Lako Yani 4 - Vakavakadewa Makawa

A ka mana sa kaya ko Jiova me cakava ko Mosese, 1-9. Sa kaya ko koya me rau lako vata kei Eroni, 10-17. Sa lako ko Mosese mai Mitiani, 18-23. Sa ciliva na luvena ko Sipora, 24-26. Erau veitavaki kei Eroni, 27,28. Erau la'ki tukuna na vosa i Jiova vei ira na qase ni Isireli, 29-31.

¹ A vosa ko Mosese, ka kaya, Ia, raica, era na sega ni vakadinati au, se rogoca na domoqu: era na kaya ga, Sa sega ni rairai vei iko ko Jiova.

² A sa kaya vua ko Jiova, A cava oqori e na ligamu? A sa kaya ko koya, Ai titoko.

³ A sa kaya ko koya, Viritaka ki na qele. A sa viritaka ki na qele, a sa vuki me gata; a sa drotaka ko Mosese.

⁴ A sa kaya vei Mosese ko Jiova, Mo dodoka na ligamu, ka taura na buina: a sa dodoka na ligana, ka taura, a sa vuki mei titoko e na ligana:

⁵ me ra vakabauta kina ni sa rairai vei iko ko Jiova na Kalou ni nodra qase, na Kalou i Eparaama, na Kalou i Aisake, na Kalou talega i Jekope.

⁶ Sa kaya talega vua ko Jiova, Mo daramaka mada na ligamu ki na lomaseremu. A sa daramaka ko koya na ligana ki na lomaserena: ka ni sa cavuta tale mai, sa vukavuka na ligana, me vaka na uca-vulavula.

⁷ A sa kaya, Mo daramaka tale na ligamu ki na lomaseremu: A sa daramaka tale na ligana ki na lomaserena; ka ni sa cavuta tale mai na lomaserena, sa vuki tale me tautauvata kei na yagona eliu:

⁸ ia kevaka era sa sega ni vakabauti iko, ka sega ni vakadinata nai vakatakilakila ka caka eliu, era na vakabauta nai vakatakilakila ka caka emuri:

⁹ ia kevaka era sa sega ni vakabauta nai vakatakilakila ruarua oqo, ka sega ni vakarorogo talega ki na domomu, mo qai kauta e dua na wai mai na uciwai, ka sova yani ki na qele mamaca: ia na wai ko na kauta mai na uciwai ena vuki me dra e na qele mamaca.

¹⁰ Sa qai kaya vei Jiova ko Mosese, Kemuni na noqu Turaga, ka'u sa sega ni rawata na vosa, sa sega eliu, ka sega talega oqo ni kemuni sa vosa oti vei au na nomuni tamata: ni'u sa dauvosa vakamalua, ka yame berabera.

¹¹ A sa kaya vua ko Jiova, Ko cei sa cakava na gusu ni tamata? se ko cei sa cakava na galu, kei na didivara, kei na matarai, kei na mataboko? koi au ko Jiova, se segai?

¹² ia oqo, mo lako, ka'u na tiko kei na gusumu, ka vakavulici iko e na ka mo kaya.

¹³ A sa kaya ko koya, Kemuni na noqu Turaga, mo ni talai koya ga sa dodonu mo ni tala.

¹⁴ A sa tubu na cudru i Jiova vei Mosese, a sa kaya, Sa sega beka ni tuakamu ko Eroni na luve i Livai? au sa kila sa dau ni vosa ko koya: ka raica, sa lako talega mai me tavaki iko: ia ni sa raici iko, ena reki na yalona:

¹⁵ Ia ko na vosa vua, ka solia na vosa ki na gusuna: ia ka'u na tiko kei na gusumu, kei na gusuna, ka vakavulici kemudrau e na ka mo drau cakava:

¹⁶ ia ena tukuna na nomu vosa ko koya vei ira na tamata: ia ena vaka dina na gusumu ko koya, ia ko iko, ko na vaka na Kalou vua:

¹⁷ ia ko na kauta e ligamu nai titoko oqo, ko na kitaka kina na veivakatakilakila.

¹⁸ A sa lako yani ko Mosese, ka lesu vei Jecoro na vugona, a sa kaya vua, Me'u lako mada, me'u lesu tale vei ira na wekaqu era sa tiko mai Ijipita, ka raica se ra bula tiko se segai. A sa kaya vei Mosese ko Jecoro, Mo lako e na vakacegu.

¹⁹ Ia sa kaya vei Mosese ko Jiova mai Mitiani, Mo ia, mo lesu ki Ijipita: ni ra sa mate kece na tamata era via vakamatei iko.

²⁰ A sa kauta na watina kei rau na luvena tagane ko Mosese, ka vakavodoki iratou e na asa, a sa lesu ki na vanua ko Ijipita: a sa kauta ko Mosese nai titoko ni Kalou e na ligana.

²¹ A sa kaya vei Mosese ko Jiova, Ni ko sa lesu tale ki Ijipita, mo nanuma mo kitaka e na mata i Fero na cakacaka mana kecega ka'u sa lesia vei iko mo cakava: ia koi au, ka'u na vakaukauwataka na yalona, ka na sega ni laivi ira na tamata me ra lako:

²² ia ko na kaya vei Fero, Sa kaya ko Jiova, Ko Isireli, na luvequ, na noqu ulumatua:

²³ ia ka'u sa kaya vei iko, Mo laiva na luvequ me lako yani, me qaravi au: ia kevaka ko sa bese ni laiva me lako, raica, ka'u na vakamatea na luvemu, na nomu ulumatua.

²⁴ Ia ni sa tiko e na dua na bure e na gaunisala, sa veitata kaya ko Jiova, ka segata me vakamatea.

²⁵ A sa taura e dua na vatu gata ko Sipora, ka drutia laivi na vusona na luvena, ka biuta ki yavana, ka kaya, Na watiqu ni vakadave dra ko iko.

²⁶ Sa qai biuti koya me lako ko koya: a sa kaya na yalewa, Na watiqu sa vakadave dra, e na vuku ni veicelivi.

²⁷ A sa kaya vei Eroni ko Jiova, Mo lako ki na loma ni vanua, mo tavaki Mosese. A sa lako ka tavaki koya mai na ulu-ni-vanua ni Kalou, ka reguca.

²⁸ A sa tukuna vei Eroni ko Mosese na vosa kecega i Jiova sa talai koya kina, kei nai vakatakilakila kecega sa vakarota vua.

²⁹ A rau sa lako ko Mosese kei Eroni, ka vakasoqoni ira kece vata na nodra qase na Isireli:

³⁰ a sa tukuna ko Eroni na vosa kecega sa vosataka vei Mosese ko Jiova, ka kitaka nai vakatakilakila e matadra na tamata.

³¹ A ra sa vakabauta ko ira na tamata; ia ni ra sa rogoca sa talevi ira na Isireli ko Jiova, ka sa raica na nodra rarawa, era sa qai cuva ka ia na lotu.