Josua 6 - Vakavakadewa Makawa

Sa vakaroti Josua ko Jiova e na vuku i Jeriko, 1-5. Era vakavolivolita na koro ka bogi vitu, 6-14. Era kaba na koro, ka vakarusa sara, 15-21. Sa vakabulai ko Reapi kei na wekana, 22-25. Sa na ca na tamata ena tara tale na koro, 26,27.

¹ A sa buku matua na druadrua ki Jeriko ko ira na Isireli; sa sega e curu yani, ka sega e curu mai.

² A sa kaya vei Josua ko Jiova, Raica, au sa soli Jeriko ki na ligamu, kei na kena tui, kei na kena tamata i valu qaqa.

³ Ia mo ni vakavolivolita na koro, koi kemuni kece na tamata i valu, mo ni lako volita vakadua: ka mo ni kitaka vakakina ka bogi ono.

⁴ Ia me ratou kauta na davui vakajupeli e vitu ko iratou na bete e le vitu, ka me ra liutaka na kato: ia e na kenai kavitu ni siga ni dou na volita vakavitu na koro, ia eratou na uvuca lako na davui ko iratou na bete.

⁵ Ia ni ratou sa uvuca vakadede na davui vakajupeli, ka kemuni sa rogoca na domo ni davui, era na qai kailavaka na kaila levu na tamata kecega, ia ena qai vale sara na bai ni koro, ka ra na lako cake na tamata yadua e na tikina sa dui donui koya.

⁶ A sa kacivi iratou na bete ko Josua na luve i Nuni, ka kaya vei iratou, Dou laveta cake na kato ni veiyalayalati, ia me le vitu na bete me ratou kauta na davui vakajupeli e vitu, ka me ratou liutaka na kato i Jiova.

⁷ Sa kaya talega ko koya vei ira na tamata, Ni lako yani ka volita na koro, ka me liutaka na kato i Jiova ko ira sa vakaiyaragi.

⁸ Ia ni sa vosa oti vei ira na tamata ko Josua, sa qai lako yani ko iratou na bete le vitu ka kauta na davui vakajupeli e vitu me ra liutaki Jiova, a ratou uvuca na davui; ka sa muri iratou na kato ni veiyalayalati i Jiova.

⁹ Ia ko ira sa vakaiyaragi, era liutaki iratou na bete sa uvuca na davui, a sa muria na kato ko ira nai vavakoso, ka sa lako tiko na bete ka uvuca na davui.

¹⁰ A sa vakarota vei ira na tamata ko Josua, ka kaya, Ni kakua ni kaila, se me rogo na domomuni, ia me kakua na vosa me lako mai na gusumuni, ka me yaco mada na siga ka'u na kaya kina vei kemuni, Ni kaila; kemuni na qai kaila.

¹¹ A sa kau yani me volita na koro vakadua na kato i Jiova; ka ra lako tale mai ki nai tikotiko, ka moce kina.

¹² A sa sou ko Josua e na mataka, a ratou laveta cake na kato i Jiova ko iratou na bete.

¹³ Ia na bete e le vitu eratou kauta na davui vakajupeli e vitu, ka liutaka na kato i Jiova, ka uvuca lako na davui: ia ka sa liutaki iratou ko ira sa vakaiyaragi; a sa muria na kato i Jiova ko ira nai vavakoso, ni sa lako tiko ko iratou na bete ka uvuca na davui.

¹⁴ A ra sa la'ki volita tale vakadua na koro e na kenai karua ni siga, a ra lesu tale ki nai tikotiko: era kitaka vakakina ka ono na siga.

¹⁵ Ia e na kenai kavitu ni siga era sa sou e na mataka caca, ka vakavolivolita vakavitu na koro me vaka era daukitaka, ia e na siga ga oqori era vakavolivolita vakavitu na koro.

¹⁶ Ia e na kenai kavitu ni lakolako, ni sa uvuca tiko na davui ko iratou na bete, sa qai kaya ko Josua kivei ira na tamata, Ni kaila; ni sa solia vei kemuni na koro ko Jiova:

¹⁷ ia ena lesi me vakarusai e na vuku i Jiova na koro, kei na ka kecega sa tiko kina; ko Reapi duaduaga na yalewa dautagane e na bula, o koya kei ira kece sa tiko kaya e vale, ni sa vunia ko koya nai talaki eda a tala yani:

¹⁸ ia koi kemuni, mo ni tarovi kemuni mai na ka sa lesi me vakarusai, de ko ni vakarusai kemuni, ni kemuni sa tara na ka sa lesi me vakarusai, ka vakavuna talega na rusa ki nai tikotiko nei Isireli ka vakararawataka.

¹⁹ Ia na siliva kecega, kei na koula, kei nai yaya parasa kei na aironi, sa tabu me nei Jiova: ena kau mai ki na kato-ni-yau i Jiova.

²⁰ A ra sa kaila na tamata, ni sa uvu na davui, ia ni ra sa rogoca na domo ni davui na tamata, sa ra qai kailavaka na kaila levu na tamata, a sa bale sara na bai, ka ra lako cake na tamata ki na koro, ko ira na tamata yadua e na tikina sa dui donui koya, a ra sa rawata na koro.

²¹ A ra sa vakarusa e nai seleiwau na ka kece sa tiko e na koro, na tagane kei na yalewa, na cauravou kei na qase, kei na pulumokau, kei na sipi, kei na asa.

²² A sa kaya ko Josua vei rau na tamata ka rau rai vanua, Drau curu ki na nona vale na yalewa dautagane, ka kauta maikina ki tautuba na yalewa kei na nona ka kecega, me vaka drau a bubului kina vua.

²³ Ia na cauravou ka la'ki rai vanua, erau sa curu, ka kauti Reapi mai ki tautuba, kei na tamana, kei na tinana, kei iratou na ganena, kei na nona ka kecega: a rau kauta mai ki tautuba na wekana kecega, ka laivi ira tu e nai bili ni nodra i tikotiko na Isireli.

²⁴ A ra sa vakama na koro e na bukawaqa, kei na ka kecega sa tu kina: ia na siliva, kei na koula, kei nai yaya parasa kei na aironi, era viritaka ki na kato-ni-yau e na vale i Jiova.

²⁵ A sa vakabulai Reapi na dautagane ko Josua, kei na lewe-ni-vale nei tamana, kei na nona ka kecega, a sa tiko ko koya e na kedra maliwa na Isireli ka yacova na siga oqo, ni sa vunia ko koya nai talaki e le rua ka tala ko Josua me yamata ki Jeriko.

²⁶ A sa bubului ko Josua e na siga ko ya, ka kaya, Ena cudruvi maivei Jiova na tamata sa na tu cake me tara na koro oqo, ko Jeriko: ena mate na nona ulumatua ni sa tauyavutaka, ka na mate na luvena tagane sa gone ni sa vakatura cake na kenai sogo ni matamata-ni-koro.

²⁷ A sa tiko kei Josua ko Jiova, a sa kuruseta na vanua taucoko na kenai rogorogo.