Josua 22 - Vakavakadewa Makawa

Sa tala na mataqali e rua, ka dua na kena wase ni mataqali, kina vanua era taukena, 1-9. Era sa tara e dua nai cabocabo-ni-soro; ka sa cudru kina ko ira na Isireli, 10-20. Era sa tukuna na kenai balebale; a sa yalovinaka kina ko ira era sa rogoca, 21-34.

¹ Sa qai kacivi ira mai na Rupeni, kei ira na Kata, kei na kena wase e dua ni mataqali i Manasa, ko Josua,

² ka kaya vei ira, Kemuni sa vakabauta na ka kecega sa vakarota vei kemuni ko Mosese nai talatala i Jiova, ia kemuni sa vakarorogo ki na domoqu e na ka kecega ka'u sa vakaroti kemuni kina:

³ kemuni sa sega ni laivi ira na wekamuni e na veisiga e vuqa, ka yacova na siga edaidai, ia ko ni sa vakabauta na ka sa lesi e nai vakaro i Jiova na nomuni Kalou.

⁴ Ia oqo, sa vakacegui ira na wekamuni ko Jiova na nomuni Kalou, me vaka ka kaya vei ira ko koya: ia oqo, mo ni lesu, ka lako ki na nomuni veivale laca, ki na vanua kemuni sai taukei kina, ko ya ka solia vei kemuni ko Mosese nai talatala i Jiova mai tai kadua ni Joritani.

⁵ Ia mo ni nanuma vakavinaka mo ni kitaka nai vakaro kei na vunau, ka vakarota vei kemuni ko Mosese nai talatala i Jiova, mo ni lomani Jiova na nomuni Kalou, ka muria na nona sala kecega, ka vakabauta na nonai vakaro, ka kabiti koya, ka qaravi koya e na lomamuni taucoko, kei na yalomuni taucoko.

⁶ A sa vosavakalougatataki ira ko Josua, ka talai ira yani: a ra sa lako ki na nodra veivale laca.

⁷ Ia sa vota oti ko Mosese ki na dua na kena wase ni mataqali i Manasa mai Pasani: ia ki na wase kadua sa votai ira vata ko Josua kei na wekadra e na tai ni Joritani oqo vaka ki ra. Ia ni sa talai ira yani ko Josua ki na nodra veivale laca, sa qai vosavakalougatataki ira,

⁸ ka kaya, Ni lesu vakavutuniyau sara, ki na nomuni veivale laca, ka me levu sara na manumanu e yavai va, kei na siliva, kei na koula, kei na parasa, kei na aironi, kei nai sulu na ka levu sara: ka mo ni veivota vata kei ira na wekamuni e nai toki ni nomuni meca.

⁹ A ra sa lesu ko ira na Rupeni, kei ira na Kata, ka dua na kena wase ni mataqali i Manasa, a ra sa lako tani maivei ira na Isireli mai Sailo, e na vanua ko Kenani, me ra lako ki na vanua ko Kiliati, ki na vanua e ra sa rawata me ra taukena, me vaka na vosa i Jiova e na gusu i Mosese.

¹⁰ Ia ni ra sa lako mai ki na bati ni Joritani, e na vanua ko Kenani, era sa qai tara kina e dau nai cabocabo-ni-soro e na bati ni Joritani ko ira na Rupeni, kei ira na Kata, kei na kena wase e dua ni mataqali i Manasa, a sa rairai cabocabo-ni-soro levu.

¹¹ A ra sa rogoca na Isireli, ka vaka, Raica, era sa tara e dua nai cabocabo-ni-soro ko ira na Rupeni, kei ira na Kata, kei na kena wase e dua ni mataqali i Manasa, me donuya na vanua ko Kenani, e na bati ni Joritani, ka me donui ira na Isireli.

¹² Ia ni ra sa rogoca na Isireli, era sa soqoni vata ki Sailo nai soqosoqo taucoko ni Isireli, me la'ki vala kei ira.

¹³ A ra sa talai Finiase, na luve i Eliesa na bete, ko ira na Isireli vei ira na Rupeni, kei ira na Kata, kei na kena wase e dua ni mataqali i Manasa, ki na vanua ko Kiliati,

¹⁴ kei ira vata kaya e le tini na turaga, sa tauyadua na turaga e na mataqali turaga e na nodra mataqali kecega na Isireli; ia era sa turaga e na nodra mataqali kecega na Isireli; ia era sa turaga yadua e na mataqali ni nodra qase, e na nodra veiudolu na Isireli.

¹⁵ A ra sa lako yani kivei ira na Rupeni, kei ira na Kata, kei na kena wase e dua ni mataqali i Manasa, ki na vanua ko Kiliati, a ra sa kaya vei ira,

¹⁶ Sa vosa vakaoqo nai soqosoqo taucoko i Jiova, A cava na ka ca oqo dou sa kitaka vua na Kalou i Isireli, ni dou sa lesu tani edaidai me kakua ni muri Jiova tiko, ni dou sa tara e dua na nomudou i cabocabo-ni-soro, mo dou talaidredre kina edaidai vei Jiova?

¹⁷ Sa lailai beka vei keda nai valavala ca i Piori, eda sa sega ni vakasavasavataki maikina ka yacova na siga oqo, ia sa dua kina na mate levu vei ira nai soqosoqo i Jiova;

¹⁸ mo dou sa lesu tani edaidai, mo dou kakua ni muri Jiova tiko? ia ni dou sa talaidredre edaidai vei Jiova, ena cudruvi ira nai soqosoqo taucoko ni Isireli ko koya e na mataka.

