Luke 11 - Vakavakadewa Makawa

Sa vakavulici ira na nona tisaipeli ko Jisu me ra daumasu, 1—13. Sa vakaseva tani e dua na tevoro galu, 14—28. Sa vakavulici ira na tamata, ka vunauci ira na Farisi, kei ira na vunivola, kei ira na vu-ni-vunau, 29—54.

¹ Ia ni sa masu ko koya e na dua na yasana, ni sa qai tinia, sa kaya vei koya e dua na nona tisaipeli, Kemuni na Turaga, mo ni vakavulici keimami me keimami masu, me vaka sa vakavulici ira talega na nona tisaipeli ko Joni.

² A sa kaya vei ira ko koya, Ni dou sa masu, dou kaya, Tama i keimami mai lomalagi, Me vakarokorokotaki na yacamuni. Me yaco na nomuni lewa. Me caka na lomamuni e vuravura me vaka sa caka mai lomalagi.

³ Mo ni solia mai vei keimami e na siga yadua na kakana e yaga vei keimami.

⁴ Ia mo ni kakua ni cudruvi keimami e na vuku ni neimami valavala ca: ni keimami sa sega talega ni cudruva e dua sai valavala ca vei keimami. Ia mo ni kakua ni kauti keimami ki na vere; ka mo ni vakabulai keimami mai na ca.

⁵ A sa kaya vei ira ko koya, O cei vei kemudou kevaka sa dua na wekana, a sa lako vua e na lomaloma-ni-bogi, ka kaya vua, Na wekaqu, au kerekere mo solia mai vei au e tolu nai buli madrai;

⁶ ni sa dua na wekaqu sa mai vakacegu vei au ni sa lako tu, ia sa sega e dua na ka vei au me’u tauca vua:

⁷ Ena qai vosa ko koya mai vale, ka kaya Kakua ni vakaocataki au; sa sogo tu na katuba, ka keitou sa davo kei iratou na luvequ e nai mocemoce; au sa sega ni tu cake rawa me’u solia vei iko.

⁸ Au sa kaya vei kemudou, Kevaka e bese ni tu cake ka solia vua, ni sa wekana; ia ni sa cikeva tiko ko koya, ena tu cake ka solia na ka ena rauti koya.

⁹ Au sa kaya talega vei kemudou, Dou kerekere, ka na soli vei kemudou; dou vakasaqara, ka dou na kunea; dou tukituki, ka na dolavi vei kemudou:

¹⁰ ni sa rawata ko koya yadua sa kerekere; ka sa kunea ko koya sa vakasaqara; ia ena dolavi vua sa tukituki.

¹¹ E dua li vei kemudou na tama ni gone kevaka sa mai kere madrai vei iko na luvemu, ena solia vua e dua na vatu? ia kevaka sa kere ika, ena solia beka vua e dua na gata mei sosomi ni ika?

¹² ia kevaka ena kere yaloka, ena solia beka vua e dua na batibasaga?

¹³ Ia kevaka dou kila, koi kemudou sa tamata ca, mo dou solia na ka vinaka vei ira na luvemudou; sa qai dina vakalevu cake, ni na solia na Yalo Tabu ko koya na Tamamudou vakalomalagi vei ira sa kerekere vua.

¹⁴ A sa vakaseva tani tiko e dua na tevoro ko koya, a sa galu. Ia ni sa lako tani na tevoro, sa vosa na galu; a sa kurabui ko ira na lewe vuqa.

¹⁵ A sa kaya eso vei ira, Sa vakasevi ira na tevoro ko koya e na kaukauwa i Pielisipupi na nodra turaga na tevoro.

¹⁶ Ia ka so tale, era sa vakatovolei koya, ka taroga e dua nai vakatakilakila mai lomalagi.

