Josua 10 - Vakavakadewa Makawa

Eratou lewe lima na tui eratou sa la'ki veivala kei Kipioni, 1-5. Sa talaki vei Josua ko ira na kai Kipioni, 6,7; a sa vakabulai ira ko koya mai na ligadratou na tui, ka mokuti ira na meca, 8-10; a sa tau na uca cevata, ka vakamatei ira era dro, 11. Sa tu vakadua na mata-ni-siga mai na lomalagi, 12-15. Eratou sa dro ko iratou na tui ka vunitaki; a ratou sa kune ka vakamatei, 16-27. Sa kaba na veikoro e vuqa ko Josua, 28-43.

¹ Ia ni sa rogoca ko Etoni-seteki na tui Jerusalemi ni sa kabai Ai ko Josua, a sa vaqeavutaka; (me vaka ka kitaka ko koya ki Jeriko kei na kena tui, sa kitaka vakakina ki Ai kei na kena tui;) ka ra sa veisaututaki ko ira na kai Kipioni kei ira na Isireli, ka ra tiko vata;

² era sa qai rere vakalevu, ni sa koro levu sara ko Kipioni, ka sa vaka e dua na koro vakaturaga, ia sa levu cake ka lailai sobu ko Ai, ka ni sa qaqa ko ira kece na kena tamata.

³ A sa talaki ko Etoni-seteki na tui Jerusalemi vei Oami na tui Epironi, kei Pirami na tui Jarimoce, kei Jafia na tui Lakisi, kei Tipiri na tui Ekiloni, ka kaya,

⁴ Dou lako cake mai vei au, ka vukei au, me da samuti Kipioni, ni sa veisaututaki kei Josua kei ira na Isireli.

⁵ A ratou sa soqoni vata ko iratou limalima na nodra tui na Amoraiti, ko tui Jerusalemi, ko tui Epironi, ko tui Jarimoce, ko tui Lakisi, kei tui Ekiloni, a ra sa lako cake, ko iratou kei na nodratou i valu kecega, ka la'ki tiko me donui Kipioni, ka veivala kaya.

⁶ A ra sa talaki ko ira na kai Kipioni kivei Josua ki nai tikotiko mai Kilikali, ka kaya, Me kakua ni berabera na ligamu vei keimami na nomu tamata; mo lako kusarawa cake mai vei keimami, ka vukei keimami, ka vakabulai keimami, ni ra sa soqoni vata mai vei keimami na nodra tui kece na Amoraiti era sa tiko mai na ulu-ni-vanua.

⁷ A sa cabe cake mai Kilikali ko Josua, ko koya, kei ira vata kaya na tamata i valu kece, kei na tamata i valu qaqa kecega.

⁸ A sa kaya vei Josua ko Jiova, Mo kakua ni rerevaki ira; ni'u sa soli ira ki na ligamu; ena sega e dua vei ira me tu rawa e matamu.

⁹ A sa lako vakasauri vei ira ko Josua, ni sa lako cake mai Kilikali e na bogi ka sigavaka.

¹⁰ A sa vagucataki ira ko Jiova e matadra na Isireli, a ra sa mokuti ira e na ravuravu levu mai Kipioni, ka cicimuri ira e na sala sa lako cake ki Peci-oroni, ka mokuti ira tiko ka yaco ki Aseka kei Maketa.

¹¹ Ia ni ra sa dro tiko e matadra na Isireli, e na sala sa lako sobu ki Pece-oroni, ka yaco ki Aseka, sa vakatauca tiko vei ira ko Jiova na vatu lelevu mai lomalagi, a ra sa mate kina: era sa lewe levu ka mate e na veivatu ni uca-cevata, a ra lewe lailai era vakamatea na Isireli e nai seleiwau.

