Kolosa 1 - Vakavakadewa Makawa

Sa vakavinavinaka e na vukudra ko Paula, a sa vakadinadinataka nai vakavuvuli kei Karisito, a sa masulaki ira, a sa qai tukuni Jisu kei na nodra bula e na vukuna, 129.

¹ Koi au ko Paula, nai apositolo i Jisu Karisito e na lewa ni Kalou, ko Timoci talega na taciqu,

² vei ira era sa lotu ka veiwekani dina, era sa tu vata kei Karisito, era sa tiko mai Kolosa: Me nomudou na loloma, kei na vakacegu, mai vua na Kalou ko Tamada.

³ Keirau sa vakavinavinaka vua na Kalou na Tama i Jisu Karisito na noda Turaga, ka masulaki kemudou e na veisiga,

⁴ ni keirau a rogoca na nomudou vakabauti Karisito Jisu, kei na nomudou loloma vei ira kecega era sa lotu,

⁵ e na vuku ni ka dou sa vakanuinuitaka, o koya sa maroroi mai lomalagi me nomudou, ia dou a rogoca kina e na vosa dina ni tukutuku-vinaka,

⁶ sa yaco vei kemudou, me vaka talega ki vuravura taucoko; a sa vuataka na vuana, ka sa tubu tiko, me vaka talega kina vei kemudou, a sa vakatekivu vata kei na siga dou a rogoca kina, ka kila dina na loloma ni Kalou:

⁷ me vaka dou sa kila maivei Epafira, a neirau i tokani daulomani, ia nai talatala yalodina i Karisito vei kemudou:

⁸ o koya talega sa tukuna vei keirau na nomudou loloma e na Yalo Tabu.

⁹ E na vuku ni ka oqo koi keirau talega, sa vakatekivu vata kei na siga keirau a rogoca kina, keirau sa sega ni mudu kina ni masulaki kemudou, ka masu mo dou vakasinaiti e na nomudou kila na lomana, e na yalomatua kei na vuku vakayalo kecega;

¹⁰ mo dou ia nai valavala e kilikili kei ira sa nona na Turaga, me vinakata kecega ko koya, mo dou vakavuana tiko e na cakacaka vinaka kecega, me tubu cake talega na nomudou kila na Kalou;

¹¹ mo dou kaukauwa mai e na kaukauwa kecega, me vaka na nona kaukauwa vakaidina, me tubu na vosota kecega kei na vosota vakadede e na marau;

¹² mo dou vakavinavinaka vua na Tamada, o koya sa vakarautaki keda me da rawata na kedrai votavota era sa yalosavasava, e na rarama:

¹³ o koya sa vakabulai keda mai na lewa ni butobuto, a sa kauti keda ki na matanitu nei koya na nona Gone ni toko:

¹⁴ ko koya eda sa rawata kina na bula e na vuku ni nona dra, ni sa bokoci na nodai valavala ca:

¹⁵ ko koya na yaloyalo ni Kalou sa sega ni rairai, ka vakatuburi eliu ka qai muri na ka kecega ka caka:

¹⁶ ni sa cakava na ka kecega ko koya, se ra tu mai lomalagi, se ra tu e vuravura, se ra rairai se ra sega ni rairai, se ra veitikotiko vakaturaga, se ra veimatanitu, se ra turaga sa liu, se ra turaga kaukauwa: sa cakava na ka kecega ko koya, ka me nona talega;

¹⁷ a sa bula eliu ko koya sa muri na ka kecega, ka sa vakataudeitaka na ka kecega ko koya.

¹⁸ O koya na ulu talega ni yago, nai soqosoqo lewe ni lotu: o koya nai vakatekivu, na ulumatua mai na mate; me uasivi cake kina ko koya e na ka kecega.

¹⁹ Ni sa vinakati me sinai ko koya e na ka kecega;

²⁰ ka me vakaveivinakatitaki ira kaya na ka kecega e na vukuna, ni sa ia mada na ka ni veivinakati e na nona dra ni sa lauvako ki na kauveilatai; io, e na vukuna ga, se ra tu e vuravura se ra tu mai lomalagi.

²¹ Oi kemudou talega, dou a kai tani eliu ka meca e na vu ni yalomudou e na cakacaka ca, sa qai vakaveivinakatitaki kemudou ko koya,

²² e na yagona vakalewe ni sa mate, me vakaraitaki kemudou kina ni dou sa yalosavasava ka sega ni beitaki rawa ka sega ni vunauci rawa e matana;

²³ kevaka dou sa vakabauta tikoga ka vakataudeitaki ka vakaukauwataki, ka sega ni vukici tani mai nai nuinui ni tukutuku-vinaka dou a rogoca, ka sa vunautaki vei ira na tamata kecega sa tiko e ruku i lomalagi; ia koi au ko Paula au sa lesi meu kenai talatala.

²⁴ Au sa qai marau niu sa vakararawataki e na vukumudou, ka vakayacora e na yagoqu na kena vo ni rarawa e na vuku i Karisito, e na vuku ni yagona, ko ya nai soqosoqo lewe ni lotu:

²⁵ au sa lesi kina meu kenai talatala, me vaka nai lesilesi ni Kalou, au sa lesi kina e na vukumudou, meu vakayacora na vosa ni Kalou:

²⁶ na ka vuni ka vunitaki maivei ira nai tabatamata e na gauna eliu, ia sa qai vakaraitaki mai vei ira na nona tamata yalosavasava:

²⁷ ni sa vinakata na Kalou me vakatakila vei ira na kena vakaidina kei na kena talei ni ka vuni oqo e na kedra maliwa na veimatanitu; oqori na Karisito e na lomamudou, na vu ni kena nuitaka na kalougata:

²⁸ o koya keitou sa vunautaka, ni keitou sa vakasalataka tiko na tamata yadua, ka vakavulica na tamata yadua e na vuku kecega; me keitou vakaraitaka kina na tamata yadua ni sa vinaka sara e na vuku i Karisito:

²⁹ oqo na ka kau sa daucakacaka talega kina, kau sa gumatua talega me vaka na nona cakacaka sa mana e na lomaqu.