¹⁹ Ia kevaka sa sega ni savasava na vanua dou sa taukena, dou qalo-kosova mai ki na vanua sai taukei kina ko Jiova, sa tiko kina na vale i Jiova, ka mo doui taukei e na keimami maliwa: ia mo dou kakua ni talaidredre vei Jiova, se talaidredre vei keimami, ka ni dou sa tara vei kemudou e dua nai cabocabo-ni-soro tani, mei kuri ni cabocabo-ni-soro i Jiova na noda Kalou.

²⁰ Sa sega li ni kitaka na ka ca ko Ekani na luve i Sira e na ka sa lesi me vakarusai, a sa cudruvi kina nai soqosoqo taucoko ni Isireli? a sa sega ni mate duaduaga na tamata ko ya e na nonai valavala ca.

²¹ Sa qai vosa mai ko ira na Rupeni, kei ira na Kata, kei na kena wase e dua ni mataqali i Manasa, ka kaya vei ira na nodra turaga na veiudolu ni Isireli,

²² Sa kila ko Jiova na nodra Kalou na veikalou, io ko Jiova na nodra Kalou na veikalou, ena kila talega ko ira na Isireli; kevaka sa talaidredre, se caka cala vei Jiova,

²³ keimami sa cakava kina na neimami cabocabo-ni-soro, me keimami lesu tani kina me keimami kakua ni muri Jiova tiko; se me keimami vakacabora kina nai soro kama se nai madrali laukana, se me keimami vakacabora kina nai soro ni veivinakati, me qai taroga ko Jiova, (ka me kakua ni keimami vakabulai edaidai;)

²⁴ ia kevaka keimami sa sega ni kitaka na ka oqo, ni keimami sa rere, ka kaya, De ra vosa maimuri ko ira na luvemuni vei ira na luve i keimami, ka kaya, Sa nomuni vakaevei ko Jiova na Kalou i Isireli?

²⁵ ni sa lesia na Joritani ko Jiova me kenai yalayala e na keda maliwa koi keimami kei kemuni, na Rupeni kei na Kata; sa sega na nomuni votavota vei Jiova: a ra na vakavuna ko ira na luvemuni me ra sega ni rerevaki Jiova ko ira na luve i keimami.

²⁶ O koya keitou a kaya kina, Me da vakarau me tara e dua na nodai cabocabo-ni-soro, me kakua ni cabori kina nai soro kama, se dua nai soro:

²⁷ ia me kenai vakadinadina ga vei keimami kei kemuni, vei ira talega nai tabatamata sa na muri keda, me keimami qarava na cakacaka i Jiova e matana, e na neimami soro kama, kei na neimami soro, kei na neimami madrali ni veivinakati; ka me ra kakua ni kaya maimuri na luvemuni vei ira na luve i keimami, Sa sega na nomuni votavota vei Jiova:

²⁸ o koya keimami a kaya kina, Ni ra na vosa vei keda, se ki na nodai tabatamata maimuri, eda na qai kaya, Raica nai vakatakarakara ni cabocabo-ni-soro i Jiova, era cakava na neimami qase, me kakua ni cabori kina nai soro kama, se dua nai soro, ia me kenai vakadinadina ga vei keimami kei kemuni.

²⁹ Me yawa sara vei keimami me keimami talaidredre vei Jiova, ka lesu tani edaidai me keimami kakua ni muri Jiova tiko, me tara e dua tani nai cabocabo-ni-soro me cabori kina nai soro kama, se nai madrali laukana, se dua nai soro, mei kuri ni cabocabo-ni-soro i Jiova na noda Kalou, ko ya sa tu e na mata ni nona vale-tabu.

³⁰ Ia ni sa rogoca ko Finiase na bete, kei ira na turaga ni soqosoqo na nodra turaga na veiudolu ni Isireli era sa tiko kaya, na vosa era sa vosataka na Rupeni, kei na Kata, kei na Manasa, sa qai ka vinaka vei ira.

³¹ A sa kaya ko Finiase, na luve i Eliesa na bete, kivei ira na Rupeni, kei na Kata, kei na Manasa, Keimami sa kila edaidai ni sa tiko e na keda maliwa ko Jiova, ni kemuni sa sega ni kitaka na ka ca oqo vei Jiova: dou sa qai vakabulai ira na Isireli mai na liga i Jiova.

³² A sa lesu ko Finiase na luve i Eliesa na bete, kei ira na turaga, maivei ira na Rupeni, kei na Kata, mai na vanua ko Kiliati, ki na vanua ko Kenani, vei ira na Isireli, ka tukuna vei ira na ka oqo.

³³ A sa ka vinaka vei ira na Isireli na ka oqo; a ra sa vakavinavinaka vua na Kalou ko ira na Isireli, ka sega tale ni kaya me ra lako cake me veivala kei ira, me vakarusa na vanua era tiko kina na Rupeni, kei na Kata.

³⁴ Ia ko ira na Rupeni, kei na Kata, era vakatoka nai cabocabo-ni-soro ko Eti: ka kaya, Sa na kenai vakadinadina vei keda ni sa Kalou ko Jiova.