¹² Ia e na siga ko ya ni sa soli ira na Amoraiti vei ira na Isireli ko Jiova, sa qai vosa vei Jiova ko Josua, ka kaya e matadra na Isireli, Na mata-ni-siga, mo tei tu vakadua mada mai Kipioni, Kei iko talega, Na vula, mai na buca nei Eijaloni.

¹³ A sa tu vakadua na mata-ni-siga, a sa tu vakadua na vula, Me ra cudruvi ira tiko na nodra meca ko ira na tamata. Sa sega li ni volai oqo e nai vola i Jeseri? A sa tu vakadua na mata-ni-siga mai na loma ni lagi, ka sega ni kusarawa me la'ki dromu, ka me rauta e dua beka na siga taucoko.

¹⁴ A sa sega na siga eliu se emuri me tautauvata kei na siga ko ya, sa vakarorogo kina ko Jiova ki na vosa ni tamata: ni sa totaki ira na Isireli ko Jiova.

¹⁵ A sa lesu ko Josua, kei ira vata kaya na Isireli kecega, ki nai tikotiko mai Kilikali.

¹⁶ A ratou sa dro ko iratou na tui limalima ko ya, ka vunitaki ira e na dua na qara-vatu mai Maketa.

¹⁷ A sa tukuni vakaoqo vei Josua, Sa kune na tui limalima eratou a vuni e na qara-vatu mai Maketa.

¹⁸ A sa kaya ko Josua, Dou vaqiqica eso na vatu lelevu ki na gusu ni qara-vatu, ka lesia eso na tamata me vakatawai iratou:

¹⁹ ia dou kakua ni berabera; dou tei cicivi ira ga na nomudou meca, ka mokuti ira sa kenai murimuri; kakua ni laivi ira me ra curuma na nodra veikoro, ni sa soli ira ki na ligamudou ko Jiova na nomudou Kalou.

²⁰ Ia ni sa oti na nodra mokuti ira ko Josua kei ira na Isireli e na ravuravu levu sara, ka me ra oti mada, sa ra qai la'ki curuma eso na koro kaukauwa ko ira na kedra vo.

²¹ A ra lesu e na vakacegu na tamata kecega ki nai tikotiko kivei Josua mai Maketa: sa sega e vakadarayame vei ira na Isireli.

²² A sa kaya ko Josua, Dou dolava na gusu ni qara-vatu, ka kauti iratou mai vei au ki tautuba mai na loma ni qara-vatu tui limalima ko ya.

²³ A ra sa kitaka vakakina, ka kauti iratou mai vua mai na loma ni qara-vatu na tui limalima ko ya, ko tui Jerusalemi, ko tui Epironi, ko tui Jarimoce, ko tui Lakisi, ko tui Ekiloni.

²⁴ Ia ni ra sa kauti iratou na tui koya ki tautuba vei Josua, sa qai kacivi ira kecega mai na Isireli ko Josua, a sa kaya vei ira na kapiteni ni tamata i valu era sa lako vata kaya, Dou toro mai, ka vaca na domodratou na tui oqo. A ra sa toro mai, ka vaca na domodratou.

²⁵ A sa kaya vei ira ko Josua, Dou kakua ni rere, se yalolailai, dou kaukauwa ka qaqa: ni na cakava vakaoqo ko Jiova vei ira na nomudou meca kecega dou na veivala kei ira.

²⁶ Sa oti sa qai mokuti iratou ko Josua, ka vakamatei iratou, ka vakalilici iratou e na kau e lima: a ratou, sa lili tu e na kau ka yacova na yakavi.

²⁷ Ia ni sa dromu na mata-ni-siga, sa vakarota ko Josua, a ra sa kevutaki iratou mai na kau, ka biuti iratou ki na qara-vatu eratou a vuni kina, ka binia e na gusu ni qara-vatu eso na vatu lelevu, sa tu kina ka yacova na siga oqo.

