veikau mo dou raica? a gasau li sa yavalati e na cagi?

⁸ ia ka cava dou a lakova mo dou raica? a tamata li sa vakaisulu e nai sulu malumalumu? raica, ko ira sa vakaisulu e nai sulu malumalumu, era sa tiko e na nodra veivale na tui.

⁹ Ia ka cava dou a lakova mo dou raica? a parofita li? io, au sa kaya vei kemudou, e dua sa uasivia na parofita.

¹⁰ Ni sai koya ka volai vakaoqo, Raica, au sa tala na noqu talai me liu e matamu, Ena caramaka ko koya na nomu sala e matamu.

¹¹ Au sa kaya vakaidina vei kemudou, Sa sega ni tubu e dua vei ira sa sucu mai na yalewa me uasivi vei Joni na dauveipapitaiso; ia ko koya sa lailai sara e na matanitu vakalomalagi sa uasivi vei koya.

¹² Ia mai na gauna i Joni na dauveipapitaiso ka yacova na siga oqo, sa rawa na matanitu vakalomalagi e na gugumatua, ia ko ira sa gumatua sara, era sa taukena.

¹³ Ni ra sa dauvakatavuvuli kecega na parofita kei na vunau ka yacova na siga i Joni.

¹⁴ Ia kevaka dou sa via vakabauta, sai koya oqo ko Ilaija, ko koya sa dodonu me lako mai.

¹⁵ O koya sa vakadaligana me rogoca, me mani rogoca sara.

¹⁶ Ia ka cava meu vakatautauvatataka kina nai tabatamata oqo? Sa tautauvata kei ira na gone sa tiko e na rara ni veivoli, ka kaci yani vei ira era sa tiko vata kei ira,

¹⁷ ka kaya, Keitou a uvu bitu vei kemudou, ka dou a sega ni meke; keitou a tagi vei kemudou, ka dou a sega ni tagiyaso.

¹⁸ Ni sa lako mai ko Joni ka sega ni daukana se daugunu, a ra sa kaya, Sa tiko vua e dua na tevoro.

¹⁹ Sa lako mai na Luve ni tamata, a sa kana ka gunu, a ra sa kaya, Raica, a tamata daukana ka daugunu waini, a nodra i tau era kumuna nai vakacavacava, kei ira na tamatai valavala ca. Ia sa vakadonuya na vuku ko ira na luvena.

²⁰ Sa qai vakatekivu ko koya me vunauca na veikoro ka ia kina e vuqa na nona cakacaka mana, ni ra sa sega ni veivutuni:

²¹ E ca vei iko, Koresini! e ca vei iko, Peciseita! ke sa caka mai Taia kei Saitoni na veika-mana ka caka vei kemudrau, ke rau sa veivutuni makawa e nai sulu taga kei na dravusa:

²² au sa kaya talega vei kemudrau, Ena ca vakalailai ko Taia kei Saitoni e na siga ni lewa, koi kemudrau, drau na ca vakalevu.

²³ O iko talega, Kapenaumi, ko sa laveti cake ki lomalagi? ko na biu sobu tale ki etesi: ia ke sa caka mai Sotoma na veika-mana ka caka vei iko, ke sa tu ga ka yacova na siga oqo.

²⁴ Au sa kaya talega vei iko, Ena ca vakalailai ko Sotoma e na siga ni lewa, ko iko, ko na ca vakalevu.

²⁵ E na gauna ko ya sa vosa kina ko Jisu, ka kaya, Au sa vakavinavinaka vei kemuni Tamaqu, na Turaga ni lomalagi kei vuravura, ni kemuni sa vunia na veika oqo vei ira na vuku kei na yalomatua a sa vakatakila ga vei ira na gone lalai:

²⁶ sai koya ga, Tamaqu, ni sa vinaka e matamuni me vakaoqo.

²⁷ Sa solia mai vei au ko Tamaqu na ka kecega: ia ka sega e dua tale e kila na Luvena, a Tamana duaduaga, se dua tale e kila na Tamana, a Luvena duaduaga, kei koya sa vinakata na Luvena me vakatakilai koya vua.

²⁸ Dou lako mai vei au, koi kemudou vakaaduaga sa oca ka colata nai colacola bibi, ia kau na vakacegui kemudou.

²⁹ Vakataqara vei kemudou na noqu i vua, ka vuli vei au, niu sa yalomalua ka yalomalumalumu: dou na kunea kina na vakacegu ni yalomudou.

³⁰ Ni sa rawarawa na noqu i vua, ka mamada na noqu i colacola.