Josua 17 - Vakavakadewa Makawa

Ai votavota ni mataqali i Manasa, 1-6; a nodra i yalayala, 7-13. Era kerekere na luve i Josefa, me levu cake na nodra i votavota, 14-18.

¹ A sa dua nai votavota vei ira na mataqali i Manasa; ni sa ulumatua i Josefa ko koya; vei Mekiri na ulumatua i Manasa, na tama i Kiliati: ni sa tamata i valu ko koya, sa nona kina ko Kiliati kei Pasani.

² Ia ko ira na luve i Manasa sa vo, e ra sa tauyadua na nodra i votavota me vaka na nodra veivuvale; vei ira na luve i Epieseri, kei ira na luve i Eleki, kei ira na luve i Esirieli, kei ira na luve i Sikemi, kei ira na luve i Eferi, kei ira na luve i Simita: ko ira oqo na tagane na luve i Manasa na luve i Josefa, me vaka na nodra veivuvale.

³ Ia ko Silofati, na luve i Eferi, na luve i Kiliati, na luve i Mekiri, na luve i Manasa, sa sega na luvena tagane, eso ga na luvena yalewa: ia oqo na yacadratou na luvena yalewa, ko Mala, kei Noa, ko Okila, ko Milika, kei Tirisa.

⁴ A ratou sa lako mai kivei Eliesa na bete, vei Josua talega na luve i Nuni, kei ira na turaga, ka kaya, Sa vakarota vei Mosese ko Jiova me solia vei keitou nai votavota e na kedra maliwa na weka i keitou. Sa qai solia kina vei ira ko koya e dua nai votavota e na kedra maliwa na weka i tamadratou, me vaka na vosa i Jiova.

⁵ A sa lutu vei ira na Manasa e tini na tikina, kei na vanua ko Kiliati kei Pasani talega, mai na tai kadua ni Joritani;

⁶ ni sa dua na nodra i votavota na luve i Manasa era yalewa e na kedra maliwa na luvena tagane: ia ko ira na luve i Manasa sa vo, sa nodra na vanua ko Kiliati.

⁷ Ia na nodra i yalayala na mataqali i Manasa sa tekivu mai Aseri ka yaco ki Mikimica, ko ya sa donui Sikemi: a sa lako nai yalayala ki nai matau kivei ira na kai Eni-tapua.

⁸ Sa nodra na Manasa na vanua ko Tapua, ia ko Tapua e na nodra i yalayala na Manasa, sa nodra na Ifireimi;

⁹ a sa lako sobu nai yalayala ki na uciwai ko Kana, mai na tai ni uciwai ki na ceva: sa nodra na Ifireimi na veikoro oqo, e na maliwa ni nodra veikoro na Manasa. Na nodra i yalayala talega na Manasa, sa koto e na tai ni uciwai ki na tokalau, ia sa kenai mudumudu na waitui:

¹⁰ sa nodra na Ifireimi na tai ki na ceva, ka nodra na Manasa na tai ki na tokalau, ia na kenai yalayala na waitui; a sa yaco ki Aseri mai na tokalau, ka yaco ki Isakari mai na tu-i-cake.

¹¹ Ia sa nodra na Manasa, mai Isakari kei Aseri, ko Peci-siani kei na kena veikoro, kei Ipiliami kei na kena veikoro, kei ira na kai Toa kei na kena veikoro, kei ira na kai Edoa kei na kena veikoro, kei ira na kai Teenaki kei na kena veikoro, kei ira na kai Mikito kei na kena veikoro, sa tolu na vanua.

¹² Ia era sa sega ni vakasavi ira tani rawa na lewe ni veikoro ko ya ko ira na Manasa; ia era sa gu na kai Kenani me ra tiko e na vanua ko ya.

¹³ Ia ni ra sa tubu me kaukauwa na Isireli, era sa vakasaurarataki ira na kai Kenani me ra qali; ka sega ni vakasavi ira tani sara.

¹⁴ A ra sa vosa vei Josua ko ira na luve i Josefa, ka kaya, A cava ko sa solia kina vei au e dua bauga nai votavota ka dua bauga na tikina me'u taukena, ni keimami sa lewe vuqa, ka ni sa vakalougatataki au ko Jiova ka yaco ki na gauna oqo?

¹⁵ A sa kaya vei ira ko Josua, Kevaka ko ni sa lewe vuqa, mo ni lako cake ki na veikau, ka taya sobu maikina me nomuni e na nodra vanua na lewe ni Veikoro lalai kei na tamata yagolevu, ke sa qiqo vei kemuni na ulu-ni-vanua mai Ifireimi.

¹⁶ A ra sa kaya na luve i Josefa, Sa sega ni rauti keimami na ulu-ni-vanua: ia na kai Kenani sa tiko e na vanua buca, era sa vakaqiqi-ni-valu kaukamea, mai Peci-siani kei na kena veikoro, kei ira mai na buca ko Jesirieli.

¹⁷ A sa vosa ko Josua ki na mataqali i Josefa, io vei ira na Ifireimi kei na Manasa, ka kaya, Kemuni sa lewe vuqa, a sa levu na nomuni qaqa: ena sega ni dua bauga na nomuni votavota;

¹⁸ ni na nomuni na ulu-ni-vanua: ia ke sa veikau ko ya, ko ni taya sobu: ena nomuni talega na kena veiyalayala: ia na kai Kenani, kevaka era sa vakaqiqi-ni-valu kaukamea, ka ra sa kaukauwa talega ko ira, kemuni na vakasavi ira tani ga.