Luke 9 - Vakavakadewa Makawa

Sa talai ira na nona tisaipeli ko Jisu me ra cakava na ka-mana eso, ka vunautaka nai tukutuku-vinaka, 1—6. Sa via raici Jisu ko Eroti, 7—9. Sa vakani ira na lewe vuqa ko Jisu, 10—17. Sa vakavulici ira na nona tisaipeli, 18—27. Sa matalia na yagona, 28—36. Sa vakabula e dua sa curumi, 37—43. Sa vosa vei ira na nona tisaipeli, 44—50. Sa tukuna na ka me ra cakava era sa muri koya, 51—62.

¹ Sa qai kacivi ira mai na nona tisaipeli e lewe tinikarua me ra soqoni vata, a sa solia vei ira na lewe kei na kaukauwa vei ira kecega na tevoro, me ra vakabula talega na mate;

² a sa talai ira ko koya me ra vunautaka na matanitu ni Kalou, ka vakabulai ira sa tauvi-mate.

³ A sa kaya vei ira ko koya, Kakua ni kauta e dua na ka e gau-ni-sala, kakua nai titoko, se na taga ni vaqa, se na madrai, se nai lavo; se yarua na nomudoui curucuru.

⁴ Ia na vale kecega dou na curu kina, dou tiko ga kina, ka cavu tu yani maikina.

⁵ Ia ko ira vakaaduaga ena sega ni vakacegui kemudou, ni dou sa lako tani e na koro ko ya, kuretaka sara na kuvu-ni-soso mai na yavamudou, mei vakatakilakila vei ira.

⁶ A ra sa lako yani, ka lako ki na veikoro lalai, ka vunautaka nai tukutuku-vinaka, ka ia na veivakabulai e na veiyasana kecega.

⁷ A sa rogoca ko Eroti na turaga na ka kecega sa caka: a sa kidroa kina, ni sa kaya eso, Sa tu cake tale mai na mate ko Joni;

⁸ ka so, Sa rairai mai ko Ilaija; ka so tale, Sa tu cake tale e dua vei ira na parofita eliu.

⁹ A sa kaya ko Eroti, Au a tamusuka na ulu i Joni: ia ko cei beka oqo, au sa rogoca kina na veika vakaoqo? A sa via raici koya.

¹⁰ Ia ko ira nai apositolo, ni ra sa lesu tale mai, era sa tukuna vua na ka kecega era sa kitaka. A sa kauti ira ko koya, ka lako vakatikitiki ki na dua na vanua lala sa voleka ki na koro na yacana ko Peciseita.

¹¹ Ia ko ira na lewe vuqa, ni ra sa kila, era sa muri koya; a sa vakacegui ira ko koya, a sa vosataka vei ira na ka ni matanitu ni Kalou, a sa vakabulai ira era sa sega ni bula vinaka.

¹² Ia ni sa kala na siga, sa lako mai ko ira na lewe tinikarua, ka kaya vua, Vakatalai ira tani na lewe vuqa, me ra lako ki na veikoro lalai kei na veiyasana sa vakavolivoliti keda, me ra moce, ka qara na kedra: ni da sa tiko eke e na vanua lala.

¹³ A sa kaya vei ira ko koya, Dou solia vei ira me ra kana. A ra sa kaya, Sa sega na ka vei keitou, e lima walega nai buli madrai ka rua na ika; kevaka keitou sega ni laki voli kakana me kedra kecega na lewe vuqa oqo.

¹⁴ Ni ra sa lewe lima beka na udolu na tagane. A sa kaya vei ira na nona tisaipeli ko koya, Kaya me ra tiko sobu me vakayayalimasagavulu me tiko vata.

¹⁵ A ra sa kitaka vakakina, ka ra vakatikori ira sobu kecega.

¹⁶ Sa qai taura ko koya nai buli madrai e lima kei na ika e rua, a sa ta cake ki lomalagi, ka lotutaka, ka dovia, ka solia vei ira na tisaipeli me ra tauca vei ira na lewe vuqa.

¹⁷ A ra sa kana, ka sa mamau kecega: a sa tomitomiki vata na vo ni kedra, a sa tinikarua nai su.

¹⁸ A Sa tiko duaduaga ko koya ka masu, ka tiko talega kaya ko ira na tisaipeli: a sa tarogi ira ko koya, ka kaya, Era sa kaya ko ira na tamata se ko cei koi au?

