Lako Yani 7 - Vakavakadewa Makawa

Sa talai tale vei Fero ko Mosese, a sa vuki me gata nai titoko i Eroni, 1-10. Era kitaka vakakina na daucaka mana, ia sa kaukauwa na loma i Fero, 11-13. Sa talai Mosese tale vei Fero ko Jiova, 14-18. Sa vuki me dra na uciwai, 19-25.

¹ A sa kaya vei Mosese ko Jiova, Raica, au sa qisi iko mo vaka na Kalou vei Fero: ia ena nomu Parofita ko Eroni na tuakamu:

² mo tukuna na ka kecega ka'u sa vakarota vei iko: ia ko Eroni na tuakamu, ena vosa vei Fero, me talai ira tani na Isireli e na nona vanua:

³ ia ka'u na vakaukauwataka na loma i Fero, ka vakavuqataka na noqu i vakatakilakila, kei na noqu cakacaka mana, e na vanua ko Ijipita:

⁴ ia ena sega ni vakarorogo vei kemudrau ko Fero, ka'u na tabaki Ijipita e na ligaqu, ka kauti ira tani mai na noqu veivavakoso, na noqu tamata na Isireli, mai na vanua ko Ijipita, e na cudru levu:

⁵ Ia era na kila na kai Ijipita ni sai au ko Jiova, ni'u sa dodoka yani na ligaqu ki Ijipita, ka kauti ira tani na Isireli mai na kedra maliwa.

⁶ A sa kitaka ko Mosese kei Eroni me vaka ka vakarota vei rau ko Jiova: erau sa kitaka vakakina.

⁷ Ia sa walusagavulu na yabaki i Mosese, ka walusagavulu ka tolu na yabaki i Eroni, ni rau sa vosa vei Fero.

⁸ A sa vosa vei Mosese kei Eroni ko Jiova, ka kaya,

⁹ Ni sa vosa vei kemudrau ko Fero, ka kaya, Drau vakatakila mai e dua na cakacaka mana me kemudrau i vakadinadina: mo qai kaya vei Eroni, Mo taura na nomu i titoko, ka viritaka e na mata i Fero, ia ena qai vuki me gata.

¹⁰ A rau sa la'ki curu vei Fero ko Mosese kei Eroni, a rau sa kitaka me vaka ka vakarota ko Jiova: a sa viritaka na nonai titoko ko Eroni e na mata i Fero, kei na matadra na nona tamata, a sa vuki me gata.

¹¹ Sa qai kacivi ira na tamata vuku ko Fero, kei ira era daucakaisausau: a ra sa kitaka vakakina na daucaka-mana mai Ijipita e na nodra i valavala vuni.

¹² A ra sa dui viritaka na tamata yadua na nonai titoko, a sa vuki me gata: ia nai titoko i Eroni sa tiloma na nodra i titoko.

¹³ A sa kaukauwa na loma i Fero, a sa sega ni vakarorogo kina vei rau: me vaka ka kaya ko Jiova.

¹⁴ A sa kaya vei Mosese ko Jiova, Sa kaukauwa na loma i Fero: sa bese ko koya ni laivi ira na tamata me ra lako:

¹⁵ mo lako vei Fero e na mataka; raica, sa lako yani ki na wai; ia mo tu e na bati ni uciwai, me waraki koya; ia nai titoko ka vuki me gata mo kauta e ligamu.

¹⁶ Ia mo kaya vua, Ko Jiova na nodra Kalou na Iperiu sa talai au vei kemuni, me'u kaya, Mo ni laivi ira na noqu tamata me ra lako, me ra qaravi au mai na lekutu: ia raica, ko ni sa bese tiko ni vakarorogo:

¹⁷ Sa vosa vakaoqo ko Jiova, E na ka oqo ko ni na kila ni sai au ko Jiova. Raica, ka'u na yavita na wai ni uciwai e nai titoko sa tu e ligaqu, ia ena vuki kina me dra:

¹⁸ ia ena mate na ika sa tiko e na uciwai, ena boi ca talega na uciwai; a ra na cata ni gunuva na wai ni uciwai ko ira na kai Ijipita.

¹⁹ Sa vosa talega vei Mosese ko Jiova, Mo kaya vei Eroni, Mo taura na nomu i titoko, ka dodoka na ligamu vaka ki na wai e Ijipita, vaka ki na nodra uciwai lalai, vaka ki na nodra uciwai, ka vaka ki na nodra drano, ka vaka ki na nodra i keli-wai kecega, ka me vuki me dra; ka na tiko ga na dra e na veiyasana kecega e Ijipita, e nai gunugunu kau, kei nai gunugunu vatu.

²⁰ A rau sa kitaka vakakina ko Mosese kei Eroni, me vaka ka vakarota ko Jiova; ni sa dulaka nai titoko, ka yavita na wai mai na uciwai, ni sa raica tiko ko Fero, ka ni ra raica talega na nona tamata; a sa vuki me dra mai na wai kecega sa tiko e na uciwai.

²¹ A sa mate na ika sa tiko e na uciwai; a sa boi ca mai na uciwai, a ra sa sega ni gunuva rawa na kai Ijipita na wai mai na uciwai; a sa tiko na dra e na veiyasana kecega mai Ijipita.

²² A ra sa kitaka vakakina na daucaka-mana mai Ijipita e na nodra i valavala vuni: ka sa kaukauwa na loma i Fero, a sa sega ni vakarorogo vei rau: me vaka ka kaya ko Jiova.

²³ A sa lesu ko Fero ka lako ki na nona vale, a sa sega talega ni vakasamataka na ka oqo.

²⁴ A ra sa keli voleka ki na uciwai ko ira kecega na kai Ijipita me ra kunea e dua na wai ni gunu; ni ra sa sega ni gunuva rawa na wai ni uciwai.

²⁵ A sa qai bogi vitu, ni sa yavita oti na uciwai ko Jiova.