Josua 3 - Vakavakadewa Makawa

Sa ra lakova na Joritani ko ira kecega na Isireli, e na qele mamaca.

¹ A sa sou e na mataka ko Josua; a ra sa toki mai Sitimi, ka lako mai ki na Joritani, ko koya kei ira kecega na Isireli, ka ra moce kina, era qai lako emuri ki tai kadua.

² Sa bogi tolu, era qai lako na turaga lalai e na maliwa ni tikotiko;

³ a ra sa vakaroti ira na tamata, ka kaya, Ni kemuni sa raica na kato ni veiyalayalati i Jiova na nomuni Kalou, kei ira na bete na Livai ni ra sa colata yani, mo ni qai cavu tu mai na nomuni tikina, ka muria.

⁴ Ia me dua na maliwa vei kemuni kei na kato ni veiyalayalati me rua na udolu na kiupiti beka na kenai vakarau: ni kakua ni torova, mo ni kila kina na sala kemuni na lako kina: ni kemuni a sega ni lako e na sala oqo eliu.

⁵ A sa kaya vei ira na tamata ko Josua, Ni vakasavasavataki kemuni: ni na kitaka na cakacaka mana eso ko Jiova e na kemuni maliwa e na mataka.

⁶ A sa vosa vei ira na bete ko Josua, ka kaya, Dou laveta cake na kato ni veiyalayalati, ka liutaki ira na tamata. A ra laveta cake na kato ni veiyalayalati, ka liutaki ira na tamata.

⁷ A sa kaya vei Josua ko Jiova, Au na vakatekivu me'u vakalevulevui iko e na siga oqo e na matadra na Isireli kecega, me ra kila ni'u na tiko vata kei iko me vaka ka'u a tiko vata kei Mosese.

⁸ Ia ko iko, mo vakaroti ira na bete era sa colata na kato ni veiyalayalati, ka kaya, Ni dou sa lako mai ki na bati ni wai ni Joritani, dou na tu vakadua e na Joritani.

⁹ A sa kaya vei ira na Isireli ko Josua, Ni toro mai, ka rogoca na vosa i Jiova na nomuni Kalou.

¹⁰ Sa kaya talega ko Josua, E na ka oqo kemuni na kila ni sa tiko e na kemuni maliwa na Kalou bula, ka na vakasevi ira vakaidina e matamuni na kai Kenani, kei ira na Itaiti, kei ira na Aivaiti, kei ira na Perisaiti, kei ira na Kakesaiti, kei ira na Amoraiti, kei ira na Jepusaiti.

¹¹ Raica, na kato ni veiyalayalati nei koya na Turaga kei vuravura kecega sa liutaki kemuni ki loma ni Joritani.

¹² Ia oqo, ni kauta e le tinikarua na tamata maivei ira na veimataqali i Isireli, me tauyadua na tamata mai na veimataqali.

¹³ Ia ni sa tu e na wai ni Joritani na qeteqete ni yavadra na bete sa colata na kato i Jiova na Turaga kei vuravura kecega, ena qai mudu ni drodro na wai ni Joritani, io na wai sa drodro sobu maicake, ka na bini ki cake sara me vaka e dau na suva levu.

¹⁴ Ia ni ra sa cavu tu na tamata mai nodra veivale laca, me ra lakova na Joritani, sa qai liutaki ira na tamata ko ira na bete ka colata na kato ni veiyalayalati;

¹⁵ ia ni ra sa yaco ki na Joritani ko ira ka colata na kato, ka sa dromu e na bati ni wai na yavadra na bete ka colata na kato (ni sa dauvuabale na Joritani ka sa dauluvu na batina, e na gauna ni magomago),

¹⁶ sa qai tu vakadua na wai sa drodro sobu maicake; ka sa tubu me cecere, ka vaka e dua na suva levu, ka vakayawa sara, mai Atama, na koro sa rau veivolekati kei Saricani: a sa muduki laivi oqori sa lako sobu vaka ki na waitui mai na vanua cecelevu, io, na wasa Tuituina; a ra sa lako ki tai kadua ko ira na tamata e na tikina ka donui Jeriko.

¹⁷ A sa tu dei e na qele mamaca e na loma ni Joritani ko ira na bete era colata na kato ni veiyalayalati nei Jiova, a sa lako e na qele mamaca ki tai kadua ko ira kecega na Isireli, ka sa oti na matanitu taucoko ni ra lakova na Joritani.