²⁸ A sa kabai Maketa ko Josua e na siga ko ya, ka samuta e nai seleiwau, ka vakamatea sara na kena tui, o ira, kei ira kecega na tamata sa tiko kina; sa sega ni laiva e dua me vo tu kina: a sa kitaka vua na tui Maketa ko koya me vaka ka kitaka ko koya vua na tui Jeriko.

²⁹ A sa lako tani e Maketa ko Josua, kei ira vata kaya na Isireli kecega, ki Lipina, ka veivala kei Lipina:

³⁰ ia oqori talega sa solia ko Jiova, kei na kena tui, ki na ligadra na Isireli; a ra sa samuta e nai seleiwau, kei na tamata kecega sa tiko kina; sa sega ni laiva e dua me vo tu kina; a sa kitaka vua na kena tui ko koya me vaka ka kitaka ko koya vua na tui Jeriko.

³¹ A sa lako tani e Lipina ko Josua, kei ira vata kaya na Isireli kecega, ki Lakisi, ka tiko vakaivalu kina, ka veivala kaya:

³² a sa soli Lakisi ko Jiova ki na ligadra na Isireli; a ra sa kaba e na kenai karua ni siga, ka samuta e nai seleiwau, kei na tamata kecega sa tiko kina, me vaka na ka kece sa kitaka ko koya ki Lipina.

³³ Sa qai lako cake ko Orami na tui Keseri me vukei Lakisi; a sa mokuti koya kei na nona tamata o Josua, ka sega ni laiva e dua me vo tu vua.

³⁴ A sa lako tani e Lakisi ko Josua, kei ira vata kaya na Isireli kecega, ki Ekiloni, ka tiko vakaivalu kina, ka veivala kaya:

³⁵ a ra sa kaba e na siga ko ya, ka samuta e nai seleiwau, ia na tamata kecega sa tiko kina sa vakamatea sara ko koya e na siga ko ya, me vaka na ka kecega ka kitaka ko koya ki Lakisi.

³⁶ A sa lako cake mai Ekiloni ko Josua, kei ira vata kaya na Isireli kecega, ki Epironi; a ra sa veivala kaya:

³⁷ a ra sa kaba, ka samuta e nai seleiwau, kei na kena tui, kei na kena veikoro kece, kei na tamata kecega sa tiko kina; sa sega ni laiva ko koya e dua me vo tu kina; a sa vakarusa sara, kei na tamata kecega sa tiko kina, me vaka na ka kece ka kitaka ko koya ki Ekiloni.

³⁸ A sa lesu mai ko Josua, kei ira vata kaya na Isireli kecega, ki Tipiri, ka veivala kaya:

³⁹ a sa kaba ko koya, a ra sa yavita e nai seleiwau na kena tui, kei na kena koro kecega; a ra sa vakamatea sara na tamata kecega sa tiko kina; sa sega ni laiva ko koya e dua me vo tu kina: me vaka ka kitaka ki Epironi ko koya, sa kitaka vakakina ki Tipiri, kei na kena tui; me vaka ka kitaka talega ki Lipina, kei na kena tui.

⁴⁰ A sa samuta ko Josua na vanua vakaulunivanua kecega, kei na vanua sa no vaka ki na Ceva, kei na vanua vakabuca, kei na vanua vakamata-ni-wai, kei na nodra tui kecega: sa sega ni laiva e dua me vo tu, sa vakamatea sara na ka kecega sa bula, me vaka ka vakarota ko Jiova na Kalou ni Isireli.

⁴¹ A sa mokuti ira ko Josua ka vakatekivu mai Ketesa-parinea ka yaco ki Kesa, kei na vanua taucoko ko Koseni, ka yaco ki Kipioni.

⁴² A sa rawata kece na tui oqori ko Josua kei na kedra vanua e na gauna ga ko ya, ni sa totaki ira na Isireli ko Jiova na Kalou i Isireli.

⁴³ A sa lesu ko Josua, kei ira vata kaya na Isireli kecega, ki nai tikotiko mai Kilikali.