Luke 8 - Vakavakadewa Makawa

Sa lako ki na veikoro ko Jisu me vunau, 1—3. A vosa vakatautauvata ni sila, 4—15. Sa yaga na vuku ni da vakavulici ira na lialia, 16—18. Sa tukuna ko Jisu se ko cei sa wekana dina, 19—21. Sa vakabulai ira na nona tisaipeli e na cava e loma ni wai, 22—25. Sa vakaseva na tevoro eso, 26—40. Sa vakabula na turidrabalavu, kei na goneyalewa sa ciba, 41—46.

¹ Sa oti, sa qai lako voli emuri ko koya e na veikoro kecega kei na veikoro lalai kecega, ka vunau, ka tukuna nai tukutuku-vinaka ni matanitu ni Kalou; kei ira vata kaya na lewe tinikarua,

² kei na yalewa eso, sa vakabulai oti mai na yalo ca eso ka curumi ira kei na malumalumu, ko Meri sa vakatokai na yalewa ni Makitala, sa lako tani oti vua e vitu na tevoro,

³ kei Joana na wati i Kusa na matanivanua nei Eroti, kei Susana, ka lewe vuqa tale, era sa qaravi koya e na nodrai yau.

⁴ Ia ni sa lewe vuqa sara era sa soqoni vata, ka sa lako mai vei koya mai na veikoro, sa vosataka na vosa vakatautauvata ko koya:

⁵ Sa dua na dauveikaburaki sa laki kaburaka na nona sore ni sila; ia ni sa kaburaka lako, sa lutu eso e na tutu ni sala; a sa butubutuki sobu, a ra sa mai kania na manumanu vuka.

⁶ A sa lutu eso ki na vatu; a sa tubu cake, ka qai raqosa sara, ni sa sega ni suasua.

⁷ A sa lutu eso ki na loma ni veiwa-vakavotona; a sa tubu cake kaya na veiwa-vakavotona, ka vakaruguta.

⁸ A sa lutu eso ki na vanua vinaka, a sa tubu cake ka vuataka e drau na vuana. Ni sa vosataka oti ko koya na veika oqo, sa kacivaka, O koya sa vakadaligana me rogoca, me mani rogoca sara.

⁹ A sa tarogi koya ko ira na nona tisaipeli, ka kaya, A cava beka nai balebale ni vosa vakatautauvata oqo?

¹⁰ A sa kaya ko koya, Sa soli vei kemudou mo dou kila na veika vuni ni matanitu ni Kalou; ia sa nodra na tani na vosa vakatautauvata ga; me ra raica ka sega ni raica; ka rogoca ka sega ni kila.

¹¹ Ia na vosa vakatautauvata sa vakaoqo: A sila, na vosa ni Kalou.

¹² Ia ko ira era vaka na tutu ni sala, ko ira era sa rogoca; sa qai lako mai na tevoro, a sa kauta tani na vosa mai na yalodra, de ra vakadinata ka bula kina.

¹³ Ia ko ira era vaka na vatu, sai ira sa rogoca, ka vakabauta na vosa e na reki; ia sa sega na wakadra, a ra sa vakadinata vakadede vakalailai ga, ia ni sa yaco na gauna ni dauveretaki era sa bale tale.

¹⁴ Ia ko koya sa lutu ki na veiwa-vakavotona, sai ira era sa rogoca, a ra sa lako yani, a ra sa vakaruguti e na lomaocaoca kei nai yau kei na marau ni bula, oqo a sa sega kina ni vua dina.

¹⁵ Ia ko koya e na vanua vinaka, sa vakai ira era sa yalodina ka vinaka, a ra sa rogoca na vosa, ka taura deivaka, ka vakavuana tikoga.

¹⁶ Sa sega na tamata sa tutuvaka na cina, ka qai laki ubia e na rubu, se viritura e ruku ni mocemoce; sa viritura ga e na kenai tutu, me ra raica na kena rarama ko ira sa curu mai.

¹⁷ Ni sa sega e dua na ka sa vuni, me sega ni vakarairaitaki; se tabogo, me sega ni kilai se vakavotui mai.

