Lako Yani 1 - Vakavakadewa Makawa

Era sa tubu me lewe vuqa na kawa i Isireli mai Ijipita, 1-7. Sa vakacacani ira ko ira na kai Ijipita, ka vakamatea na luvedra tagane, 8-22.

¹ Ia oqo na yacadra na luve i Isireli, era lako vata kei Jekope ki Ijipita; a tamata yadua kei na nona lewe-ni-vale ka lako mai:

² ko Rupeni, ko Simioni, ko Livai, kei Juta,

³ ko Isakari, ko Sepuloni, kei Penijamini,

⁴ ko Tani, kei Nafitalai, ko Kata, kei Aseri.

⁵ Ia na tamata kecega sa kawa i Jekope era lewe vitusagavulu: ia ko Josefa, sa tiko eliu mai Ijipita.

⁶ A sa mate ko Josefa, kei iratou na tuakana kei na tacina kecega, kei nai tabatamata kecega ko ya.

⁷ A ra sa vakaluveni na luve i Isireli, ka tubu vakalevu, ka ra lewe vuqa mai, ka tubu me ra kaukauwa vakalevu sara; a sa tawa sara kina na vanua vei ira.

⁸ A sa tubu e dua tani na tui me lewai Ijipita, ka sega ni kilai Josefa.

⁹ A sa kaya vei ira na nona tamata ko koya, Raica, ko ira na Isireli era sa lewe vuqa ka kaukauwa, ia koi keda eda sa lewe lailai ka malumalumu:

¹⁰ tou lewa mada, me da cakacaka vaqaseqase vei ira; de ra tubu tiko mai, ka sa yaco e dua nai valu, era na qai la'ki totaki ira na noda meca, ka veivala kei keda, ka lako tani e na vanua oqo.

¹¹ A ra sa qai lesia eso na turaga me lewa na nodra cakacaka, me vakasaurarataki ira e na nodra i tavi bibi. A ra sa tara me nei Fero na koro ni yau, ko Picomi kei Reamisesi.

¹² Ia ni sa levu cake na nodra vakasaurarataki ira, era sa vakalewevuqataki mai kina, ka ra sa tubu tiko. A ra sa rarawa e na vukudra na Isireli.

¹³ Ia ko ira na kai Ijipita, era sa vakasaurarataki ira na Isireli me ra cakacaka vakabibi:

¹⁴ a sa vakararawataka na nodra bula e na cakacaka ni bobula, e na caka lase kei na vatu-buli, kei na cakacaka kecega e na were; ia na nodra cakacaka kecega era sa kitaka era sa vakasaurarataki vakararawa kina.

¹⁵ A sa vosa na tui Ijipita vei rau na vu-ni-kalou vei ira na Iperiu: a yacana e dua ko Sifira, na yacana nai karua ko Pua:

¹⁶ a sa kaya, Ni drau sa vu-ni-kalou vei ira na Iperiu, drau raica nai dabedabe era vakasucu kina; ke sa gonetagane, drau qai vakamatea: ia ke sa goneyalewa, me bula ga.

¹⁷ A rau sa rerevaka na Kalou na vu-ni-kalou, ka sega ni kitaka me vaka ka vakarota vei rau na tui Ijipita: a rau sa vakabulai ira na gonetagane.

¹⁸ A ra kacivi rau na vu-ni-kalou na tui Ijipita, ka kaya vei rau, A cava drau sa cakava kina na ka oqo, ka me vakabulai ira na gonetagane?

¹⁹ A rau sa kaya vei Fero na vu-ni-kalou, Era sa sega dina ni vakataki ira na yalewa ni Ijipita, ko ira na yalewa Iperiu; ni ra sa kaukauwa; era sa vakasucu ni sa bera ni curu vei ira na vu-ni-kalou.

²⁰ A sa caka vinaka kina na Kalou vei rau na vu-ni-kalou: a ra sa lewe vuqa mai na tamata, ka tubu me kaukauwa sara.

²¹ Ia e na vuku ni rau sa rerevaka na Kalou na vu-ni-kalou, sa qisi rau me rau vakaluveni.

²² Sa qai vakaroti ira na nona tamata kecega ko Fero, ka kaya, A gonetagane kecega sa sucu mai, dou biuta laivi ki na uciwai, ia na goneyalewa kecega dou vakabula.