Kolosa 3 - Vakavakadewa Makawa

Sa vakarota vei ira ko koya me ra yalovakalomalagi, 14. Me ra yalosavasava sara, 511. Sa vakarota me ra veilomani, ka ia tiko na vakavinavinaka, ka kitaka kecega nai valavala vinaka, 1225.

¹ Ia kevaka dou sa vakaturi cake vata kei Karisito, mo dou vakasaqara na veika maicake, sa tiko kina na Karisito e na liga i matau ni Kalou.

² Dou daunanuma na veika maicake, kakua ga na veika e vuravura.

³ Ni dou sa mate ga, ia na nomudou bula sa vuni vata kei Karisito e na Kalou.

⁴ Ni na rairai mai na Karisito, sa noda vu-ni-bula, dou na qai rairai vata kaya e nai ukuuku.

⁵ O koya mo dou qai vakamatea na veitikimudou vakavuravura, a dauyalewa, nai valavala tawa-savasava, na garogaro ca, na dodomo ca, kei na kocokoco, o koya na dauqarava na kalou lasu:

⁶ ni sa veika oqo sa yaco kina na cudru ni Kalou vei ira era sa dautalaidredre:

⁷ ia koi kemudou talega, dou a ia eliu nai valavala vakakina, ni dou a bula lako vakakina.

⁸ Ia oqo, mo dou luvata na ka kecega oqo, a daucudru, na daulesa, na lomaca, na vosa ca, na vosa dukadukali mai na gusumudou.

⁹ Kakua ni dauveilasuyaki, ni dou sa luvata tu na tamata makawa kei na nonai valavala;

¹⁰ ka dou sa vakasuluma oqori sa vou, o koya sa vakavoui tiko e na vuku me vaka na yaloyalona ka buli koya:

¹¹ sa sega kina ni nanumi se kai Jutia se kai tani, se cili se sega ni cili, na tawa vuku, na kai lekutu, na bobula, nai taukei: ia sa uasivi sara e na ka kecega na Karisito.

¹² O koya mo dou qai vakaisulu me vaka dou sa nona digitaki na Kalou, oi kemudou sa yalosavasava ka daulomani, e na yalo dauloloma, e na yalovinaka, e na yalomalumalumu, e na yalomalua, e na dauvosota vakadede:

¹³ dou veivosoti vakai kemudou, ka kakua ni veicudruvi, kevaka sa dua na ka sa rarawa kina e dua: me vaka sa sega ni cudruvi kemudou na Karisito, mo dou vaka talega kina.

¹⁴ Ia me liu e na ka kecega oqo na dauloloma, o koya sai vau vinaka sara.

¹⁵ Ia me lewa sara e na lomamudou na vakacegu i Karisito, ni dou sa kacivi ki na ka oqo, ni dou sa yago e dua bauga: ia mo dou ia tiko na vakavinavinaka.

¹⁶ Me tiko vakalevu e na lomamudou na vosa i Karisito e na vuku kecega; dou veivakatavulici ka veivunauci vakai kemudou e na same kei na sere kei na meke vakayalo, dou sere tiko vua na Kalou ni sa tiko e na yalomudou na loloma.

¹⁷ Ia na ka kecega dou sa kitaka, se dou vosa se dou cakacaka, me ia kece e na yaca ni Turaga ko Jisu, ko koya dou sa ia tiko kina na vakavinavinaka vua na Kalou na Tamada.

¹⁸ Oi kemudou na yalewa vakawati, mo dou talairawarawa vei ira na watimudou, me v aka sa dodonu vua na Turaga.

¹⁹ Oi kemudou na tagane vakawati, mo dou lomani ira na watimudou, ka kakua ni yaloca vei ira.

²⁰ Oi kemudou na gone, mo dou talairawarawa vei ira na nomudou qase e na ka kecega: ni sa vinaka sara oqo vua na Turaga.

²¹ Oi kemudou na qase, mo dou kakua ni vakacudrui ira na luvemudou, de ra datuvu kina.

²² Oi kemudou na tamata, mo dou talairawarawa vei ira na nomudou turaga vakayago e na ka kecega; kakua ni ia walega e na matanavotu, me vinakati kemudou kina ko ira na tamata; dou ia ga e na loma dina, ni dou sa rerevaka na Kalou:

²³ ia na ka kecega dou sa cakava, kitaka mai na vu ni yalomudou me vaka vua na Turaga, me kakua ni vaka vei ira walega na tamata;

²⁴ ni dou sa kila dou na rawata mai vua na Turaga nai votavota me kenai sau: dou sa qarava na Turaga ko Karisito.

²⁵ Ia ko koya sa caka ca ena rawata na kenai sau ni ca sa cakava; ka sa sega ni vinakati vakailoa e dua na tamata.