Josua 9 - Vakavakadewa Makawa

Era soqoni vata na tui ni vanua me veivala kei Josua, 1,2. A nodra i valavala vaqaseqase na kai Kipioni, 3-13. Sa veiyalayalati kei ira na nodra turaga na Isireli, 14,15. Sa vakavotui na nodra lasu, 16,17. Sa vakabulai ira ko Josua, ka sa vakabobulataki ira me ra dauta buka ka dautaki wai, 18-27.

¹ Ia ni ra sa rogoca ko ira kecega na tui sa tiko e na tai oqo ni Joritani, e na ulu-ni-vanua, kei na buca, kei na baravi kece ni waitui levu sa donui Lepanoni, ko ira na Itaiti, kei ira na Amoraiti, ko ira na kai Kenani, ko ira na Perisaiti, ko ira na Aivaiti, kei ira na Jepusaiti,

² era sa qai soqoni vata, ka ra sa yalovata me ra veivala kei Josua kei ira na Isireli.

³ Ia ko ira na kai Kipioni, ni ra sa rogoca na ka ka kitaka ko Josua ki Jeriko kei Ai,

⁴ era sa qai ia vaqaseqase, ka sa lako eso me vaka eratou sa tamata talai, ka vakavodoka na taga madra eso ki na nodratou asa, eso talega na tavaya kuli-ni-manumanu ni waini, sa madra, ka kadresu, ka vauci;

⁵ a sa vakaivava e nai vava sa madra ka botani, a ra sa vakaisulu e nai sulu madra; ia sa kaukauwa ka vukovukoa na madrai kece sa kedratou i vaqa.

⁶ A ratou sa lako kivei Josua ki nai ki nai tikotiko mai Kilikali, a ratou sa kaya vua, vei ira talega na Isireli, Keitou sa lako mai na vanua vakayawa; ia oqo dou ia na veiyalayalati kei keitou.

⁷ A ra sa kaya na Isireli vei iratou na Aivaiti, De dou sa tiko e na keitou maliwa: ia keitou na ia rawa vakaevei na veiyalayalati kei kemudou?

⁸ A ratou kaya vei Josua, Keitou sa nomu tamata. A sa kaya ko Josua, O cei koi kemudou? ka dou sa lako maivei?

⁹ A ratou kaya vua, Koi keitou na nomu tamata keitou sa lako mai na vanua vakayawa sara, e na vuku ni yaca i Jiova na nomu Kalou; ni keitou sa rogoca na kenai rogorogo kei na ka kecega sa cakava ko koya mai Ijipita,

¹⁰ kei na ka kecega sa cakava ko koya vei rau na nodra tui na Amoraiti, vei Sioni na tui Esiponi kei Oki na tui Pasani, ka tiko mai Aseteroci, koi rau ka tiko mai tai kadua ni Joritani.

¹¹ A ra kaya vei keitou ko ira na neitou qase, kei na lewe ni neitou vanua kecega, Dou kauta e na ligamudou nai vaqa me kemudou e gaunisala, ka la'ki veitavaki kei ira, ka kaya vei ira, Koi keitou sa nomudou tamata: dou ia na veiyalayalati kei keitou.

¹² Na keitou madrai oqo keitou a kauta katakata mai na neitou veivale me neitou i vaqa, e na siga keitou a cavu tu kina me lako mai vei kemudou, ia oqo, raica, sa kaukauwa ka vukovukoa.

¹³ Ia oqo na tavaya kuli-ni-manumanu ni waini keitou a vakasinaita, ni ra sa vou; ka raica, era sa kacabote; ia na neitou i sulu oqo kei na neitou i vava, sa madra mai ni sa yawa sara na sala.

¹⁴ Ia na tamata, era sa taura na kedratou eso, ka sega mada ni taroga vei Jiova.

¹⁵ A sa kaya ko Josua me ra sautu tiko kei iratou, ka ia na veiyalayalati kei iratou, me ra bula: a sa bubului vei iratou ko ira na nodra turaga nai soqosoqo.

¹⁶ Ia sa caka oti bogi tolu na veiyalayalati kei iratou, era sa qai rogoca ni ra sa tiko veivolekati, io e na kedra maliwa.

¹⁷ A ra sa cavu tu ko ira na Isireli, ka yaco ki na nodra veikoro e na bogi tolu. Ia na nodra veikoro ko Kipioni, kei Kifira, kei Pieroci, kei Kiriaci-jiarimi.

¹⁸ A ra sa sega ni mokuti ira ko ira na Isireli, ni ra bubului oti vei ira ko ira na nodra turaga nai soqosoqo, e na yaca i Jiova na Kalou ni Isireli. A ra sa vosa kudrukudrutaki ira na turaga ko ira nai soqosoqo taucoko.

¹⁹ A ra sa kaya na turaga kece vei ira nai soqosoqo taucoko, Keitou sa bubului vei ira e na yaca i Jiova na Kalou ni Isireli: ia oqo, sa tabu ni da tarai ira.

²⁰ Oqo ga na ka eda na kitaka vei ira; eda na vakabulai ira ga, de sa da na cudruvi, e na vuku ni bubului keitou a bubului kina vei ira.

²¹ A ra sa kaya vei ira ko ira na turaga, Me ra bula ga. Ia era sa dauta buka ka dautaki wai vei ira nai soqosoqo taucoko; me vaka ka kaya vei ira ko ira na turaga.

²² A sa kacivi iratou ko Josua, ka vosa vei iratou, ka kaya, A cava dou vaqaseni keitou kina, ni dou sa kaya, Keimami sa tiko vakayawa sara vei kemudou, ia dou sa tiko e na keitou maliwa?

²³ dou sa qai cudruvi, ka na sega ni mudu vei kemudou na bobula, dou na dauta buka ka dautaki wai ki na vale ni noqu Kalou.

²⁴ A ratou sa vosa vei Josua, ka kaya, Sa tukuni vakaidina vei keimami na nomu tamata na ka ka vakarota ko Jiova na nomu Kalou vei Mosese na nonai talatala, me solia vei kemudou na vanua taucoko, ka me vakamatea kecega na lewe ni vanua e na matamudou, keimami a qai rere vakalevu kina e na vukumudou de keimami mate, ka keimami a kitaka na ka oqo.

²⁵ Ia oqo, raica, keimami sa tiko e na ligamu; mo kitaka vei keimami na ka sa vinaka ka dodonu e matamu.

²⁶ A sa kitaka vakakina vei ira ko koya, ka vakabulai ira mai na ligadra na Isireli, me ra kakua ni vakamatei ira.

²⁷ A sa soli ira ko Josua e na siga ko ya, me ra dauta buka ka dautaki wai vei ira nai soqosoqo, ki nai cabocabo-ni-soro talega i Jiova, e na tikina sa digitaka ko koya ka yacova na siga edaidai.