Josua 18 - Vakavakadewa Makawa

Era vakatura cake na vale ni veitavaki mai Sailo, 1. Sa vakauqeta na mataqali e vitu ko Josua me ra qara na nodra i votavota, 2-10. Ai votavota nei Penijamini, 11-28.

¹ A ra sa soqoni vata nai soqosoqo taucoko ni Isireli mai Sailo, ka vakatura cake kina na vale ni veitavaki. A sa vakamalumalumutaki vei ira na vanua.

² A sa vo e vitu na mataqali vei ira na Isireli, sa sega ni rawata na nodra i votavota.

³ A sa kaya ko Josua kivei ira na Isireli, a cava na kena dede kemuni sa berabera kina ni la'ki taukena na vanua, sa solia vei kemuni ko Jiova na nodra Kalou na nomuni qase?

⁴ Ni lesia e lewe tolu na tamata mai na nomuni mataqali yadua: au na qai talai ira, a ra na cavu tu, ka veilakoyaki e na vanua, ka vola nai yalayala ni nodra i votavota; a ra na lesu mai vei au.

⁵ A ra na wasea me vitu na tikina: era na tiko na Juta e na nodra yasana mai na ceva, ka na tiko na mataqali i Josefa e na nodra yasana mai na tokalau.

⁶ Ia dou na vola na vanua me vitu na kena tikina, ka kauta mai nai vola vei au ki ke, me'u ia na vakawiri madigi vei kemuni eke e na mata i Jiova na noda Kalou.

⁷ Ia ko ira na Livai, sa sega na nodra tikina vata kei kemuni; ni sa nodra i votavota na cakacaka vakabete vei Jiova: ia ko ira na Kata, kei na Rupeni, ka dua na kena wase ni mataqali i Manasa, era sa rawata na nodra i votavota mai tai kadua ni Joritani, mai na tu-i-cake, o koya sa solia vei ira ko Mosese nai talatala i Jiova.

⁸ A ra sa cavu tu ko ia na tamata, ka lako tani: ia ko Josua, sa vakaroti ira ka lako me ra vola na vanua ka kaya, Dou veilakoyaki e na vanua, ka vola, ka lesu tale mai vei au, me'u qai vakawiri madigi vei kemudou eke e na mata i Jiova, e Sailo.

⁹ A ra sa lako ko ira na tamata, ka lakova na vanua, ka vola me vaka na veikoro, ka wasea me vitu na tikina, e na dua nai vola, a ra sa lesu vei Josua ki nai tikotiko mai Sailo.

¹⁰ A sa vakawirimadigi vei ira ko Josua mai Sailo, e na mata i Jiova: ka wasea maikina na vanua ko Josua kivei ira na Isireli, me vaka na kedrai wasewase.

¹¹ A sa qarava nai votavota ni nodra mataqali na Penijamini me vaka na nodra veivuvale: a sa tu na kenai yalayala ni nodra i votavota e na kedra maliwa na Juta kei na luve i Josefa.

¹² Ia na nodra i yalayala e na yasana ki na tokalau sa tekivu mai na Joritani; a sa lako cake nai yalayala ki na yasa i Jeriko sa donuya na tokalau, a sa lako cake e na veiulu-ni-vanua vaka ki ra; ia sa kenai mudumudu na lekutu mai Peciaveni.

¹³ A sa lako yani maikea nai yalayala vaka ki Lusa, ki na yasa i Lusa, (ko ya ko Peceli,) sa donuya na ceva; a sa lako sobu nai yalayala ki Ataroci-atari, voleka ki na ulu-ni-vanua sa toka e na yasa ki na ceva ki Peci-oroni era.

¹⁴ A sa volai maikea nai yalayala, ka lako volita na yasa ni wasawasa ki na ceva, mai na ulu-ni-vanua e na mata i Peci-oroni ki na ceva; ia sa kenai mudumudu ko Kiriaci-peali, (oqo ko Kiriaci-jiarimi,) e dua na nodra koro na Juta: oqo na kenai yalayala ki ra.

¹⁵ Ia na yasana ki na ceva sa tekivu mai nai yalayala kei Kiriaci-jiarimi, a sa lako yani nai yalayala vaka ki ra, ka yaco ki na wai vure mai Nefitoa:

¹⁶ a sa lako sobu nai yalayala ki na ucu ni ulu-ni-vanua sa donuya na buca ni luve i Inomi, oqori mai na buca ni luve i Refeimi, vaka ki na tokalau, sa lako sobu ki na buca nei Inomi, ki na yasa ni kai Jepusa ki na ceva, ka lako sobu ki Enirokeli,

¹⁷ a sa volai mai na tokalau, ka lako yani ki Eni-semesi, ka lako yani ki Kililoci, ko ya sa donuya nai cabecabe ki Atumimi, ka lako sobu ki na Vatu i Poani, na luve i Rupeni,

¹⁸ a sa lako yani vaka ki na yasa sa donui Arapa, ki na mata ni tokalau, ka lako sobu ki Arapa:

¹⁹ a sa lako yani nai yalayala ki na yasa i Peci-okila vaka ki na tokalau: ia nai mudumudu ni yalayala na toba ni Wasa Tuituina vaka ki na tokalau mai nai otioti ni Joritani ki na ceva: oqo nai yalayala ki na ceva.

²⁰ Ia na Joritani sa kenai yalayala e na yasa ki na tu-i-cake. Oqo na kenai yalayala sa volita na nodra i votavota, na Penijamini, me vaka na nodra veivuvale.

²¹ Ia na veikoro ni nodra mataqali na Penijamini, me vaka na nodra veivuvale, ko Jeriko, kei Peci-okila, kei na buca mai Kisisi,

²² kei Peci-arapa, kei Simareimi, kei Peceli,

²³ kei Avimi, kei Para, kei Ofira,

²⁴ kei Kifari-Amoni, kei Ofini, kei Kepa; e tinikarua na koro kei na kedra veikoro lalai;

²⁵ ko Kipioni, kei Rama, kei Pieroci,

²⁶ kei Misipe, kei Kifira, kei Mosa,

²⁷ kei Rikemi, kei Iripeli, kei Tarela,

²⁸ kei Sela, ko Elefi, kei Jepusa (ko ya ko Jerusalemi), ko Kepaci, ko Kiriaci; e tinikava na koro kei na kedra veikoro lalai. Oqo na nodra i votavota na Penijamini, me vaka na nodra veivuvale.