Luke 19 - Vakavakadewa Makawa

Sa vakabauti Jisu ko Sakiusa, 1—10. Sa tukuna ko Jisu na turaga sa cati koya ko ira na kai nona, 11—27. Sa vodoka na asa ko Jisu, ka lako ki Jerusalemi, 28—40. Sa tukuni Jerusalemi ni na ca, ka vakasevi ira era sa veivoli e na vale ni soro, a sa vakavuvuli ko koya e na veisiga, 41—48.

¹ A sa curu ki Jeriko ko koya, ka lako tu yani.

² Ka raica, sa dua na tamata na yacana ko Sakiusa, sa turaga vei ira na kumuna nai vakacavacava, ka sa vutuniyau.

³ A sa vakatovolea me raici Jisu se sa vakaevei ko koya: a sa dredreta e na vukudra na lewe vuqa, ni sa tamata lekaleka.

⁴ A sa cici kiliu, ka kaba e dua na lolo me raici koya: ni sa lako voleka kina.

⁵ Ia ni sa yaco ki na yasana ko ya ko Jisu, sa ta cake, ka raica, ka kaya vua, I Sakiusa, kusarawa, mo kevu sobu mai; ni’u na tiko e na nomu vale edaidai.

⁶ A sa kevu kusarawa sobu mai ko koya, a sa vakacegui koya e na marau.

⁷ Ia ni ra sa raica, era sa vosakudrukudru ko ira kecega, ka kaya, Sa lako ko koya me tiko vata kei na dua na tamatai valavala ca.

⁸ A sa tu cake ko Sakiusa, ka kaya vua na Turaga, Raica, Kemuni na Turaga, au sa waseruataka na noqui yau ka me’u solia e dua na kena wase vei ira na dravudravua: ia kevaka ka’u sa kovea na nona ka e dua na tamata ni’u sa beitaka vakailasu, ena va na kenai sau ka’u na solia.

⁹ A sa kaya vua ko Jisu, Sa yaco edaidai na bula ki na vale oqo, ni sa luve i Eparaama ko koya talega oqo:

¹⁰ ni sa lako mai na Luve ni tamata me vakasaqara ka vakabula na ka sa yali.

¹¹ Ia ni ra sa rogoca na veika oqo, sa qai tukuna talega ko koya e dua na vosa vakatautauvata, ni sa voleka ko koya ki Jerusalemi, ka ni ra sa nanuma talega ena rairai vakasauri mai na matanitu ni Kalou.

¹² O koya oqo sa kaya kina ko koya. Sa dua na turaga sa lako ki na dua na vanua yawa, me buli me tui, me qai lesu tale mai.

¹³ A sa kacivi ira na nona tamata e lewe tini, ka solia vei ira e tini na paudi, ka kaya vei ira, Dou volivoli tiko, ka yacova na noqu lesu tale mai.

¹⁴ Ia ko ira na nona lewe ni koro era sa cati koya, a ra sa tala na mata me muri koya yani me kaya, Keitou sa sega ni vinakata me lewai keitou ko koya oqo.

¹⁵ Ia ni sa lesu tale mai ko koya, ni sa buli me tui, sa kaya me ra kacivi mai vua ko ira na tamata oqori, ko ira ka solia vei ira ko koya nai lavo, me kila se ra yavica tale era sa rawata ni ra sa veivoli.

¹⁶ Sa qai lako mai ko koya sa liu, ka kaya, Kemuni na Turaga, sa tini tale na paudi sa rawa e na nomuni paudi e dua.

¹⁷ A sa kaya vua ko koya, E vinaka, na tamata vinaka: ia ni ko sa dina e na ka lailai sara, mo lewa na koro e tini.

¹⁸ A sa lako mai nai karua, ka kaya, Kemuni na Turaga, sa lima tale na paudi sa rawa e na nomuni paudi e dua.

¹⁹ A sa kaya talega vua ko koya, O iko talega mo lewa na koro e lima.

²⁰ A sa lako mai e dua tale, ka kaya, Kemuni na Turaga, raica na nomuni paudi, ka’u sa maroroya e na dua nai tavoi:

²¹ ni’u a rerevaki kemuni, ni kemuni sa tamata dredre: ko ni sa taura cake na ka ko ni sa sega ni biuta sobu, ka tamusuka na ka ko ni sa sega ni kaburaka.

²² A sa kaya vua ko koya, Au na lewai iko e na nomu vosa, na tamata ca! ko sa kila ni’u sa tamata dredre, sa taura cake na ka ka’u sa sega ni biuta sobu, ka tamusuka na ka ka’u sa sega ni kaburaka:

²³ ia ka vakaevei ni ko sa sega ni solia kina na noqui lavo ki na baqe, me’u taroga tale kei na kenai kere ni’u sa lako tale mai?

