Kolosa 4 - Vakavakadewa Makawa

Sa vakavulici ira na tamata me ra daumasu, ka me rai valavala vakavuku vei ira era sa sega ni lotu, 26. Sa qai ia na loloma vei ira, ka sa tinia nai vola, 718.

¹ Oi kemudou na turaga, dou solia vei ira na tamata na ka e dodonu ka tautauvata; ni dou sa kila sa dua talega na nomudou Turaga mai lomalagi.

² Mo dou daumasu tikoga, ka cikevaka tiko ka vakavinavinaka;

³ ka masulaki keitou talega, me dolava vei keitou na Kalou na katuba ni vosa, me keitou tukuna na ka vuni kei Karisito, o koya kau sa vesu tu kina:

⁴ meu vakaraitaka oqo, me vaka sa kilikili kei au meu tukuna.

⁵ Dou ia tiko nai valavala vuku vei ira e taudaku, ka volia me nomudou na gauna.

⁶ Me ia tikoga na nomudou vosa e na yalovinaka, ka vakatuituinataki e na masima, mo dou kila kina se cava sa dodonu mo dou kaya tale vei ira na tamata yadua.

⁷ Ena tukuna vei kemudou na ka kecega sa yacovi au ko Tikiko, a wekaqu kau sa lomana, kei nai talatala yalodina, kei na noqu i tokani e na Turaga:

⁸ ia kau sa talai koya vei kemudou e na vuku ni ka oqo, mo dou kila na neitou tiko, ka me vakaceguya na yalomudou ko koya;

⁹ oi rau kei Onesimo, na wekaqu sa yalodina kau sa lomana, o koya sa dua vei kemudou. Erau na vakatakila vei kemudou na ka kecega sa caka eke.

¹⁰ Sa loloma yani vei kemudou ko Arisitako keirau sa vesuki vata kaya, kei Marika na luve ni gane i Panapasa, (o koya dou sa vakaroti oti kina: kevaka sa lako vei kemudou, dou vakacegui koya;)

¹¹ kei Jisu, a yacana talega ko Jusito, eratou sa cili. O iratou ga oqo eratou sa daucakacaka vata kei au e na ka ni matanitu ni Kalou, a ratou sa dauvakacegui au.

¹² Sa loloma yani vei kemudou ko Epafira, sa dua vei kemudou, ai talatala i Karisito Jisu, sa daugumatua tikoga ni sa masulaki kemudou, mo dou tu dei ka vinaka sara ka vakasinaiti tu e na ka kece sa loma ni Kalou.

¹³ Niu sa vakadinadina vua, ni sa lomakatakata sara e na vukumudou, e na vukudra talega mai Leotisea, kei na vukudra mai Aiarapoli.

¹⁴ Sa loloma yani vei kemudou ko Luke, na vuniwai lomani, kei Timasa.

¹⁵ Au sa loloma yani vei ira na veiwekani mai Leotisea, vei Nimifa talega, vei ira talega nai soqosoqo lewe ni lotu mai nona vale.

¹⁶ Ia ni sa wili oti nai vola oqo vei kemudou, dou lewa me wili talega vei ira nai soqosoqo lewe ni lotu mai Leotisea; mo dou wilika talega nai vola vei ira ki Leotisea.

¹⁷ Kaya talega vei Akipo, Mo vakaraica na cakacaka ko sa rawata mai vua na Turaga, mo vakayacora sara.

¹⁸ Au sa loloma yani ka vola e na ligaqu dina, koi au ko Paula. Dou nanumi au niu sa vesu tiko. Me nomudou na loloma. Emeni.