Luke 15 - Vakavakadewa Makawa

A vosa vakatautauvata kei na sipi sa yali ka kune tale, 1—7; kei na tiki ni siliva sa yali ka qai kune tale, 8—10; kei na gone sa biuti tamana ka qai lesu tale mai, 11—32.

¹ Sa qai toro voleka mai vei koya ko ira kecega na kumuna nai vakacavacava, kei ira na tamatai valavala ca, me ra rogoci koya.

² A sa vosakudrukudru ko ira na Farisi kei ira na vunivola, ka kaya, Ko koya oqo sa veilasamaki vata kei ira na tamata ca, ka kana vata kei ira.

³ A sa tukuna vei ira ko koya na vosa vakatautauvata oqo, ka kaya,

⁴ Ko cei vei kemudou na tamata, sa dua na drau na nona sipi, kevaka sa vakayalia e dua vei ira, ena sega beka ni biuta laivi tu na ciwasagavulu ka ciwa e na veico, ka laki vakasaqarai koya sa yali, me kunea mada?

⁵ Ia ni sa kunea, sa viribale ki domona, ka reki.

⁶ Ia ni sa tale ki nona vale, sa kacivi ira vata na wekana kei na lewe ni koro, ka kaya vei ira, Tou mai reki vata, ni’u sa kunea na noqu sipi ka yali.

⁷ Au sa kaya vei kemudou, ni sa levu vakakina na reki mai lomalagi e na vuku ni tamatai valavala ca e le dua bauga sa qai veivutuni, ia ka lailai ga e na vukudra na tamata yalododonu e le ciwasagavulu ka ciwa, sa sega ni yaga vei ira na veivutuni.

⁸ Se ko cei na yalewa sa tini na nona tiki ni siliva, kevaka sa vakayalia e dua na tikina, sa sega beka ni tutuvaka na cina, ka taviraka na vale, ka vakasaqara matua, me kunea mada?

⁹ Ia ni sa kunea, sa kacivi ira vata na wekana kei na lewe ni koro, ka kaya, Tou mai reki vata, ni’u sa kunea na tikina ka’u a vakayalia.

¹⁰ Au sa kaya vei kemudou, Sa tubu vakakina na reki e na matadra na agilose ni Kalou, e na vuku ni tamatai valavala ca e le dua bauga sa qai veivutuni.

¹¹ Sa kaya tale ko koya, E dua na tamata sa lewe rua na luvena-tagane:

¹² ka sa kaya vei tamana ko koya sa gone vei rau, I Tamaqu, solia mai vei au nai votavota ni yau sa vota me noqu. A sa vota vei rau nai yau.

¹³ A sa bogi vica mada, sa qai kumuna vata na ka kecega na gone, ka lako tani ki na dua na vanua vakayawa, ka sa vakayalia kina na nonai yau e nai valavala vakamarau ca.

¹⁴ Ia ni sa vakaotia kece, sa qai tubu na dausiga levu e na vanua ko ya; a sa qai dravudravua sara ko koya.

¹⁵ A sa laki tiko kei na dua na lewe ni vanua ko ya; a sa talai koya ki na nona veiwere me vakani ira na vuaka,

¹⁶ A sa garova na qana era daukania na vuaka, me mamau kina na ketena; a sa sega e dua sa vakani koya.

¹⁷ Ia ni sa kila yalona tale, sa kaya, Sa le vuqa na tamata nei tamaqu sa voli na nodra cakacaka, era sa mamau e na madrai ka vo tu yani, ia koi au ka’u sa mate e na viakana!

¹⁸ au na ia, ka lako vei tamaqu, ka’u na kaya vua, Tamaqu, au sai valavala ca ki lomalagi, vei kemuni talega,

¹⁹ ka’u sa sega kina ni yaga me’u vakatokai tale me luvemuni: lesi au me’u vakataka e dua na nomuni tamata sa voli na nona cakacaka.

²⁰ A sa ia, ka lako vei tamana. Ia ni sa yawa sara, sa raici koya ko tamana, a sa lomana, ka cici, ka mokota, ka reguca.

²¹ A sa kaya na luvena kivei koya, I Tamaqu, au sai valavala ca ki lomalagi, vei kemuni talega, ka’u sa sega kina ni yaga me’u vakatokai tale me luvemuni.

²² A sa kaya na tamana vei ira na nona tamata, Dou kauta mai nai sulu vinaka sara, ka vakasulumi koya; daramaka talega e dua na mama ki ligana, kei nai vava ki na yavana;

²³ ia dou kauta mai na luve ni pulumokau sa uro, ka vakamatea; ka me datou kana, ka marau;

²⁴ ni sa mate na luvequ oqo, ka sa qai bula tale; sa yali, ka sa qai kune tale. A ra sa vakatekivu me ra marau.

²⁵ A sa tiko e na were na luvena ka qase vei rau; ia ni sa tale mai ka toro voleka ki vale, sa rogoca na bitu-ni-vakatagi kei na meke.

²⁶ A sa kaciva e dua vei ira na tamata, ka taroga na kenai balebale ni ka oqo.

²⁷ A sa kaya vua ko koya, Sa lako saka tale mai na tacimu; ka sa vakamatea ko tamamu na luve ni pulumokau sa uro, e na vuku ni rau sa veikune tale ka sa bula vinaka.

²⁸ A sa cudru ko koya, ka bese ni curu; sa qai lako mai kina ki tautuba ko tamana, ka vakamasuta.

²⁹ Sa qai vosa ko koya, ka kaya vei tamana, Raica, e vuqa na yabaki oqo ka’u sa qaravi iko kina, ia ka’u sa sega sara ni talaidredre ki na nomu vosa: ia ko sa sega sara ni solia vei au e dua walega na luve ni me, me keitou marau vata kina kei ira na wekaqu:

³⁰ ia ni sa lako mai na luvemu oqo, ko koya sa vakaotia na nomui yau vei ira na yalewa dautagane, ko sa vakamatea me kena na luve ni pulumokau sa uro.

³¹ A sa kaya vua ko koya, Na luvequ, edaru sa tiko vata vakadua, ia na ka kecega sa tu vei au sa nomu.

³² Ia sa dodonu ga me da reki, ka marau; ni sa mate na tacimu oqo, ka sa qai bula tale; sa yali, ka sa qai kune tale.