¹⁹ A ra sa vosa, ka kaya, Ko Joni na dauveipapitaiso; ia ka so, era kaya, Ko Ilaija; ia ka so tale era kaya, Sa tu cake tale mai e dua vei ira na parofita eliu.

²⁰ Sa qai kaya vei ira ko koya, Ia dou sa kaya koi kemudou se ko cei koi au? Sa vosa ko Pita, ka kaya, Na Karisito ni Kalou.

²¹ A sa vakadreta vei ira ko koya, ka vakarota me ra kakua ni tukuna na ka oqo vua e dua:

²² ka sa kaya, sa kilikili kaya na Luve ni tamata me vosota na ka e vuqa, me ra biuti koya talega ko ira na qase, kei ira na bete levu, kei ira na vunivola, ka me vakamatei ko koya, ka vakaturi cake tale mai e nai katolu ni siga.

²³ A sa kaya vei ira kecega, Kevaka e dua sa via muri au, me kakua ni muria na lomana, ia me colata ga na nona kauveilatai e na veisiga, ka muri au.

²⁴ Ia ko koya yadua sa via maroroya na nona bula, ena vakayalia; ia ko koya ena vakayalia na nona bula e na vukuqu, ena maroroya.

²⁵ Ia ka cava na kena yaga vua na tamata, kevaka e rawati vuravura kece, ka vakayali koya vakai koya ga, se sa biu tani?

²⁶ Ia ko koya yadua ena maduataki au kei na noqu vosa, ena maduataki koya na Luve ni tamata, ni na lako mai e na nonai ukuuku, kei nai ukuuku nei Tamana, kei na nodrai ukuuku na agilose yalosavasava.

²⁷ Ia ka’u sa kaya vakaidina vei kemudou, Sa tu ga eke eso, era na sega mada ni mate, era na raica eliu na matanitu ni Kalou.

²⁸ Sa oti na vosa oqo ka bogi walu beka, sa qai kauti Pita kei Joni kei Jemesa ko koya, ka lako cake ki na ulu-ni-vanua me masu.

²⁹ Ia ni sa masu tiko ko koya, sa matalia na matana, a sa vulavula ka lumilumisa na nonai sulu.

³⁰ Ka raica, e le rua na tamata sa veivosaki kaya, koi rau ko Mosese kei Ilaija;

³¹ erau sa rairai mai enai ukuuku, ka rau vosataka na nona ciba ena vakayacora ko koya mai Jerusalemi.

³² A sa biti Pita kei rau ka tiko kaya na via moce: ia ni ratou sa yadra sara, eratou sa raica na nonai ukuuku, kei rau na tamata eratou sa tu vata kaya.

³³ Ia ni rau sa lako tani tiko vua, sa kaya vei Jisu ko Pita, Kemuni na Turaga, sa vinaka na nodatou tiko eke: ia me keitou tara e tolu na vale vakacevaceva: e dua me nomuni, ka dua me nei Mosese, ka dua me nei Ilaija: ni sa sega ni kila na ka sa kaya.

³⁴ Ia ni sa vosa tiko vakaoqo, sa dua na o sa lako mai, ka vakarurugi iratou: a ratou sa rere ni ratou sa curu ki na o.

³⁵ A sa rogo e dua na vosa mai na o, ka kaya, Oqo na noqu Gone ni toko: dou rogoci koya.

³⁶ Ia ni sa oti na vosa, sa kune duaduaga ko Jisu. A ratou sa vunia ga, ka sega ni tukuna vua e dua e na gauna ko ya e dua na ka eratou a raica.

³⁷ Ia e na mataka, ni ratou sa lako sobu mai na ulu-ni-vanua, era lewe vuqa sara sa veitavaki kaya.

³⁸ Ka raica, sa dua vei ira na lewe vuqa sa kaci cake, ka kaya, Vakavuvuli, au masuti kemuni, mo ni mai raica na luvequ-tagane; ni sa luvequ e dua bauga:

³⁹ ka raica, sa dua na yalo sa tauri koya a sa qoqolou vakasauri kina; a sa bitabitalaki koya, ka sa qai tuburaki vuso, a sa vakamavoataka ka dredre ni lako tani vua;

⁴⁰ ia ka’u a masuti ira na nomu tisaipeli me ra vakasevi koya tani; a ra sa sega ni rawata.

