Luke 4 - Vakavakadewa Makawa

Sa dauveretaki Jisu na tevoro, 1—13. Sa vakatekivu ko Jisu me vunau, 14—32. Sa vakabulai ira e lewe vuqa era sa tauvi-mate, 33—44.

¹ Ia ni sa sinai ko Jisu e na Yalo Tabu, sa lesu tale mai na Joritani, a sa kauti koya na Yalo Tabu ki na loma ni veikau,

² a sa dauveretaki koya na tevoro ka bogi vasagavulu. A sa sega na ka e kania ko koya e na veisiga ko ya: ia ni sa oti sa qai viakana.

³ A sa kaya na tevoro kivei koya, Kevaka ko sa Luve ni Kalou, mo kaya mada me vuki na vatu oqo mei buli madrai.

⁴ A sa vosa vua ko Jisu, ka kaya, Sa volai, Ena sega ni bula na tamata e na madrai duaduaga, sa bula ga e na vosa kecega ni Kalou.

⁵ A sa tuberi koya na tevoro ki na dua na ulu-ni-vanua cecere, a sa vakaraitaka vei koya vakasauri sara na veimatanitu kecega e vuravura.

⁶ Sa qai kaya na tevoro kivei koya, A lewa ni ka kecega oqori ka’u na solia vei iko, kei na kedrai ukuuku talega, ni sa soli vei au, ia ka’u sa solia vei koya yadua ka’u sa via solia kina:

⁷ ia kevaka ko na vakarokoroko vei au, ena nomu kecega.

⁸ A sa vosa vua ko Jisu, ka kaya, Mo lako ki dakuqu, Setani: ni sa volai, Mo vakarokoroko vei Jiova na nomu Kalou, ia mo qaravi koya duaduaga.

⁹ A sa kauti koya ki Jerusalemi, ka vakatikora e na taba ni vale ni soro, a sa kaya vua, Kevaka ko sa Luve ni Kalou, mo rika sobu eke;

¹⁰ ni sa volai, Ena vakaroti ira na nona agilose ko koya e na vukumu, me ra maroroi iko:

¹¹ ia Era na keveti iko e na ligadra, De dua na siga sa tavutu kina na yavamu e na vatu.

¹² A sa vosa ko Jisu, ka kaya vua, Sa kainaki, Mo kakua ni vakatovolea vakaca na nomu Kalou ko Jiova.

¹³ Ia ni sa vakaotia kecega na dauvere na tevoro, sa lako tani vua ka yacova e dua na gauna.

¹⁴ A sa lesu tale ko Jisu e na kaukauwa ni Yalo Tabu ki Kalili; a sa kuruvaki na kenai rogorogo ki na vanua taucoko sa vakavolivolita.

¹⁵ A sa vakatavuvuli tiko e na nodra veivale ni lotu, a ra sa dokai koya ko ira kecega.

¹⁶ A sa yaco ki Nasareci, a koro ka susugi kina: ia me vaka na nonai valavala, sa curu ki na vale ni lotu e na siga ni vakacecegu, a sa tu cake me wili vola.

¹⁷ A sa soli vua nai vola nei Aisea na parofita. Ia ni sa tevuka nai vola, sa kunea na tikina sa volai kina,

¹⁸ Sa tu vei au na Yalo i Jiova, Ni sa lumuti au ko koya me’u vunautaka nai tukutuku-vinaka vei ira era sa dravudravua; Me’u vunautaka na sereki vei ira na bobula, Kei na rai tale vei ira era sa mataboko, Me’u vakalalagataki ira era sa mavoa,

¹⁹ Me’u vunautaka na yabaki vinaka i Jiova.

²⁰ A sa viviga nai vola, a sa solia tale vua nai talatala, a sa tiko sobu; a sa vakaraici koya matua na matadra kecega era tiko e na vale ni lotu.

²¹ Sa qai kaya vei ira ko koya, E na siga oqo sa vakayacori e na daligamudou nai Vola Tabu oqo.

²² A ra sa vakadinadina vua ko ira kecega, a ra sa kurabui e na vuku ni vosa vinaka sa lako mai na gusuna. A ra sa kaya, Sa sega li ni luve i Josefa ko koya oqo?