¹⁸ O koya mo dou qai qarauni kemudou, e na nomudou rogoca; ni sa dua na ka sa tu vua na tamata, ena qai soli vua; ia na tamata sa sega ni tu vua e dua na ka, ena qai kau tani mai vua na ka sa nanuma sa tu vua.

¹⁹ Sa qai lako mai vua na tinana kei iratou na tacina, a ratou sa sega ni toro rawa vua e na vukudra na lewe vuqa.

²⁰ A sa tukuna vua ko iratou eso, ka kaya, Sa tu etautuba na tinamu kei iratou na tacimu, eratou sa via raici iko.

²¹ A sa vosa ko koya, ka kaya vei ira, A tinaqu kei na taciqu ko ira oqo era sa rogoca na vosa ni Kalou, ka cakava.

²² Ia sa dua na siga oqori, sa vodoka ko koya e dua na waqa, kei ira talega na nona tisaipeli; a sa kaya vei ira ko koya, Tou lako ki tai kadua ni drano. A ra sa lako yani.

²³ Ia ni ra sa soko, sa moce ko koya; a sa lako sobu mai na cava e na drano; a ra sa luvu tiko, ka voleka ni mate.

²⁴ A ra sa lako mai ka vakayadrati koya, ka kaya, Kemuni na Turaga, Kemuni na Turaga, eda sa mate. Sa qai tu cake ko koya, ka vunauca na cagi kei na wai cudrucudru; ka rau sa cegu kina, a sa qai maravu sara.

²⁵ A sa kaya vei ira ko koya, Evei na nomudou vakabauta? A ra sa rere ka kurabui, ka veikayaka vakai ira, Ko cei beka oqo; sa vakarota na cagi kei na wai, a rau sa talairawarawa vua?

²⁶ A ra sa udu ki na nodra vanua na kai Katara, sa donui Kalili.

²⁷ Ia ni sa sobu ki vanua ko koya, sa sota kaya e dua na tamata mai na koro, sa tiko vakadede vua eso na tevoro, a sa dau sega ni vakaisulu, se tiko e vale, e nai bulubulu ga.

²⁸ Ia ni sa raici Jisu, sa qoqolou cake, ka cuva sobu vua, ka kaya e na domo levu, A cava vei kedaru, i Jisu na Luve ni Kalou cecere sara? au sa vakamasuti iko, mo kakua ni vakararawataki au.

²⁹ Ni sa kaya oti ko koya vua na yalo velavela me lako tani vua na tamata: ni sa tauvi koya wasoma; a sa vesu tiko ko koya e na sinucodo kei nai vesu me tauri kina; ia sa musulaka nai vesu, a sa vakasavi koya na tevoro ki veikau.

³⁰ A sa tarogi koya ko Jisu, ka kaya, Ko cei na yacamu? A sa kaya ko koya, Ko Vavakoso; ni ra sa lewe vuqa na tevoro ka curuma.

³¹ A ra sa masuti koya me kakua ni kaya vei ira me ra lako yani ki bulu.

³² A sa dua na qele-ni-vuaka levu sa kana voli e na ulu-ni-vanua: a ra sa masuti koya me laivi ira me ra curumi ira. A sa laivi ira ko koya.

³³ A ra sa qai lako tani e na tamata ko ira na tevoro, a ra sa curumi ira na vuaka a ra sa cici sara na qele-ni-vuaka e na baba ki na drano, a ra sa ora.

³⁴ Ia ko ira sa vakania, ni ra sa raica na ka sa caka, era sa dro, ka laki tukuna e na koro kei na veiyasana ki vanua.

³⁵ A ra sa qai lako yani me ra raica na ka sa caka; a ra sa yaco vei Jisu, ka kunea na tamata, sa lako tani vua ko ira na tevoro, ni sa tiko ki na yava i Jisu, ka sa vakaisulutaki, ka yalomatua: a ra sa rere.

³⁶ Ko ira talega era raica, era sa tukuna vei ira na ka sa bula kina ko koya ka curuma eliu ko ira na tevoro.

