Lako Yani 10 - Vakavakadewa Makawa

Sa ca ko Ijipita e na vuku ni vodre, 1-20; kei na butobuto, 21-23; sa qai rere ko Fero, 24-26. Sa vakaukauwataka na loma i Fero ko Jiova, 27-29.

¹ A sa kaya vei Mosese ko Jiova, Mo la'ki curu vei Fero: ni'u sa vakaukauwataka na lomana, kei na lomadra na nona tamata, me'u cakava kina na noqu i vakatakilakila oqo e na kedra maliwa:

² mo tukuna talega kina e daligadra na luvemu, kei na makubumu, na ka ka'u a kitaka mai Ijipita, kei na noqu i vakatakilakila, ka'u sa cakava e na kedra maliwa; mo dou kila kina ni sai au ko Jiova.

³ A rau a la'ki curu vei Fero ko Mosese kei Eroni, a rau sa kaya vua, Sa vosa vakaoqo ko Jiova na nodra Kalou na Iperiu, A cava na kena dede ni ko sa bese tiko ni vakamalumalumutaki iko vei au? mo laivi ira na noqu tamata me ra lako, me ra qaravi au:

⁴ ia kevaka ko sa bese tiko ni laivi ira na noqu tamata me ra lako, raica, e na mataka ka'u na kauta mai na vodre ki na nomu veiyasana:

⁵ ia era na ubia na dela ni vanua, me kakua ni raici rawa na vanua: a ra na kania na ka sa vo ka bula tiko, o koya sa vakavoca vei kemuni na uca-cevata, ka kania na kau kecega sa tubu mai na vanua me kemudou:

⁶ ia ena oso kina na nomu veivale, kei na nodra veivale kecega era qaravi iko, kei na nodra veivale na kai Ijipita kecega; a ka era sa sega ni raica na tamamu, se ko ira na tubumu, mai na gauna era a tiko kina e dela ni vanua ka yacova na gauna oqo. A sa vuki ko koya, ka curu tani maivei Fero.

⁷ A ra sa kaya vei Fero ko ira era qaravi koya, A cava na kena dede me vakavuna tiko na ca vei keda na tamata oqo? mo ni laivi ira na tamata me ra lako, me ra qaravi Jiova na nodra Kalou: ko ni sa sega tiko ni kila rawa ni sa ca ko Ijipita?

⁸ A rau sa kau tale mai vei Fero ko Mosese kei Eroni: a sa kaya vei rau ko koya, Ni lako, ni qaravi Jiova na nomuni Kalou: ia ko cei li me ra lako?

⁹ A sa kaya ko Mosese, Keimami na lako vata kei na neimami cauravou kei na neimami qase, na neimami gonetagane kei na neimami goneyalewa; keimami na lako vata kei na neimami qele ni sipi kei na neimami qele ni pulumokau; ni keimami sa na la'ki ia na soqoni levu vei Jiova.

¹⁰ A sa kaya vei rau ko koya, Me tiko vakakina vei kemuni ko Jiova, me vaka ka'u na laivi kemuni me lako kei ira na nomuni lalai: ni kila mada; sa voleka vei kemuni na ca:

¹¹ Me kakua ni vaka ko ya: mo ni lako ga na tamata bula, ka qaravi Jiova; ni sai koya ga drau a kerea. A rau sa vakasavi tani e na mata i Fero.

¹² A sa kaya vei Mosese ko Jiova, Mo dodoka yani na ligamu me donuya na vanua ko Ijipita, me lako mai na vodre, me ra lakova na vanua ko Ijipita ka kania na co kecega ni vanua, io na ka kecega sa vakavoca na uca-cevata.

¹³ A sa dodoka na nonai titoko ko Mosese vaka ki na vanua ko Ijipita, a sa kauta mai na cagi mai na tu-i-cake ko Jiova me liwava na vanua e na siga taucoko ko ya, kei na bogi taucoko; ia ni sa kida na mataka, sa qai kauta mai na vodre na cagi mai na tu-i-cake.

¹⁴ Ia na vodre sa lakova na vanua taucoko ko Ijipita, ka tiko ga e na veiyasana kecega mai Ijipita: era ka rerevaki sara, sa sega na vodre e tautauvata kaya eliu, ena sega talega me tautauvata emuri.

¹⁵ Ia era sa ubia na dela ni vanua taucoko, a sa butobuto kina na vanua; a ra sa kania vakaoti na co ni vanua, kei na vua ni kau kecega sa vakavoca na uca-cevata: a sa sega na ka drokadroka sa vo e na veikau, se na veico, e na vanua taucoko ko Ijipita.

¹⁶ Sa qai kusarawa ko Fero ka kacivi Mosese kei Eroni; a sa kaya, Au sai valavala ca vei Jiova na nomudou Kalou, vei kemudrau talega:

¹⁷ ia mo lomani au vakadua ga oqo mo kakua mada ni cudruvi au e na noqu i valavala ca, ia drau masuti Jiova na nomudrau Kalou, me kauta tani vei au na mate ca ga oqo.

¹⁸ A sa lako tani vei Fero ko koya, ka masuti Jiova.

¹⁹ A sa vakasuka na cagi ko Jiova me vualiku kaukauwa sara, a sa kauta tani na vodre, ka biuta ki na Wasa Damudamu; sa sega ni vo e dua na vodre e na veiyasana kecega mai Ijipita.

²⁰ Ia sa vakaukauwataka na loma i Fero ko Jiova, a sa sega kina ni laivi ira na Isireli me ra lako.

²¹ A sa kaya vei Mosese ko Jiova, Mo dodoka na ligamu vaka ki lomalagi, me yaco mai na butobuto e na vanua ko Ijipita, io me ra vakayayamo voli kina.

²² A sa dodoka na ligana vaka ki lomalagi ko Mosese, a sa yaco na butobuto loaloa e na vanua taucoko ko Ijipita ka bogi tolu:

²³ era sa sega ni veiraici, a sa sega e dua na tamata sa tu cake mai na nona tikina, ka bogi tolu: ia sa tiko na rarama e na nodra veivale kecega na Isireli.

²⁴ A sa kacivi Mosese ko Fero, ka kaya, Mo ni lako, mo ni qaravi Jiova; me ra tiko ga na nomuni sipi, kei na nomuni pulumokau: me ra lako talega kei kemuni na nomuni lalai.

²⁵ A sa kaya ko Mosese, Mo ni solia talega vei keimami nai soro kei nai soro kama, me keimami vakacabora vei Jiova na neimami Kalou:

²⁶ A neimami manumanu talega ena lako vata kei keimami; ena sega ni vo e dua na ququ ni manumanu; ni sai koya me keimami kauta maikina me qaravi Jiova na neimami Kalou; ni keimami sa sega ni kila eliu na ka me keimami qaravi Jiova kina, ia ni keimami sa yaco ki na tikina ko ya keimami na qai kila.

²⁷ Ia sa vakaukauwataka na loma i Fero ko Jiova, a sa bese kina ni laivi ira me ra lako.

²⁸ A sa kaya vua ko Fero, Mani lako tani vei au, qarauni iko, mo kakua tale ni raica na mataqu; ko na mate ga e na siga ko sa raica kina na mataqu.

²⁹ A sa kaya ko Mosese, Sa vinaka na nomuni vosa, au na sega tale ni raica na matamuni.