²³ A sa kaya vei ira ko koya, E dina ga dou na vosataka vei au nai bole oqo, Vuniwai, mo vakabulai iko mada: a ka kecega keimami sa rogoca sa caka mai Kapenaumi, kitaka talega e na nomu vanua oqo.

²⁴ Sa kaya talega ko koya, Au sa kaya vakaidina vei kemudou, Sa sega e dua na parofita sa vinakati e na nona vanua.

²⁵ Ia ka’u sa vosa dina vei kemudou, Era lewe vuqa na yada e Isireli e na gauna i Ilaija, ni sa sogo tu ko lomalagi ka yabaki tolu ka mani vula ono, ni sa dausiga vakalevu na vanua taucoko:

²⁶ a sa sega ni talai ko Ilaija vua e dua vei ira, vua ga e dua na yada mai Sarepita, e na yasayasa vaka Saitoni.

²⁷ A sa lewe vuqa talega na vukavuka e Isireli e na gauna i Ilaisa na parofita; a sa sega e dua vei ira sa vakasavasavataki, ko Neamani ga na kai Siria.

²⁸ Ia ko ira kecega e na vale ni lotu, ni ra sa rogoca na ka oqo, era sa cudru vakalevu sara,

²⁹ a ra sa tu cake, ka biligi koya ki nai bili ni koro, a ra sa kauta ki na bati ni ulu-ni-vanua sa tara tu kina na nodra koro, me ra biliga mai na bari-ni-savu.

³⁰ A sa lako ko koya e na kedra maliwa, ka lako tani yani.

³¹ A sa lako sobu ki Kapenaumi, a koro mai Kalili, a sa vakatavuvuli e na veisiga ni vakacecegu.

³² A ra sa kurabui sara e na nonai vakavuvuli, ni sa vosa ko koya e na kaukauwa vakai koya.

³³ A sa tiko e na vale ni lotu e dua na tamata, ka curumi koya na yalo ni dua na tevoro velavela, a sa qoqolou e na domo levu,

³⁴ ka kaya, Ulei! a cava vei keda, i Jisu na kai Nasareci? ko sa lako beka mai me rawai keitou? au sa kilai iko, na nona Le Dua Yalosavasava na Kalou.

³⁵ A sa vunauci koya ko Jisu, ka kaya, Mo galu ga, ka lako tani mai vua. Ia ni sa bitabitalaki koya mada na tevoro e na kedra maliwa, sa qai lako tani mai vua, a sa sega ni vakamavoataka.

³⁶ A ra sa kurabui kecega, a ra sa veivosaki vakai ira, ka kaya, A cava beka na vosa oqo! ni sa vosa vakaturaga ka vakamana ko koya vei ira na yalo velavela, a ra sa lako tani sara.

³⁷ A sa kuruvaki yani na kenai rogorogo ki na veiyasana kecega ni vanua sa vakavolivolita.

³⁸ A sa lako tani mai na vale ni lotu ko koya, ka curu ki na vale i Saimoni. A sa tauvi koya na tina ni wati i Saimoni e dua na katakata levu; a ra sa masuti koya e na vukuna.

³⁹ A sa tu e tikina ko koya, ka vunauca na katakata: a sa takali vua; a sa tu cake sara ko koya, ka qaravi iratou.

⁴⁰ Ia ni sa dromu tiko na siga, ko ira kecega sa tauvi mate na nodra e na mate eso, era sa kauti ira kivei koya: a sa tabaki ira yadua ko koya e na ligana, ka vakabulai ira.

⁴¹ Ia era sa lewe vuqa sa lako tani maivei ira eso na tevoro, ni ra sa qoqolou tiko, ka kaya, O iko na Karisito na Luve ni Kalou. A sa vunauci ira ko koya, ka sega ni laiva me ra vosa, ni ra sa kila sa Karisito ko koya.

⁴² Ia ni sa siga sa lako tani ko koya, ka lako ki na dua na yasana lala: a ra sa vakasaqarai koya ko ira na tamata, a ra sa lako mai vua, ka tarovi koya me kakua ni lako tani vei ira.

⁴³ A sa kaya vei ira ko koya, Sa dodonu me’u lako me’u tukuna nai tukutuku-vinaka ni matanitu ni Kalou e na veikoro tani talega: ni sa ka oqo ka’u sa talai mai kina.

⁴⁴ A sa dauvunau ko koya e na veivale ni lotu mai Kalili.