Josua 21 - Vakavakadewa Makawa

Sa ra yavala na Livai me soli vei ira eso na koro, 1,2. A sa lesi vei ira na koro eso e na veimataqali, 3-42. Ai vakadinadina ni vosa ni Kalou vei ira na Isireli, 43-45.

¹ Ia ko ira na nodra turaga na qase vei ira na Livai, era sa toro mai vei Eliesa na bete, kei Josua na luve i Nuni, kei ira na nodra turaga na qase ni nodra veimataqali na Isireli;

² a ra sa vosa vei ira mai Sailo e na vanua ko Kenani, ka kaya, Sa vakarota ko Jiova e na gusu i Mosese me soli na koro e so me keitou tiko kina, kei na vanua veico sa volita, me yaga ki na neitou manumanu e yavai va.

³ A ra sa solia vei ira na Livai ko ira na Isireli, mai na nodra i votavota na veikoro oqo kei na vanua veico sa volita, me vaka nai vakaro i Jiova.

⁴ A sa lutu nai votavota ki na nodra veivuvale na luve i Koaca: ia na luve i Eroni na bete, maivei ira na Livai, era rawata e tinikatolu na koro, e na vakawiri madigi, mai na mataqali i Juta, ka mai na mataqali i Simioni, ka mai na mataqali i Penijamini.

⁵ Ia ko ira sa vo vei ira na luve i Koaca, era rawata e tini na koro, e na vakawiri madigi, mai na veivuvale ni mataqali i Ifireimi, ka mai na mataqali i Tani, ka mai na dua na kena wase ni mataqali i Manasa.

⁶ Ia ko ira na luve i Kerisoni, era rawata e tinikatolu na koro, e na vakawiri madigi, mai na veivuvale ni mataqali i Isakari, ka mai na mataqali i Aseri, ka mai na mataqali i Nafitalai, ka mai na dua na kena wase ni mataqali i Manasa mai Pasani.

⁷ A sa tinikarua na koro era rawata na luve i Mirari, me vaka na nodra veivuvale, mai na mataqali i Rupeni, ka mai na mataqali i Kata, ka mai na mataqali i Sepuloni.

⁸ Ia era sa solia e na vakawiri madigi ko ira na Isireli, vei ira na Livai, na veikoro oqo kei na vanua sa volita, me vaka ka vakarota ko Jiova e na gusu i Mosese.

⁹ A ra solia na veikoro oqo, sa cavuti eke na yacadra, mai na nodra mataqali na Juta, ka mai na nodra mataqali na Simioni:

¹⁰ era sa rawata ko ira na luve i Eroni, e na nodra veivuvale na luve i Koaca, ni ra sa luve i Livai: ni sa votai taumada na nodra e na vakawiri madigi.

¹¹ A ra solia vei ira na koro i Aripa, na tama i Anaki, (ko ya ko Epironi,) kei na vanua e nai bili sa volita, sa toka mai na ulu-ni-vanua nei Juta.

¹² Ia na kena vanua na koro ko ya, kei na kena veikoro lalai, era sa solia vei Kelepi na luve i Jifune me nonai votavota.

¹³ A ra sa soli Epironi kei na vanua sa volita, vei ira na luve i Eroni na bete, me koro me dro kina ko koya sa vakamatea e dua, ko Lipina talega kei na vanua sa volita,

¹⁴ kei Jatiri kei na vanua sa volita, kei Esitimoa kei na vanua sa volita,

¹⁵ kei Oloni kei na vanua sa volita, kei Tipiri kei na vanua sa volita,

¹⁶ kei Eini kei na vanua sa volita, kei Juta kei na vanua sa volita, ko Peci-semesi kei na vanua sa volita; e ciwa na koro mai na mataqali ruarua oqo.

¹⁷ Ka mai na mataqali i Penijamini, ko Kipioni kei na vanua sa volita, ko Kipa kei na vanua sa volita,

¹⁸ ko Anacoci kei na vanua sa volita, kei Alimoni kei na vanua sa volita; e va na koro.

¹⁹ A koro kecega ni luve i Eroni, era bete, sa tinikatolu kei na vanua sa volita.

²⁰ Ia na nodra veivuvale na luve i Koaca, era Livai sa vo vei ira na luve i Koaca, na nodra veikoro sa lutu vei ira, e na vakawiri madigi, mai na mataqali i Ifireimi.

