Lele i Jeremaia 5 - Vakavakadewa Makawa

Sa tukuna ko Saioni na ka ca sa yacovi koya, ka sa masu vua na Kalou, 1-22.

¹ Mo ni nanuma, Jiova, na ka sa yacovi keimami: Ni vakasama, ka raica na neimami vakalialiai.

² A neimami vanua, sa soli me nodra na kai tani; A neimami veivale, sa soli me nodra na vulagi.

³ Keimami sa luveniyali ka sega ni vakatamani, Sa vaka na yada na tina i keimami.

⁴ Keimami sa volia e nai lavo na wai keimami sa gunuva; A neimami buka, sa volitaki vei keimami.

⁵ Sa bitaki na domo i keimami: Keimami sa oca, ka sega ni vakacegu.

⁶ Keimami sa solia na liga i keimami vei ira na kai Ijipita, Vei ira talega na kai Asiria, me keimami mamau e na madrai.

⁷ Era sai valavala ca ko ira na tama i keimami; a ra sa yali ga; Ia keimami sa saumi e na vuku ni nodra caka cala.

⁸ Ko ira na tamata wale, era sa veitaliataki keimami: Sa sega e dua me vakabulai keimami mai na ligadra.

⁹ Keimami bolea na mate ka qai rawa kina na keimami kakana, E na vuku ni seleiwau mai veikau.

¹⁰ Na kuli i keimami, sa loaloa mai me vaka na lovo, Ni sa ka rerevaki na dausiga.

¹¹ Era sa yarataki ira na yalewa ni Saioni; Kei ira na goneyalewa e na veikoro vaka-Juta.

¹² Era sa rubeci ira na turaga e na ligadra: A matadra na qase sa sega ni dokai.

¹³ Era kauti ira na cauravou me ra qaqi sila; Kei ira na gone, era cola buka era sa bale.

¹⁴ Ko ira na qase, era sa sega tale ni tiko mai na matamata-ni-koro; Ko ira na cauravou, era sa mudu ni qiri lali.

¹⁵ Sa mudu na marau e na loma i keimami; Sa vuki me tagi na neimami meke.

¹⁶ Sa lutu tani nai sala vakaturaga mai na ulu i keimami: Ulei koi keimami oqo, ni keimami sai valavala ca!

¹⁷ E na vuku ni ka oqo sa bibi kina na loma i keimami; E na vuku ni ka oqo sa butobuto kina na mata i keimami.

¹⁸ E na vuku ni ulu-ni-vanua ko Saioni, ni sa lala tu, Sa lako voli e delana na fokise.

¹⁹ Sai kemuni, Jiova, ka tiko ga ka tawa mudu; Kei na nomuni tikotiko vakaturaga mai nai tabatamata e dua ki nai tabatamata e dua.

²⁰ A cava ko ni sa guilecavi keimami kina ka tawa mudu, Ka sa biuti keimami vakadede sara?

²¹ Mo ni vakalesui keimami vei kemuni, Jiova, keimami na qai lesu mai; Mo ni vakavinakataka tale na neimami tiko me vaka e na gauna eliu.

²² Ni kemuni sa biuti keimami vakaidina sara; Ko ni sa cudruvi keimami vakalevu.