⁴¹ A sa vosa ko Jisu, ka kaya, Ai tabatamata sa sega ni vakabauta ka yalo vakatani! a cava na kena dede me’u tiko kei kemudou, ka vosoti kemudou? kauta na luvemu mai kike.

⁴² Ia ni sa lako tiko mai ko koya, sa vakabalea na tevoro, ka bitabitalaka. A sa vunauca na yalo velavela ko Jisu, a sa vakabula na gone, a sa solia tale vei tamana.

⁴³ A ra sa kurabui kecega e na kaukauwa levu ni Kalou. Ia ni ra sa kurabui kecega e na vuku ni ka kecega sa cakava ko Jisu, sa kaya vei ira na nona tisaipeli ko koya,

⁴⁴ Me lutu sobu ki na daligamudou na vosa oqo: ni na soli yani na Luve ni tamata ki na ligadra na tamata.

⁴⁵ A ra sa sega ni kila na vosa ko ya, sa vuni vei ira, ka ra sa lecava: ka ra sa rere ni tarogi koya e na vosa ko ya.

⁴⁶ Sa qai tubu vei ira na veileti, se ko cei vei ira ena uasivi cake.

⁴⁷ Ia ni sa raica ko Jisu na nanuma ni yalodra, sa kauta e dua na gone lailai, ka vakatura e tikina,

⁴⁸ a sa kaya vei ira, O koya yadua sa vinakata na gone lailai oqo e na vuku ni yacaqu, sa vinakati au: ia ko koya yadua sa vinakati au, sa vinakati koya sa talai au mai: ni na uasivi cake ko koya sa lailai sara vei kemudou kecega.

⁴⁹ Sa qai vosa ko Joni, ka kaya, Kemuni na Turaga, keitou sa raica e dua sa vakaseva tani na tevoro eso e na yacamuni; ka keitou sa tarova, ni sa sega ni muri keda.

⁵⁰ A sa kaya vua ko Jisu, Kakua ni tarova, ni sa nodai to ko koya sa sega ni noda meca.

⁵¹ Ia ni sa yaco dina na gauna me kau cake kina ko koya, sa vaqara matua na matana me lako vaka ki Jerusalemi.

⁵² A sa tala eso na tamata me ra liu e matana: a ra sa lako ka curu ki na dua na nodra koro lailai na kai Samaria, me ra vakarautaka na kena.

⁵³ A ra sa sega ni vakacegui koya, e na vuku ni sa vaqara na matana vaka ki Jerusalemi.

⁵⁴ Ia ni sa raica koi rau na nona tisaipeli ko Jemesa kei Joni, erau sa kaya, Na Turaga, ko ni sa vinakata me keirau kaya me lutu sobu mai lomalagi na bukawaqa, me vakamai ira?

⁵⁵ A sa vuki ko koya, ka vunauci rau, ka kaya, Drau sa sega ni kila nai valavala ni yalomudrau:

⁵⁶ ni sa sega ni lako mai na Luve ni tamata me vakamatei ira na tamata, me vakabulai ira ga. A ra sa lako ki na dua tani na koro lailai.

⁵⁷ Ia ni ra sa lako tu e na sala, sa dua e kaya vei koya, Kemuni na Turaga, au na muri kemuni ki na veiyasana ko ni na lako kina.

⁵⁸ Sa qai kaya vua ko Jisu, Sa vaqara na fokise, a sa vakairoro na manumanu vuka; ia na Luve ni tamata, sa sega vua na tikina me vakadavora kina na uluna.

⁵⁹ A sa kaya ko koya vua e dua tale, Muri au. A sa kaya ko koya, Kemuni na Turaga, laivi au me’u lako mada ka buluti tamaqu.

⁶⁰ A sa kaya vua ko Jisu, Biuta na mate me ra buluta na nodra mate; ia ko iko, mo laki vunautaka na matanitu ni Kalou.

⁶¹ A sa dua tale sa kaya, Kemuni na Turaga, au na muri kemuni; ia mo ni biuti au ga me’u lako mada me’u veitatau vei ira mai neitou.

⁶² A sa kaya vua ko Jisu, E sega e dua na tamata sa taura nai siviyara ka qai rai kimuri, me yaga e na matanitu ni Kalou.