Luke 24 - Vakavakadewa Makawa

Sa tukuna vei ira na yalewa e le rua na agilose ni sa tu cake tale mai ko Jisu, 1—12. Sa rairai ko Jisu vei rau na tamata e lewe rua, ka rairai emuri vei ira kecega, ka vakavulici ira, 13—49. Sa qai lako cake ki lomalagi ni ra sa raica tiko, 50—53.

¹ Ia e nai matai ni siga ni wiki, e na mataka caca sara, eratou sa lako mai ki nai bulubulu, a ratou sa kauta mai na ka boivinaka eratou a vakarautaka, ka so tale eratou lako vata mai kei iratou.

² A ratou sa kunea ni sa vaqiqici tani na vatu mai nai bulubulu.

³ Ia ni ratou sa curu, eratou sa sega ni kunea na yago ni Turaga ko Jisu.

⁴ A sa yaco ni ratou sa kurabui vakalevu kina, raica, e lewe rua na tamata sa tu voleka vei iratou e nai sulu lumilumisa:

⁵ ia ni ratou sa rere, ka vakacuva sobu na matadratou ki na qele, erau sa kaya vei iratou, E na cava dou sa mai vakasaqarai koya sa bula e na kedra maliwa na mate?

⁶ Sa sega eke ko koya, sa tu cake tale: nanuma na nona vosa vei kemudou ni sa tiko kei kemudou mai Kalili,

⁷ ni sa kaya, Ena soli yani na Luve ni tamata ki na ligadra na tamata ca, ka na vakoti ki na kauveilatai, ka na tu cake tale e nai katolu ni siga.

⁸ A ratou sa qai nanuma na nona vosa,

⁹ ka suka tani e nai bulubulu, ka tukuna na ka kecega oqo vei ira na le tinikadua, vei ira kece talega sa vo.

¹⁰ O iratou ka mai tukuna na ka oqo vei ira nai apositolo, ko Meri na yalewa ni Makitala, kei Joana, kei Meri na tina i Jemesa, kei ira eso na yalewa tani.

¹¹ A sa vaka nai tukutuku wale vei ira na nodratou vosa, a ra sa sega ni vakadinata.

¹² Sa qai cavu tu ko Pita, ka cici ki nai bulubulu; ia ni sa cuva sobu, sa raica nai sole lineni ni sa no wale, a sa qai lako tani, a sa kurabui e lomana e na vuku ni ka sa yaco.

¹³ Ka raica, sa lewe rua vei ira sa lako e na siga dina ko ya ki na dua na koro lailai ko Emeo na yacana, e vitu beka na maili ka savu na kedrau veiyawaki kei Jerusalemi.

¹⁴ A rau sa veivosakitaka na ka kecega oqo sa qai yaco.

¹⁵ Ia ni rau sa veivosaki tiko ka veitarogi, sa toro voleka ko Jisu, ka lako vata kei rau.

¹⁶ A sa matabuawataki na matadrau me rau kakua ni kilai koya.

¹⁷ A sa kaya vei rau ko koya, Ai tukutuku cava oqo drau sa veivosakitaka, ni drau sa lako tu? Ka rau sa tu vakadua ka vakaveveku mata.

¹⁸ A sa dua vei rau, na yacana ko Kaliopasa, sa vosa ka kaya vua, O iko duadua beka na vulagi mai Jerusalemi, ka sega kina kila na veika sa qai yaco kina e na gauna oqo?

¹⁹ A sa tarogi rau ko koya, A ka cava? A rau sa kaya vua, Na ka sa baleti Jisu na kai Nasareci, a parofita sa levu e na cakacaka kei na vosa e na mata ni Kalou kei na matadra kecega na tamata:

²⁰ a sa soli koya ko ira na bete levu kei ira na neimami turaga me lewai me mate, a ra sa vakota ki na kauveilatai.

²¹ Ia keimami a nuitaka ni sai koya ga oqo ena vakabulai ira na Isireli: ia oqo talega, sa kenai katolu ni siga edaidai ni sa caka oti na ka oqo.

²² Ia ka so talega na neimami yalewa, eratou sa vakurabuitaki keimami, ni ratou sa lako ki nai bulubulu e na mataka caca;

²³ ia ni ratou sa sega ni kunea na yagona, eratou sa lako mai ka tukuna, ni ratou a raica eso na agilose sa sikavotu vei iratou, ka kaya sa bula ko koya.

²⁴ O iratou talega eso eratou sa dautiko vata kei keimami, eratou sa lako ki nai bulubulu, a ratou sa kunea ni sa vaka na ka eratou a kaya na yalewa: ia eratou sa sega ni kunei koya.

²⁵ A sa kaya vei rau ko koya, Drau sa sesewa, ka sega ni via vakabauta na ka kecega sa tukuna ko ira na parofita!

