Lele i Jeremaia 3 - Vakavakadewa Makawa

Ko ira na yalododonu era sa tagicaka na ka rarawa sa yaco vei ira, 1-21. Ni ra vakananuma na loloma ni Kalou era sa vakararavi tiko vua, 22-36. Era vakatusa na lewa ni Kalou ni ka dodonu, 37-54. Era sa masuti koya me vakabulai ira, 55-63, ka cudruvi ira na nodra meca, 64-66.

¹ Koi au na tamata sa kune ka rarawa e na kuita ni nona cudru.

² Sa tuberi au ko koya, ka kauti au ki na butobuto, ka segai ki na rarama.

³ Sa vuki tani vei au ko koya; ka sa dua tani vei au na ligana e na siga ka bogi.

⁴ Sa vakavucataka ko koya na lewequ kei na kuliqu; sa musuka na suiqu.

⁵ Sa viribai vei au ko koya, ka sa vakavolivoliti au e na ka gaga kei na oca.

⁶ Sa vakatikori au ko koya e na veitikina butobuto, me'u vakataki ira sa mate makawa.

⁷ Sa viribaiti au ko koya, me'u kua ni lako tani rawa: sa vakabibitaka na sinucodo ka'u sa vesu kina.

⁸ Io ni'u sa tagi ka qoqolou, sa latia tani na noqu masumasu.

⁹ Sa vakalatia na noqu sala e na vatu sa ta; a noqu sala sa vakavevetaka ko koya.

¹⁰ Sa lawavaki au ko koya vaka e dua na pera, ka vaka na laioni e na yasana vuni.

¹¹ A noqu i lakolako sa vukica ko koya, ka sa dresudresuki au: sa vakaluveniyalitaki au.

¹² Sa loqata na nona dakai ko koya, a sa vakaturi au me'u ka me vanataka kina na gasau.

¹³ Sa vakacoba ki na noqu i ivi na gasau ni nona taga gasau.

¹⁴ Au a ka ni veivakalialiai vei ira kecega na kai noqu; ka ra seretaki au e na siga ka bogi.

¹⁵ Sa vakamamautaki au ko koya e na duva gaga, sa vakamatenitaki au e na wai gaga sara.

¹⁶ Sa vorota talega na batiqu e na laqere, sa buluti au e na dravusa.

¹⁷ Ia ko sa biuta tani vakayawa na vakacegu mai na yaloqu: au sa guilecava na vinaka.

¹⁸ Ia ka'u a kaya, Sa takali na noqu kaukauwa kei na ka ka'u nuitaka maivei Jiova.

¹⁹ Mo ni nanuma na noqu rarawa kei na noqu tiko sese, na duva gaga kei na wai gaga.

²⁰ Sa daunanuma tiko kina na yaloqu ka'u sa malumalumu ga e loma.

²¹ A ka oqo ka'u sa vakananuma e lomaqu, o koya ka'u sa nuitaka kina na vinaka.

²² A loloma ga i Jiova eda sa sega ni vakaoti kina, ka ni sa sega ni mudu rawa na nona yalololoma.

²³ Sa ka vou e na veimataka, sa ka levu na nomuni yalodina.

²⁴ Sa noqu i votavota ko Jiova, sa kaya na yaloqu, o koya oqo ka'u na nuitaki koya kina.

²⁵ Sa yalovinaka ko Jiova vei ira era sa waraki koya, io ki na yalo sa qarai koya.

²⁶ Sa kilikili kaya na tamata me nuitaka, ka me waraka vakayalomalua talega na veivakabulai maivei Jiova.

²⁷ Sa kilikili kaya na tamata me vakataqara vua nai vua ni sa cauravou tiko ko koya.

²⁸ Me sa tiko duadua ko koya ka galu toka, ka ni sa virikotora vua ko Koya:

²⁹ Me vunia na gusuna e na qele; de dua beka na ka me vakanuinui kina:

³⁰ Me vagolea na baluna vua sa yaviti koya: me sa oso sara ko koya e na veivakalialiai.

³¹ Ni na sega ni biuti keda ko koya na Turaga ka sega ni mudu:

³² Ia ke sa ia na veivakararawataki ko koya, ena ia talega na loloma me vaka na kena levu ni nona yalololoma.