¹⁷ Ia ko koya, ni sa kila na nodra nanuma, sa kaya vei ira, A matanitu yadua sa veisei vakai koya, ena vakarusai; ia na vale sa veisei vakai koya, ena bale:

¹⁸ kevaka sa veisei vakai koya ko Setani, ena tu dei vakaevei na nona matanitu? ni dou sa kaya ka’u sa vakasevi ira na tevoro e na kaukauwa i Pielisipupi.

¹⁹ Ia kevaka ka’u vakasevi ira na tevoro e na kaukauwa i Pielisipupi, era vakaseva e na kaukauwa i cei ko ira na nomudou? o koya era na lewai kemudou kina ko ira oqo.

²⁰ Ia kevaka ka’u vakasevi ira na tevoro e nai qaqalo ni Kalou, sa qai yaco dina vei kemudou na matanitu ni Kalou.

²¹ Ni sa dua na qaqa sa vakaiyaragi tu sa vakatawa na nona vale, sa tu vinaka na nonai yaya:

²² ia ni sa dua tani sa uasivi vei rau e na qaqa sa lako vakaukauwa, ka rawai koya, sa kovea na nonai yaragi ni valu kecega sa vakararavi kina, a sa vota nai toki mai vua.

²³ O koya sa sega ni totaki au, sa to tani: ia ko koya sa sega ni kumuna vata vei au, sa duibiubiuta.

²⁴ Ni sa lako tani e na tamata na yalo velavela, sa daulako voli e na vanua dravuisiga me qara nai vakavakacegu: ia ni sa sega ni kunea, sa kaya, Au na lesu tale ki na noqu vale ka’u a lako tani maikina:

²⁵ ia ni sa tadu, sa kunea sa tataviraki ka vakaiukuukutaki.

²⁶ Sa qai lako ko koya, ka kauta vata kaya e lewe vitu tale na yalo sa uasivi vei koya e na ca; a ratou sa curuma ka tiko kina: a sa ca vakalevu emuri na tamata ko ya, ka ca vakalailai eliu.

²⁷ Ia ni sa vosa tiko vakaoqo, sa dua na yalewa vei ira na lewe vuqa sa tabalaka cake na domona, ka kaya vua, Sa kalougata na kete ko ni a sucu maikina, kei na sucuna ko ni a sucuma.

²⁸ A sa kaya ko koya, Ia sa kalougata vakalevu ko ira sa rogoca na vosa ni Kalou, ka vakabauta.

²⁹ Ka ni ra sa soqoni vata na tamata ka veidrigidrigi, sa vakatekivu ko koya me kaya, Ai tabatamata ca oqo: era sa dautaroga nai vakatakilakila; ia ena sega nai vakatakilakila me soli kina, nai vakatakilakila ga i Jona na parofita.

³⁰ Me vaka sai vakatakilakila ko Jona vei ira na kai Ninive, ena vaka talega kina na Luve ni tamata vei ira nai tabatamata oqo.

³¹ Ena tu cake na radi ni ceva ka vakadinadinataka na nodra cala nai tabatamata oqo, e na veilewai; ni sa lako mai ko koya mai na yasana vakayawa sara e vuravura me rogoca na vuku i Solomoni; ka raica, sa dua eke sa uasivi cake vei Solomoni.

³² Era na tu cake na kai Ninive, ka vakadinadinataka na nodra cala nai tabatamata oqo, e na veilewai; ni ra sa veivutuni e na vunau i Jona: ka raica, sa dua eke sa uasivi cake vei Jona.

³³ Sa sega e dua sa tutuvaka na cina, ka qai vakatikora e na tikina vuni, se e ruku ni vakarau ni sila, e na kenai tutu ga, me ra raica na kena rarama ko ira sa curu mai.

³⁴ Na cina ni yago na mata; ia kevaka sa vinaka na matamu sa rarama kina na yagomu taucoko, ia kevaka e ca, sa butobuto kina na yagomu taucoko.

³⁵ O koya mo qai vakaraica de sa butobuto mai na rarama sa tu e lomamu.

