Kalatia 2 - Vakavakadewa Makawa

Sa tukuna ko koya na ka sa lako cake kina ki Jerusalemi, 1,2; a sa tukuni Taito, 310. Sa tukuna na nona vunauci Pita, 1121.

¹ Sa oti e tinikava na yabaki, au sa qai lako cake tale kei Panapasa ki Jerusalemi, kau sa kauti Taito talega.

² Ia sai vakavuvuli ga e na raivotu kau a lako cake kina, kau sa tukuna vei ira nai tukutuku-vinaka kau sa vunautaka tiko vei ira na veimatanitu tani, ia ka vuni ga vei ira era sa rogo, de sega ni yaga na noqu cici oqo, se na noqu cici eliu.

³ Ia sa sega ni vakasaurarataki me cilivi ko Taito, keirau sa tiko kaya, a kai Kirisi:

⁴ e segai e na vukudra na mataveiwekani vakailasu era sa kau vuni mai, o ira sa curu lo mai me ra vakaraica na noda lalaga eda sa rawata ni da sa tu vata kei Karisito Jisu, me ra vakabobulataki keda kina:

⁵ ia keitou a sega ni talairawarawa vei ira me vakamalumalumutaki keitou, e segai sara e na dua bau na tiki-ni-siga; me tu dei kina vei kemudou na dina ni tukutuku-vinaka.

⁶ Ia ko iratou eratou sa daurogo ni ratou sa ka levu cake, (se ratou vakabeka evei sa ka walega vei au; sa sega ni vinakata vakailoa e dua na tamata na Kalou;) io, ko iratou eratou sa daurogo, sa sega e dua na ka eratou sa vakaikuritaka vei au.

⁷ Sa sega sara ni vakakina, ia ni ratou sa raica niu sa lesi meu vunautaka nai tukutuku-vinaka vei ira ka sega ni cili, me vaka ko Pita vei ira sa cili; (

⁸ io, ko koya sa cakacaka e na loma i Pita mei apositolo vei ira sa cili, sa cakacaka e na lomaqu talega e na vukudra na veimatanitu tani:)

⁹ ia ko iratou ko Jemesa, kei Kifa, kei Joni, eratou sa daurogo ni ratou sa duru, ni ratou sa kila na loloma ka soli vei au, eratou sa vakabauti keirau kei Panapasa e na veitauri liga i matau ni keitou sa dua vata, ka me keirau lako vei ira era sa sega ni lotu, ia ko iratou vei ira sa cili:

¹⁰ ia sa lomadra talega oqo, me keirau nanumi ira na dravudravua: a ka talega oqo kau sa gumatua kina.

¹¹ Ia ni sa lako mai ki Anitioki ko Kifa, au sa vorati koya e na matanavotu, ni sa dodonu me vunauci.

¹² Ni sa kana vata eliu ko koya kei ira sa matanitu tani, ni ra sa sega ni tadu mai eso maivei Jemesa; ia ni ra sa tadu mai, sa sega ni via tiko vata kei ira ka sa lako tani ko koya, ni sa rerevaki ira na cili.

¹³ O ira talega na Jiu sa vo era sa ia vata kaya na veivakaisini ko ya; a sa kau vakatani talega kina ko Panapasa e na nodra veivakaisini.

¹⁴ Ia ni kau sa raica era sa sega ni valavala dodonu ka me vaka na dina ni tukutuku-vinaka, au a kaya vei Kifa e na matadra kecega, Kevaka ko sai valavala tiko me vakataki ira sa matanitu tani ni ko sa Jiu, ka sega ni vakataki ira na Jiu, e na cava ko sa vakasaurarataki ira kina era sa matanitu tani me rai valavala me vakataki ira na Jiu?

¹⁵ koi keda, eda sa Jiu ni da sucu, ka sega ni tamata ca maivei ira na veimatanitu tani,

¹⁶ ni da sa kila sa sega ni vakadonui na tamata e na vuku ni cakacaka ni vunau, e na vuku ga ni vakabauti Jisu Karisito, eda sa vakabauti Karisito Jisu, koi keda, me da vakadonui kina e na vuku ni da vakabauti Karisito, ka sega ga e na cakacaka ni vunau; ni sa sega na tamata ena vakadonui e na vuku ni cakacaka ni vunau.

¹⁷ Ia kevaka eda sa kune koi keda talega me da tamata ca, ni da sa vakasaqara tiko me da vakadonui e na vuku i Karisito, sa qai vu beka ni valavala ca na Karisito? E segai sara.

¹⁸ Ia kevaka kau sa tara cake tale na ka kau a basuka sobu, au sa tukuni au kina niu sa tamata caka ca.

¹⁹ Ni sai koya na vunau kau sa mate kina ki na vunau, meu bula vua na Kalou.

²⁰ Keirau sa vakoti vata kei Karisito ki na kauveilatai: ia sa sega ga ni koi au dina sa bula tiko, na Karisito ga sa bula e lomaqu: ia na noqu bula vakayago oqo, au sa bula tiko kina niu sa vakabauta na Luve ni Kalou, o koya ka lomani au, ka soli koya e na vukuqu.

²¹ Au sa qai sega ni vakatawayagataka na loloma ni Kalou; ni sa qai sega ni yaga na mate i Karisito, kevaka sa rawa na veivakadonui e na vunau.