Josua 20 - Vakavakadewa Makawa

Ai vakaro e na vuku ni veikoro ni drodro, 1-6. Sa lesi na veikoro ni drodro, 7-9.

¹ A sa vosa vei Josua ko Jiova, ka kaya,

² Mo vosa vei ira na Isireli, ka kaya, Dou lesia me nomudou na veikoro ni drodro, ka'u a vosa kina vei kemudou e na gusu i Mosese:

³ me dro kina ko koya sa vakamatea e dua ni sa sega ni nakita, se ni sa sega ni kila: ia dou na dro kina maivei koya sa nonai tavi me sauma na mate.

⁴ Ia ni sa dro ko koya ki na dua na koro oqo, ena tu ko koya e na matamata-ni-koro, ka tukuna vei ira na qase ni koro ko ya na ka sa cakava, a ra na kauti koya vei ira ki loma ni koro, a ra na lesia e dua na tikina, me tiko kina kei ira ko koya.

⁵ Ia kevaka sa muri koya ko koya sa nonai tavi me sauma na mate, era na sega ni soli koya ka ia na veivakamatei ki na ligana; ni sa vakamatea na wekana ka sega ni kila, ka sega ni cati koya eliu.

⁶ Ia ena tiko ga ko koya e na koro ko ya, ka yacova na siga e na tarogi kina e matadra nai soqosoqo me lewai, me yaco mada na nona mate ko koya sa bete levu e na gauna ko ya: me na qai lesu ko koya sa ia na veivakamatei, ki na nona koro, kei na nona vale, ki na koro ka dro maikina.

⁷ A ra sa lesi Ketesi mai Kalili e na ulu-ni-vanua ko Nafitalai, kei Sikemi mai na ulu-ni-vanua ko Ifireimi, kei Kiriaci-aripa (ko ya ko Epironi) mai na ulu-ni-vanua nei Juta.

⁸ Ia mai tai kadua ni Joritani, ka donui Jeriko vaka ki na tu-i-cake, era lesi Peseri mai na vanua liwa, mai na buca, e na mataqali i Rupeni, kei Remoci mai Kiliati, e na mataqali i Kata, kei Kolani mai Pasani, e na mataqali i Manasa.

⁹ Oqo na veikoro sa lesi vei ira kecega na Isireli, kei ira na vulagi sa tiko vulagi kei ira, me dro kina na tamata kecega sa mokuta-mate e dua ni sa sega ni nakita, ka me kakua ni mate e na liga i koya sa nonai tavi me sauma na mate, ka me tarogi mada eliu e na matadra nai soqosoqo.