³⁶ O koya oqo, kevaka sa rarama na yagomu taucoko, ka sega na tikina sa butobuto, ena rarama kece sara, me vaka ni sa cinavi iko na cina sa caudre vinaka sara.

³⁷ Ia ni sa vosa tiko ko koya, sa sureti koya e dua na Farisi me rau kana vata kaya e nai vakasigalevu: sa qai curu ko koya, ka tiko sobu me kana.

³⁸ Ia ni sa raica na Farisi, sa kurabui ni sa vakasigalevu ko koya ka sega ni vuluvulu mada eliu.

³⁹ Sa qai kaya vei koya na Turaga, Oi kemudou na Farisi, dou sa qai dauvakasavasavataka na bilo kei na dari etaudaku, ia na lomamudou sa sinai e na daubutako kei nai valavala ca.

⁴⁰ A yalowai koi kemudou, e sega beka ni cakava na tikina eloma ko koya sa cakava na tikina etaudaku?

⁴¹ Ia mo dou solia na ka ni loloma me vaka dou sa rawata, ka raica, ena savasava vei kemudou na ka kecega.

⁴² Ia e ca vei kemudou, na Farisi! ni dou sa solia nai katini ni botebotekoro, kei na co kecega vakaoqo, ia na lewa dodonu kei na loloma ni Kalou dou sa biuta laivi ga; oqo e kilikili kei kemudou mo dou kitaka, me kakua talega ni biu na veika ko ya.

⁴³ E ca vei kemudou, na Farisi! ni dou sa dauvinakata nai tikotiko ni qase e na veivale ni lotu, kei na veikidavaki e na veirara ni veivoli.

⁴⁴ E ca vei kemudou! ni dou sa vaka nai bulubulu sa sega ni rairai, ka sa lako loa voli ko ira na tamata e delana ka sega ni kila.

⁴⁵ Sa qai vosa vei koya e dua na vu-ni-vunau, ka kaya, Vakavuvuli, ni ko sa vosa vakaoqo ko sa beitaki keitou talega.

⁴⁶ Sa qai kaya ko koya, E ca vei kemudou talega, na vu-ni-vunau! ni dou sa vakaocataki ira na tamata e nai colacola e dredre sara ni colati, ia dou sa sega ni tara nai colacola ko ya e na dua na nomudoui qaqalo.

⁴⁷ E ca vei kemudou! ni dou sa tara na kena veivale ni nodrai bulubulu na parofita, era vakamatea ko ira na nomudou qase.

⁴⁸ E dina ga dou sa tukuni kemudou ni dou sa vinakata na nodrai valavala na nomudou qase; ni ra sa vakamatei ira, ka dou sa tara na veivale ni nodrai bulubulu.

⁴⁹ O koya oqo sa kaya kina na vuku ni Kalou, Au na tala vei ira eso na parofita kei nai apositolo, ia eso vei ira era na vakamatea ka vakacacana:

⁵⁰ me ra tarogi kina nai tabatamata oqo, e na kedra dra na parofita kecega ka vakadavei mai nai vakatekivu kei vuravura;

⁵¹ mai na dra nei Epeli ka yacova na dra nei Sakaraia, ko koya ka vakamatei e na tadrua ni cabocabo-ni-madrali kei na vale ni soro; au sa kaya vakaidina vei kemudou, Ena tarogi kina nai tabatamata oqo.

⁵² E ca vei kemudou, na vu-ni-vunau! ni dou sa kauta tani nai dola ni ka vuku: dou sa sega ni curu kina koi kemudou, ia dou sa tarovi ira talega era sa curu tiko kina.

⁵³ Ia ni sa kaya tiko vei ira ko koya na veika oqo, sa vakatekivu me cikeva vakalevu na kere vosa vua ko ira na vunivola kei ira na Farisi me vuqa na ka me kaya;

⁵⁴ a ra sa lawakitaka, a ra sa qara me ra rogoca e dua na ka mai na gusuna, me ra vakaucacataki koya kina.