²¹ Ni ra soli Sikemi vei ira kei na vanua sa volita mai na ulu-ni-vanua ko Ifireimi, me koro me dro kina ko koya sa vakamatea e dua; kei Keseri kei na vanua sa volita,

²² kei Kipiseimi kei na vanua sa volita, kei Peci-oroni, kei na vanua sa volita; e va na koro.

²³ Ia mai na mataqali i Tani, ko Ilitike kei na vanua sa volita, ko Kipiconi kei na vanua sa volita,

²⁴ ko Eijaloni kei na vanua sa volita, ko Kaca-rimoni kei na vanua sa volita; e va na koro.

²⁵ Ia mai na dua na kena wase ni mataqali i Manasa, ko Teenaki kei na vanua sa volita; kei Kaca-rimoni kei na vanua sa volita; e rua na koro.

²⁶ Na koro kecega, vei ira na nodra veivuvale na luve i Koaca sa vo sa tini kei na vanua sa volita.

²⁷ Ia kivei ira na luve i Kerisoni, e na nodra veivuvale na Livai, era soli Kolani mai Pasani kei na vanua sa volita, me dro kina ko koya sa vakamatea e dua, mai na dua na kena wase ni mataqali i Manasa; kei Pesitira kei na vanua sa volita; e rua na koro.

²⁸ Ia mai na mataqali i Isakari, ko Kisioni kei na vanua sa volita, ko Tapiraci kei na vanua sa volita,

²⁹ ko Jarimoce kei na vanua sa volita, ko Eni-kanimi kei na vanua sa volita; e va na koro.

³⁰ Ia mai na mataqali i Aseri, ko Misali kei na vanua sa volita, ko Apitoni kei na vanua sa volita,

³¹ ko Elikaci kei na vanua sa volita, kei Riopi kei na vanua sa volita; e va na koro.

³² Ia mai na mataqali i Nafitalai, ko Ketesi mai Kalili kei na vanua sa volita, me dro kina ko koya sa vakamatea e dua; kei Emoci-tori kei na vanua sa volita, kei Karitani kei na vanua sa volita; e tolu na koro.

³³ A nodra koro kecega na luve i Kerisoni, me vaka na nodra veivuvale, sa tinikatolu na koro kei na vanua sa volita.

³⁴ Ia kivei ira na nodra veivuvale na luve i Mirari, na kena vo ni Livai, era soli Jokiniami kei na vanua sa volita, mai na mataqali i Sepuloni, ko Karita kei na vanua sa volita,

³⁵ ko Timina kei na vanua sa volita, ko Neelali kei na vanua sa volita; e va na koro.

³⁶ Ia mai na mataqali i Rupeni, era soli Peseri kei na vanua sa volita, kei Jeasa kei na vanua sa volita,

³⁷ ko Kitemoci kei na vanua sa volita, kei Mefeaci kei na vanua sa volita; e va na koro.

³⁸ Ia mai na mataqali i Kata, ko Remoci mai Kiliati kei na vanua sa volita, me dro kina ko koya sa vakamatea e dua; kei Meeneimi kei na vanua sa volita,

³⁹ ko Esiponi kei na vanua sa volita, ko Jaseri kei na vanua sa volita; na koro kece sa va.

⁴⁰ Na nodra koro kece na luve i Mirari, me vaka na nodra veivuvale, ko ya sa vo vei ira na nodra veivuvale na Livai, sa tinikarua na koro, e na vakawiri madigi.

⁴¹ Na nodra koro kecega na Livai, e loma ni nodra i votavota na Isireli, sa vasagavulu ka walu na koro kei na vanua sa volita.

⁴² Na veikoro yadua oqo era sa tiko vata kei na vanua sa volita: sa vakakina na koro kecega oqo.

⁴³ Sa solia vakaoqo vei ira na Isireli ko Jiova na vanua kece ka bubului kina ko koya me solia vei ira na nodra qase; a ra sa taukena, ka tiko kina.

⁴⁴ A sa vakacegui ira ko Jiova, e na yasana kecega, me vaka na ka kecega ka bubului kina vei ira na nodra qase; a sa sega ni dua na tamata vei ira kecega na nodra meca me vorati ira rawa; sa solia na nodra meca kecega ki na ligadra ko Jiova.

⁴⁵ Sa sega ni lutu e dua na ka e na ka vinaka kecega ka vosa kina ko Jiova kivei ira na Isireli; sa yaco kece sara ga.