²⁴ A sa kaya ko koya vei ira era sa tu voleka, Kauta tani vua na paudi, ka solia vua sa tini na nona paudi.

²⁵ A ra sa kaya vua, Na Turaga, sa tu vua e tini na paudi.

²⁶ Au sa kaya vei kemudou, O koya yadua sa tu vua na ka, ena soli vua; ia ko koya sa sega ni tu vua na ka, ena kau tani mai vua na ka sa tu vua.

²⁷ Ia ko ira na noqu meca oqo, era sa sega ni vinakata me’u lewai ira, kauti ira mai kike, ka vakamatea e mataqu.

²⁸ Ia ni sa vosa oti vakaoqo ko koya, sa lako vaka kiliu, ka lako cake tiko vaka ki Jerusalemi.

²⁹ A Sa yaco, ni sa toro voleka ko koya ki Pecifaki kei Pecani, ki na ulu-ni-vanua sa vakayacani ki na veiolive, sa tala e lewe rua na nona tisaipeli,

³⁰ ka kaya, Drau lako ki na koro lailai sa donui kemudrau; ia ni drau sa curu kina, drau na kunea e dua na luve ni asa sa noka tu, sa sega ni vodoka e dua na tamata; drau sereka, ka kauta mai:

³¹ ia kevaka sa tarogi kemudrau e dua, Drau sa sereka ena vuku ni cava? drau kaya vua vakaoqo, Ni sa yaga vua na Turaga.

³² A rau sa lako koi rau sa talai, a rau sa kunea me vaka na ka ka kaya vei rau ko koya.

³³ Ia ni rau sa sereka tiko na luve ni asa, sa tarogi rau ko iratou na kenai taukei, A cava drau sa sereka kina na asa?

³⁴ A rau sa kaya, Sa yaga vua na Turaga.

³⁵ A rau sa kauta mai vei Jisu, ka virikotora na nodraui sulu ki na luve ni asa, ka vakavodoki Jisu kina.

³⁶ Ia ni sa lako tu ko koya, era sa tevuka na nodrai sulu e na gau-ni-sala.

³⁷ Ia ni sa qai voleka ni sobuta na ulu-ni-vanua ni veiolive ko koya, era sa vakatekivu na tisaipeli kecega era lewe vuqa me ra reki, ka vakarokorokotaka na Kalou e na domo levu, e na vuku ni cakacaka-mana kecega era sa raica.

³⁸ A ra sa kaya, Sa kalougata na Tui sa lako mai e na yaca ni Turaga! me tu mai lomalagi na veivinakati, kei na vakarokoroko e na veiyasana ecake sara.

³⁹ Ia ka so na Farisi vei ira na lewe vuqa era sa kaya vua, Vakavuvuli, vunauci ira na nomu tisaipeli.

⁴⁰ A sa vosa ko koya, ka kaya vei ira, Au sa kaya vei kemudou, Kevaka era sa tiko lo ko ira oqo, ena qai qoqolou mai na veivatu.

⁴¹ Ia ni sa toro voleka mai ko koya, ka raica na koro, sa tagicaka,

⁴² ka kaya, Isa! Ke ko a kila, io ko iko, e na nomu gauna oqo, na veika ni nomu vakacegu! ia sa qai vuni ga vei iko.

⁴³ Ni na yaco mai na siga, ena viribaiti iko kina ko ira na nomu meca, ka buku druadrua ka sogolati iko e na veiyasana kecega,

⁴⁴ ka na vakalolovirataki iko kira, kei ira na luvemu e na kemu maliwa, ka na sega ni vo vei iko na veivatu me veitaqataqai; ni ko sa sega ni kila na gauna ko sa lakovi kina.

⁴⁵ A sa curu ko koya ki na vale ni soro, ka sa vakatekivu me vakasevi ira tani era sa veivoli kina,

⁴⁶ ka kaya vei ira Sa volai, Sa vale ni masu na noqu vale: ia dou sa cakava me nodra qara na daubutako.

⁴⁷ A sa vakatavuvuli tiko e na vale ni soro e na veisiga. A ra sa segata ko ira na bete levu kei ira na vunivola kei ira na turaga me ra vakamatea,

⁴⁸ a ra sa sega ni kunea e dua na ka me ra kitaka rawa; ni ra sa vinakata kecega na lewe vuqa me ra rogoci koya.