Lako Yani 6 - Vakavakadewa Makawa

Sa kaya vei Mosese ko Jiova ni na vakabulai ira na Isireli, 2-13. A kawa i Rupeni kei Simioni, 14,15 A kawa i Livai 16-30.

¹ A sa kaya vei Mosese ko Jiova, Oqo, ko na raica na ka ka'u na kitaka vei Fero: ni na laivi ira me ra lako e na vuku ni liga kaukauwa, ia e na vuku ni liga kaukauwa ena vakasevi ira tani e nona vanua.

² A sa vosa vei Mosese na Kalou, ka kaya vua, Koi au ko Jiova:

³ ia ka'u a rairai vei Eparaama, vei Aisake, kei Jekope, ni'u Kalou Kaukauwa duaduaga, ia ka'u a sega ni kilai vei ira e na yacaqu ko JIOVA

⁴ Ia ka'u a vakataudeitaka talega na noqu vosa ni yalayala vei iratou, me'u solia vei iratou na vanua ko Kenani, na vanua era veilakoyaki voli kina, eratou a tiko vulagi kina:

⁵ Ia ka'u sa rogoca talega na nodra vutugu na Isireli, era sa vakabobulataka ko ira na kai Ijipita; ia ka'u sa nanuma na noqu vosa ni yalayala.

⁶ O koya oqo mo kaya kina vei ira na Isireli, Sai au ko Jiova, ia ka'u na kauti kemuni tani mai na nodra i lesilesi-bibi na kai Ijipita, ia ka'u na sereki kemuni mai na nodra veivakabobulataki, ka vakabulai kemuni e na ligaqu sa dodo tu, kei na cudru levu:

⁷ ia ka'u na kauti kemuni mai mo ni noqu tamata, ia ka'u na nomuni Kalou: ia kemuni na kila ni sai au ko Jiova na nomuni Kalou, ko koya sa kauti kemuni tani mai na nodra i lesilesi-bibi na kai Ijipita:

⁸ ia ka'u na kauti kemuni ki na vanua ka'u a bubului kina me'u solia vei Eparaama, vei Aisake, kei Jekope; ia ka'u na solia vei kemuni mo ni kenai taukei: koi au ko Jiova.

⁹ A sa vosa vakakoya vei ira na Isireli ko Mosese: a ra sa sega ga ni vakarorogo vei Mosese ni ra sa yalo lekaleka, ka ni ra sa vakabobulataki vakararawa sara.

¹⁰ A sa vosa vei Mosese ko Jiova, ka kaya,

¹¹ Mo curu mada, mo kaya vei Fero na tui Ijipita, me sereki ira na Isireli me ra lako tani e nona vanua.

¹² A sa vosa e na mata i Jiova ko Mosese, ka kaya, Raica, ko ira na Isireli era sa sega ni vakarorogo vei au; ka na rogoci au vakacava ko Fero, ni'u sa tebenigusu berabera?

¹³ A sa vosa vei Mosese kei Eroni ko Jiova, ka vakaroti rau me rau lako vei ira na Isireli, vei Fero talega na tui Ijipita, ka me kauti ira tani na Isireli mai na vanua ko Ijipita.

¹⁴ Ko ira oqo sa turaga e na mataqali ni nodra qase: ko iratou na tagane na luve i Rupeni, na ulumatua i Isireli; ko Enoke, kei Palu, ko Esironi, kei Kamai: sai ira oqo na mataqali i Rupeni.

¹⁵ Ia na tagane na luve i Simioni; ko Jimueli, kei Jamini, kei Oati, kei Jakini, kei Soari, kei Saula, a luvena e dua na yalewa ni Kenani: sai ira oqo na mataqali i Simioni.

¹⁶ Ia oqo na yacadratou na tagane na luve i Livai, e na nodra i tabatamata; ko Kerisoni, kei Koaca, kei Mirari: ia na yabaki sa bula kina ko Livai, sa dua na drau ka tolusagavulu ka vitu.

¹⁷ A luve i Kerisoni; ko Lipini, kei Semeai, e na nodrau mataqali.

¹⁸ Ia na luve i Koaca; ko Amirami, kei Isari, kei Epironi, kei Usieli: ia na yabaki sa bula kina ko Koaca, e dua na drau ka tolusagavulu ka tolu.

¹⁹ Ia na luve i Mirari erau tagane; ko Mali, kei Musi. Sai ira oqo na mataqali i Livai, e na nodra i tabatamata.

²⁰ Ia ko Amirami sa vakawati kei Jokapeti na gane i tamana; a sa sucu na luvedrau ko Eroni kei Mosese: ia na yabaki sa bula kina ko Amirami, e dua na drau ka tolusagavulu ka vitu.

²¹ Ia na tagane na luve i Isari; ko Kora, kei Nefeki, kei Sikiri.

²² Ia na luve i Usieli; ko Misaeli, kei Elisapani, kei Siciri.

²³ Ia ko Eroni sa vakawati kei Elisepa, ko koya na luve i Aminatapi, na gane i Nasoni; a sa vakasucumi Netapi, kei Epaiu, kei Eliesa, kei Icama, ko koya.

²⁴ Ia na tagane ka luve i Kora; ko Asiri, kei Elikana, kei Epiasafi: sai ira oqo na nodra mataqali na luve i Kora.

²⁵ Ia ko Eliesa, na luve i Eroni, sa vakawati kei na dua vei ira na yalewa na luve i Putieli; a sa vakasucumi Finiase vua. Sa vakaoqo na turaga vei ira na qase ni Livai, e na nodra veimataqali.

²⁶ Koi rau oqo ko Eroni kei Mosese sa kaya kina ko Jiova, Drau kauti ira na Isireli mai na vanua ko Ijipita me vaka na nodra veivavakoso.

²⁷ Koi rau oqo ka vosa vei Fero na tui Ijipita, me rau kauti ira na Isireli mai Ijipita: koi rau oqo ko Mosese kei Eroni ko ya.

²⁸ Ia e na siga ka vosa kina vei Mosese ko Jiova mai na vanua ko Ijipita,

²⁹ sa vosa vei Mosese ko Jiova, ka kaya, Koi au ko Jiova: mo tukuna vei Fero na tui Ijipita na ka kecega ka'u sa kaya vei iko.

³⁰ A sa kaya e na mata i Jiova ko Mosese, Raica, au sa tamata gusu berabera, ka na vakarorogo vakacava vei au ko Fero?