Josua 16 - Vakavakadewa Makawa

A nodraui votavota na luve i Josefa, 1-4. Ai votavota nei Ifireimi, 5-10.

¹ Ia na nodraui votavota na luve i Josefa, sa tekivu mai na Joritani sa voleka ki Jeriko, mai na wai ni Jeriko e na yasana ki na tu-i-cake, vaka ki na veikau sa lako cake mai Jeriko e na loma ni ulu-ni-vanua ki Peceli,

² a sa lako mai Peceli ki Lusa, ka lako yani ki nai yalayala i Ariki ki Ataroci,

³ a sa lako sobu vaka ki ra ki nai yalayala i Jafileti, ka lako ki nai yalayala i Peci-oroni mai ra, ka yaco ki Keseri: ia na kenai mudumudu na waitui.

⁴ Ia era sa rawata na nodra i votavota, ko ira na Manasa kei ira na Ifireimi na luve i Josefa.

⁵ Ia oqo nai yalayala ni nodra tikina na Ifireimi me vaka na nodra veivuvale: nai yalayala ni nodra tikina e na yasana ki na tu-i-cake ko Ataroci-atari, ka yacovi Peci-oroni maicake;

⁶ a sa lako yani nai yalayala vaka ki na waitui ki Mikimica, ki na tokalau; a sa gole yani nai yalayala vaka ki na tu-i-cake ka yacovi Teenaci-sailo, ka sivia e na yasana ki na tu-i-cake, ka yaco ki Janoa;

⁷ a sa lako sobu mai Janoa ki Ataroci, kei Neeraci, ka yacovi Jeriko, ka basika ki na Joritani.

⁸ Sa lako yani mai Tapua nai yalayala, ka lako vaka ki ra, ka yaco ki na uciwai ko Kana; ia na kenai mudumudu na waitui. Oqo nai votavota ni nodra mataqali na Ifireimi, me vaka na nodra veivuvale.

⁹ Ia na nodra veikoro na Ifireimi sa sega ni tiko e na nodra tikina, sa tiko ga e na nodra i votavota na Manasa; na veikoro kecega kei na kedra veikoro lalai.

¹⁰ A ra sa sega ni vakasavi ira tani na kai Kenani ka tiko mai Kiseri. Ia sa tiko ga na kai Kenani e na kedra maliwa na Ifireimi ka yacova na siga oqo, ka ra sa qali vei ira.