³³ Ni sa sega ni vu mai na lomana me cudruvi ira na tamata, se me vakararawataka na lomadra.

³⁴ Me buturaki ira kece e ruku ni yavana era vesuki e vuravura,

³⁵ Me lewai koya vakatani na tamata e na ka sa dodonu kina, e na mata i Koya sa Cecere sara,

³⁶ Se me vakacaucautaka na tamata ni sa lewai, sa sega ni vinakata na ka oqori ko koya na Turaga.

³⁷ E dua li sa vosa, ka sa mana na nona vosa, ni sa sega ni vakarota ko koya na Turaga?

³⁸ Sa sega beka ni lako tani mai na gusu i Koya sa Cecere sara, na ca kei na vinaka?

³⁹ A cava sa didi kina e dua na tamata sa bula, e dua na tamata sa cudruvi e na vuku ni nonai valavala ca?

⁴⁰ Me da dikeva mada na nodai valavala, ka vakataroga, ka lesu tale vei Jiova.

⁴¹ Me da masu cake e na lomada ni da dodoka na ligada vua na Kalou ni lomalagi.

⁴² Koi keimami, keimami a talaidredre ka sa yalovakatani: koi kemuni ko ni a sega ni ia na veivakadonui.

⁴³ Ko ni sa tabonaka e na cudru, ka sa vakasavi keimami: ko ni sa ia na veivakamatei, ka sega ni yalololoma.

⁴⁴ Ko ni sa tabonaki kemuni e na o, me kakua ni basika yani na neimami masu.

⁴⁵ Ko ni sa cakavi keimami mei soqosoqo ga ka benu e na kedra maliwa na veimataqali.

⁴⁶ Era sa dalaga vei keimami ko ira na neimami meca kecega.

⁴⁷ A rere kei nai cori sa yacovi keimami; na veivakalalataki kei na veivakarusai.

⁴⁸ Sa dave tu mai na mataqu na uciwai levu, e na vuku ni kena rusa na goneyalewa ni kai noqu.

⁴⁹ A wai ni mataqu, sa tiri sobu tiko, ka sega ni mudu, sa sega ni cegu vakalailai,

⁵⁰ Ka me rai sobu mada mai ko Jiova, ka raica mai lomalagi.

⁵¹ Sa yavalata na lomaqu na mataqu e na vukudra kecega na goneyalewa ni noqu koro.

⁵² Era vakasavi au sara na noqu meca, me vaka na manumanu vuka, ka sega na vuna.

⁵³ Era sa muduka tani e nai keli na noqu bula, ka viritaka mai vei au na vatu.

⁵⁴ Sa luvuca na uluqu na wai; au a qai kaya, Au sa muduki laivi.

⁵⁵ Au a kaciva na yacamuni, Jiova, mai nai keli titobu.

⁵⁶ Ko ni a rogoca na domoqu: ni kakua ni tabonaka na daligamuni ki na noqu cegu, kei na noqu tagi.

⁵⁷ Ko ni sa toro voleka mai e na siga ka'u a kacivi kemuni kina: ko sa kaya, Mo kakua ni rere.

⁵⁸ Ko ni sa totaka na yaloqu e na veilewai, kemuni na Turaga; io ko ni sa vakabulai au.

⁵⁹ Ko ni sa raica, Jiova, na noqu vakacacani: mo ni lewa ga e na vukuqu.

⁶⁰ Ko ni sa raica kecega na nodra cudru, kei na nodra vere kecega era bukia vei au.

⁶¹ Ko ni sa rogoca na nodra veivakalialiai, Jiova, na nodra vere kecega era bukia vei au;

⁶² Na tebenigusudra era tu cake me ra bolei au, kei na nodra i naki ca vei au e na siga ka bogi.

⁶³ A nodra tiko sobu kei na nodra tu cake, mo ni vakaraica matua; sai au ga era seretaka.

⁶⁴ Ko ni na sauma vei ira, Jiova, me vaka na cakacaka ni ligadra.

⁶⁵ Ko ni na soli ira me kaukauwa na lomadra, oqo na nomuni cudruvi ira.

⁶⁶ Ko ni na vakasavi ira e na nomuni cudru, ka vakarusai ira tani mai na ruku i lomalagi, Jiova.