Kalatia 3 - Vakavakadewa Makawa

Sa tarogi ira ko koya se cava sa biuta kina na vakabauti Jisu, me ra vakararavi ki na vunau i Mosese; ni da sa vakadonui e na vakabauta; ka kalougata kina me vakataki Eparaama, 19. Sa vakatakila e na ka e vuqa ni sa dina na ka oqo, 1029.

¹ Oi kemudou na kai Kalatia dou sa sesewa, o cei beka sa lari kemudou, ni sa vakaraitaki oti e na matamudou ko Jisu Karisito me vaka ni sa vakoti ki na kauveilatai?

² A ka ga oqo kau sa via kila vei kemudou, Dou sa rawata na Yalo Tabu e na cakacaka ni vunau, se ni dou rogoca na vakabauta?

³ Dou sa sesewa vakaoqo, ne? ni dou sa vakatekivuna e na Yalo Tabu, dou sa qai tinia beka e na ka vakayago?

⁴ Dou a vosota vakaoqo e vuqa na ka me sega ni yaga, se segai? kevaka sa dina ga ni sega ni yaga.

⁵ Io, ko koya sa dausolia vei kemudou na Yalo Tabu a sa daucaka-mana e na kemudou maliwa, sa rawata li ko koya e na cakacaka ni vunau, se e na rogoca na vakabauta?

⁶ Me vaka sa vakadinata na Kalou ko Eparaama, a sa okati vua mei valavala dodonu.

⁷ O koya mo dou kila, ko ira era sa muria na vakabauta, sai ira ga era sa luve i Eparaama.

⁸ Ia nai Vola Tabu talega, ni sa kila makawa sa vakabauta sa dauvakadonui ira kina na veimatanitu tani na Kalou, sa vunautaka mada eliu vei Eparaama nai tukutuku-vinaka, Ena vakalougatataki na veivanua kecega e na vukumu.

⁹ O koya oqo era sa vakalougatataki vata kei Eparaama na dauvakabauta ko ira sa muria na vakabauta.

¹⁰ Ni sa lewai me cudruvi, o ira kecega era sa muria na cakacaka ni vunau; ni sa volai, Ena cudruvi ko ira yadua sa sega ni tu dei e na ka kecega sa volai e nai vola ni vunau me ra cakava.

¹¹ Ia sa macala sara sa sega ni vakadonui e na vunau e dua e na mata ni Kalou; ni sa volai, Ena bula na tamata dodonu e na vuku ni vakabauta.

¹² Ia sa sega ni ka ni vakabauta na vunau; ia Ko koya ga sa cakava na veika oqo ena bula kina.

¹³ Sa voli keda na Karisito mai na veicudruvi ni vunau, ni sa cudruvi ga ko koya e na vukuda, ni sa volai, Sa cudruvi ko ira yadua sa rube e na kau:

¹⁴ me yaco kina na ka ni veivakalougatataki nei Eparaama vei ira na veimatanitu tani e na vuku i Jisu Karisito: me da rawata kina na Yalo ka yalataki, ni da sa vakabauta.

¹⁵ Oi kemudou na veiwekani, au sa vosa vakatamata ga: Kevaka sa tamata ga sa ia na veiyalayalati, ka sa vakadinadinataki, sa qai sega e dua sa vakatawayagataka se vakaikuritaka.

¹⁶ Ia sa vosataki vei Eparaama na veiyalayalati, vei ira talega na nona kawa. Sa sega ni kaya ko koya. Vei ira na veikawa, me vaka sa vuqa na kawa; ia me vaka ni sa dua bauga, Vei ira talega na nomu kawa, o koya na Karisito.

¹⁷ Ia oqo kau sa kaya, a veiyalayalati ka vakadinadinataka eliu na Kalou, sa sega ni vakatawayagataka na vunau sa yaco ni sa oti mada e va na drau ka tolusagavulu na yabaki, me sega kina ni mana na vosa ni yalayala.

¹⁸ Io, kevaka sa yaco nai votavota e na vuku ni vunau, sa qai sega e na vuku ni yalayala: ia na vosa ni yalayala ga sa solia kina vei Eparaama na Kalou.

¹⁹ Sa qai mei cavai beka na vunau? Sa vakaikuritaki oqo e na vuku ni talaidredre, me yaco mada na kawa sa vosa kina na yalayala; a ra sa tukuna ko ira na agilose e na gusu ni dua na dautataro.

²⁰ Ia na dautataro sa sega ni yaga ni sa dua bauga; ia na Kalou sa dua bauga.

²¹ Erau sa qai dua tani sara beka na vunau kei na vosa ni yalayala ni Kalou? E segai sara: ia kevaka sa soli e dua na vunau sa rawa kina na veivakabulai, sa qai dina ena yaco na veivakadonui e na vuku ni vunau.

²² Ia nai Vola Tabu sa sogolatia kecega, ka beitaka e na cala, me soli kina na ka sa yalataki, e na vuku ni vakabauti Jisu Karisito vei ira era sa vakabauta.

²³ Ia ni sa sega ni yaco na vakabauta, eda sa vakatawai me ia tiko na vunau, ni da sogolati tiko me yaco mada na gauna ni vakabauta ena vakaraitaki emuri.

²⁴ Sa qai yaco kina na vunau mei vakavuvuli me tuberi keda vei Karisito, me da vakadonui kina e na vuku ni vakabauta.

²⁵ Ia ni sa yaco na vakabauta, sa qai sega ni veitaliataki keda tiko nai vakavuvuli.

²⁶ Ni dou sa luve ni Kalou koi kemudou kecega ni dou sa vakabauti Karisito Jisu.

²⁷ Ni sai Karisito dou sa vakasulumi kemudou kina, oi kemudou yadua sa papitaisotaki vei Karisito.

²⁸ Sa qai sega na Jiu se na kai matanitu tani, sa sega na bobula se nai taukei, sa sega na tagane se na yalewa: ni dou sa dua bauga koi kemudou kecega e na vuku i Karisito Jisu.

²⁹ Ia kevaka dou sa nei Karisito, dou sa qai kawa i Eparaama, kei nai taukei me vaka na vosa ni yalayala.