³⁷ Sa ra qai masuti koya ko ira kecega na lewe ni yasana ko Katara me lako tani vei ira: ni sa kani ira na rere levu; a sa vodoka na waqa ko koya, ka lesu tale yani.

³⁸ Ia na tamata ka lako tani vua na tevoro sa masuti koya me laivi koya me rau tiko vata kaya: ia sa talai koya tani ko Jisu, ka kaya,

³⁹ Mo lesu ki na nomu vale, ka tukuna na kena levu ni veika sa cakava vei iko na Kalou. A sa lako ko koya, ka tukuna ki na koro taucoko ko ya na kena levu ni veika sa cakava vua ko Jisu.

⁴⁰ Ia ni sa lesu tale ko Jisu, era sa vakacegui koya ko ira na tamata: ni ra sa waraki koya ko ira kecega.

⁴¹ Ka raica, sa dua na tamata ko Jairo na yacana, e dua na turaga ni vale ni lotu, sa lako mai ka cuva sobu ki na yava i Jisu, ka vakamasuta me lako ki nona vale:

⁴² ni sa dua bauga na luvena-yalewa, e tinikarua na nona yabaki, a sa voleka ni mate. Ia ni sa lako ko koya, era sa drigiti koya na lewe vuqa.

⁴³ Ka dua na yalewa, sa turidrabalavu ka yabaki tinikarua, a sa vakaotia vei ira na vuniwai na nona ka kecega sa tu vua me bula kina, a sa sega ni bula vua e dua,

⁴⁴ sa lako mai ki dakuna, ka tara na tutu ni nonai sulu; a sa mudu vakasauri kina nai davedave ni nona dra.

⁴⁵ A sa kaya ko Jisu, O cei sa tarai au? Ia ni ra sa vakasegasega kecega, sa kaya ko Pita kei ira sa tiko vata kaya, Kemuni na Turaga, sa vakaosoosoi kemuni na lewe vuqa era sa veidrigidrigiti, ia ko ni sa taroga, O cei sa tarai au?

⁴⁶ A sa kaya ko Jisu, Sa dua sa tarai au: ni’u sa kila sa lako tani vei au na kaukauwa.

⁴⁷ Ia ni sa kila na yalewa sa sega ni vuni, sa lako mai ka sautaninini, ka cuva sobu vua, ka tukuna e matadra kecega na lewe vuqa na ka sa tarai koya kina, kei na nona bula vakasauri kina.

⁴⁸ A sa kaya vua ko koya, Na luvequ-yalewa, mo vakacegu; sa vakabulai iko na nomu vakabauta; mo lako e na vakacegu.

⁴⁹ Ni sa vosa tiko ko koya, sa lako mai e dua mai na vale ni turaga ni vale ni lotu, ka kaya vua, Sa mate na luvemu-yalewa; kakua ni vakaocataka nai Vakavuvuli.

⁵⁰ Ia ni sa rogoca ko Jisu, sa vosa vua, ka kaya, Kakua ni yalolailai; vakadinata ga, ena qai vakabulai ga ko koya.

⁵¹ Ia ni sa curu ki vale ko koya, sa sega ni laiva e dua me curu kina, ko iratou ga ko Pita, kei Jemesa, kei Joni, kei na tama ni goneyalewa kei na tinana.

⁵² A ra sa tagi kecega, ka tagicaka: a sa kaya ko koya, Kakua ni tagi; sa sega ni ciba ko koya, sa moce ga.

⁵³ A ra sa dredrevaki koya, ni ra sa kila sa ciba ko koya.

⁵⁴ A sa vakatalai ira kece ki tautuba, ka taura na ligana, ka kaci, ka kaya, Ko iko gone duri cake.

⁵⁵ A sa lesu tale mai na yalona, a sa duri cake sara; a sa kaya ko koya me soli vua e dua na kena.

⁵⁶ A rau sa kurabui sara na nona qase; a sa vakarota vei rau ko koya me rau kakua ni tukuna vua e dua na ka sa caka.