Maciu 1 - Vakavakadewa Makawa

Ai tubutubu i Jisu, 117. A nona sucu mai vua na goneyalewa, 1825.

¹ Ai vola ni tubutubu i Jisu Karisito, na luve i Tevita, na luve i Eparaama.

² A tama i Aisake ko Eparaama; ka tama i Jekope ko Aisake; ka tama i Juta kei iratou na tuakana kei iratou na tacina ko Jekope;

³ ka tama i Feresi kei Sera ko Juta, a tinadrau ko Tema; ka tama i Esiromi ko Feresi; ka tama i Erami ko Esiromi;

⁴ ka tama i Aminatapi ko Erami; ka tama i Nasoni ko Aminatapi; ka tama i Salimoni ko Nasoni;

⁵ ka tama i Poasi ko Salimoni, a tinana ko Reapi; ka tama i Opeti ko Poasi, a tinana ko Ruci; ka tama i Jese ko Opeti;

⁶ ka tama i Tevita na tui ko Jese. Ka tama i Solomoni ko Tevita na tui, a tinana ko koya ka wati i Uraia eliu;

⁷ ka tama i Riopoami ko Solomoni; ka tama i Epaia ko Riopoami; ka tama i Asa ko Epaia;

⁸ ka tama i Josafati ko Asa; ka tama i Jorami ko Josafati; ka tama i Usaia ko Jorami;

⁹ ka tama i Jocami ko Usaia; ka tama i Aasi ko Jocami; ka tama i Esekaia ko Aasi;

¹⁰ ka tama i Manasa ko Esekaia; ka tama i Emoni ko Manasa; ka tama i Josaia ko Emoni;

¹¹ ka tama i Jekonaia kei iratou na wekana ko Josaia, ni sa yaco na gauna era kau yani kina ki Papiloni.

¹² Ia ni ra sa kau dina ki Papiloni, sa qai sucu ko Salacieli, a tamana ko Jekonaia; ka tama i Serupapeli ko Salacieli;

¹³ ka tama i Epiuta ko Serupapeli; ka tama i Elaiakimi ko Epiuta; ka tama i Asori ko Elaiakimi;

¹⁴ ka tama i Setoki ko Asori; ka tama i Akeimi ko Setoki; ka tama i Iliuta ko Akeimi;

¹⁵ ka tama i Eliesa ko Iliuta; ka tama i Macani ko Eliesa; ka tama i Jekope ko Macani;

¹⁶ ia ko Jekope na tama i Josefa na wati i Meri, ko koya sa sucu mai vua ko Jisu, ko koya sa vakatokai ko Karisito.

¹⁷ Sa qai mani tinikava nai tabatamata kecega sa vakatekivu vata kei Eparaama ka yacovi Tevita; ia sai tabatamata e tinikava ko ira sa vakatekivu vata kei Tevita ka yacova na kena kau yani ki Papiloni; ia sai tabatamata e tinikava ko ira sa vakatekivu vata kei na kena kau yani tiko ki Papiloni ka yacova na Karisito.

¹⁸ Ia sa vakaoqo na sucu i Jisu Karisito: Sa musu eliu ko Meri na tinana vei Josefa, ia ni rau sa sega mada ni veiyacovi, sa votu na nona bukete mai vua na Yalo Tabu.

¹⁹ Ia sa yalododonu ko Josefa na watina, a sa sega ni via vakavotuya, sa lomana ga me biuta vuni.

²⁰ Ia ni sa vakananuma tiko ko koya na ka oqo, sa qai dua na agilose ni Turaga sa rairai mai vua e na tadra, ka kaya, I Josefa, na luve i Tevita, kakua ni rere ni kauta vei iko na watimu ko Meri: ka ni sa tubu mai vua na Yalo Tabu na ka sa kunekunetaka:

²¹ ia ena vakasucuma ko koya e dua na gonetagane; ia mo vakayacani koya ko JISU; ka ni sai koya ga ena vakabulai ira na nona tamata mai na nodra i valavala ca.

²² Ia sa yaco kecega oqo, me vakayacori kina na vosa ni Turaga ko ya sa tukuna na parofita, ka kaya,

²³ Raica ena bukete e dua na goneyalewa, ka na vakasucuma e dua na gonetagane, Ka na vakayacani ko Imanueli: a kenai balebale, Na Kalou ka tiko vata kei keda.

²⁴ Ia sa yadra mai ko Josefa ka sa qai laki kitaka na ka ka kaya vua na agilose ni Turaga, a sa kauta vua na watina:

²⁵ a rau sa sega ni veiyacovi, sa sucu mada na nona ulumatua na gonetagane; a sa vakayacani koya ko JISU.