²⁶ E sega beka ni kilikili kei koya na Karisito me vosota mada na veika oqo, me qai curu ki na nonai ukuuku?

²⁷ Ka sa vakatekivu e nai vola i Mosese ka yacovi ira kecega na parofita, ka sereka vei rau mai nai Vola Tabu kecega na vosa ka tukuni kina ko koya.

²⁸ A ratou sa torova na koro lailai erau sa lako kina: a sa lako ko koya me vaka sa via lako kiliu.

²⁹ A rau sa cikeva matua, ka kaya, Ni tiko ga vei keirau, ni sa qai yakavi, a sa kala na siga. A sa curu ko koya me tiko vata kei rau.

³⁰ Ia ni ratou sa tiko sobu me ratou kana, sa taura na madrai ko koya, ka lotutaka, ka dovia, ka solia vei rau.

³¹ A sa qai lau na matadrau, a rau sa kilai koya: a sa takali ko koya mai na matadrau.

³² A rau sa veikayaka vakai rau, Sa sega li ni katakata sara na yalodaru, ni datou sa veivosaki kaya e na gau-ni-sala, ni sa vakamacalataka talega vei kedrau nai Vola Tabu ko koya?

³³ A rau sa cavu tu e na tiki ni yakavi ga ko ya, ka lesu tale ki Jerusalemi, a rau sa kunei ira na lewe tinikadua ni ra sa soqoni vata mai, kei ira era dautiko vata kei ira;

³⁴ a ra sa kaya, Sa dina sa tu cake tale na Turaga, ka sa rairai vei Saimoni.

³⁵ A rau sa tukuna talega na veika sa ia e na gau-ni-sala, ka ni rau sa kilai koya talega ni sa dovia tiko na madrai.

³⁶ Ia ni ra sa vosa tiko vakaoqo, sa tu sara e na kedra maliwa ko Jisu, ka kaya vei ira, Dou vakacegu ga.

³⁷ A ra sa kidroa ka rere sara, a ra sa vakasama ni ra sa raica e dua na yalo.

³⁸ A sa kaya vei ira ko koya, Dou sa kidroa e na vuku ni cava? ka sa tubu na vakanananu e na lomamudou e na vuku ni cava?

³⁹ raica na ligaqu kei na yavaqu, sai au dina ga: tarai au, ka raica; ni sa sega ni vakalewena se vakasuina na yalo, me vaka dou sa raica vei au.

⁴⁰ Ia ni sa vosa oti vakaoqo ko koya, sa vakaraitaka vei ira na ligana kei na yavana.

⁴¹ Ia ni ra sa sega ni vakabauta e na vuku ni ra sa reki, ka kurabui, sa tarogi ira ko koya, Sa dua na kakana eke vei kemudou, se segai?

⁴² A ra sa solia vua e dua na tiki ni ika tavu, ka so mai na qa-ni-oni sa tawa.

⁴³ A sa taura ko koya, ka kana e matadra.

⁴⁴ A sa kaya vei ira ko koya, Oqo na vosa ka’u a daukaya vei kemudou ni’u a tiko kei kemudou, ni na yaco kecega na vosa sa tukuni au, sa volai e na vunau i Mosese, kei na nodrai vola na parofita, kei na Same.

⁴⁵ Sa qai vakararamataka na lomadra ko koya, me ra kila rawa nai Vola Tabu,

⁴⁶ a sa kaya vei ira, Sa volai vakaoqo, ni sa kilikili kei koya na Karisito me vosota vakakina, me tu cake talega mai na mate e nai katolu ni siga;

⁴⁷ me vunautaki talega na veivutuni, kei na vakabokoci ni valavala ca, e na vuku ni yacana, vei ira na lewe ni veivanua kecega, me vakatekivu e Jerusalemi.

⁴⁸ Ia koi kemudou, dou na dautukutuku e na veika oqo.

⁴⁹ Ia ka raica, au sa tala vei kemudou na ka sa yalataka ko Tamaqu: ia dou tiko ga e na koro ko Jerusalemi, me yaco mada vei kemudou na kaukauwa mai-cake.

⁵⁰ A sa kauti ira ki nai bili ki Pecani, a sa qai dodoka cake na ligana, ka vosavakalougatataki ira.

⁵¹ A sa yaco, ni sa vosavakalougatataki ira tiko, sa kau tani vei ira, a sa kau cake ki lomalagi.

⁵² A ra sa vakarokoroko vua, ka lesu tale ki Jerusalemi, ka reki vakalevu:

⁵³ a ra sa dautiko e na vale ni soro, a ra sa vakarokorokotaka tiko na Kalou, ka vakavinavinaka vua. Emeni.