Kalatia 5 - Vakavakadewa Makawa

Sa vakarota vei ira ko koya me ra tu dei e na lalaga sa yaco vei ira e na vuku i Jisu; me ra dauloloma, 115. Sa qai kaya me ra muria na Yalo Tabu, 1618. Sa qai tukuna na cakacaka ni tovo vakayago, 1921, kei na vua ni Yalo Tabu, 2226.

¹ O koya mo dou qai tu dei e na lalaga sa vakalalagataki keda kina na Karisito, ka mo dou kakua ni vakataotaki tale e nai vua mo dou bobula kina.

² Raica, oi au ko Paula au sa kaya vei kemudou, Kevaka dou sa ia tiko na veicilivi, ena vakatawayagataki kina vei kemudou na Karisito.

³ Niu sa vakadinadina tale vei ira na tamata yadua sa cilivi, ni ra sa vauci tu me muria na vunau taucoko.

⁴ Dou sa tawase tu maivei Karisito, oi kemudou kecega sa vaka mo dou vakadonui e na vunau; dou sa qai bale mai na loloma.

⁵ Sa vakabauta eda sa waraka ka vakanuinui kina, e na veivuke ni Yalo Tabu, me da vakadonui.

⁶ Ni da sa tu vata kei Karisito Jisu, sa sega ni yaga me cili, se me sega ni cili; sa yaga ga na vakabauta sa daucakacaka yaco e na loloma.

⁷ Dou a cici vinaka eliu; o cei beka sa tarovi kemudou mo dou kakua ni talairawarawa kina ki nai vakavuvuli dina?

⁸ A vakadinata oqo sa sega ni vu maivei koya sa kacivi kemudou.

⁹ E dua na tiki ni leveni lailai sa vakalevenitaka nai buli taucoko.

¹⁰ Au sa vakararavi ga vei kemudou e na vuku ni Turaga, ni dou na sega ni lomavakatani; ia ko koya ga sa vakayavalati kemudou, ena rawata na kenai sau, io ko koya yadua.

¹¹ Ia koi au, na veiwekani, kevaka kau sa vunautaka tiko na veicili, a cava kau sa vakacacani tiko kina? sa qai mudu na veivakatarabetaki e na vuku ni kauveilatai.

¹² Au sa vinakata me ra muduki ira tani ko ira era sa vakayavalati kemudou.

¹³ Ni dou sa kacivi, na veiwekani, mo dou lalaga; ia dou kakua ni ia na lalaga me tubu kina na ka vakayago, ka dou ia tikoga na veivuke ni veilomani vakai kemudou.

¹⁴ Ni sa caka sara na vunau taucoko e na vosa e dua bau, oqo ga: Mo lomana na kai nomu me vakataki iko.

¹⁵ Ia kevaka dou sa veikata ka veikani vakai kemudou, dou raica vinaka de dou veivakarusai vakai kemudou.

¹⁶ Ia kau sa kaya, Dou lako voli e na Yalo Tabu, ka dou na sega ni cakava kina na gagadre ca ni tovo vakayago.

¹⁷ Ni sa veivala na gagadre ni tovo vakayago kei na Yalo Tabu, a sa veivala na Yalo Tabu kei nai tovo vakayago: ia sa veimecaki koi rau oqo; dou sa sega kina ni cakava na veika dou sa vinakata.

¹⁸ Ia kevaka sa tuberi kemudou na Yalo Tabu, dou na sega ni lewai e na vunau.

¹⁹ Ia sa votu na cakacaka ni tovo vakayago, ka sa vakaoqo: A dauveibutakoci, na daudara, nai valavala tawa-savasava, na daugarogaro,

²⁰ na dausoro ki na veimatakau, na daucakaisausau, na dauveicati, na dauveileti, na veiqati, na daucudrucudru, na dauveiba, na veisei vakavuravura, na veisei ni lotu,

²¹ na dauvuvu, na daumateni, na daumarau vakalialia, kei na veika sa vakakina: a veika oqo au sa tukuna vei kemudou, me vaka kau a tukuna makawa talega ni na sega ni rawata na matanitu ni Kalou ko ira era sa kitaka na veika vakaoqo.

²² Ia na vua ni Yalo Tabu na loloma, na reki, na vakacegu, na vosota vakadede, na yalomalua, na yalololoma, na vakabauta,

²³ na yalomalumalumu, nai valavala malua: sa sega na vunau sa cudruvi kina na veika oqo.

²⁴ Ia ko ira era nei Karisito era sa vakota ki na kauveilatai nai tovo vakayago kei na kena dodomo ca kei na kena gagadre ca.

²⁵ Kevaka eda sa bula e na Yalo Tabu, tou lako voli talega e na Yalo Tabu.

²⁶ Me da kakua ni gadreva me da dokai walega, se veicudruvi, se veivuvutaki.