Jope 8 - Vakavakadewa Makawa

Sa kaya ko Pilitati ni sa dodonu na Kalou e na ka e cakava, 1-7. Sa vaka ni sa daucudruvi eliu na dauveivakaisini, 8-19. Sa kaya talega ni sa dodonu na ka sa yaco vei Jope, 20-22.

¹ Sa qai vosa ko Pilitati na luve i Sua, ka kaya,

² E bogi vica mo cavuta kina na ka vakaoqo? E bogi vica me sa vaka na cagi kaukauwa na vosa ni gusumu?

³ Sa ia beka na Kalou na lewa sa sega ni dodonu? Se vakacala beka na ka dodonu ko Koya sa Kaukauwa?

⁴ Kevaka era sai valavala ca vua ko iratou na luvemu, Ka sa vakatalai ira tani ko koya e na vuku ni nodra talaidredre;

⁵ Kevaka ko sa vakasaqara taudonu na Kalou, Ka ia na nomu vakamamasu vei Koya sa Kaukauwa;

⁶ Kevaka ko sa savasava ka dodonu; E sa na qai yadra dina sara mai e na vukumu ko koya, Ena vakasaututaka talega na nomu i tikotiko dodonu.

⁷ Kevaka sa ka lailai na nomu i vakatekivu, Ena ka levu sara ga na nomu i otioti.

⁸ Ia mo taroga mada nai tabatamata makawa, Ka mo gumatua ni tarogi ira na nodra qase:

⁹ Ni da sa tubu wale e na noa koi keda, ka sega ni kila e dua na ka, Ni sa vaka wale na yaloyalo na noda siga e vuravura:

¹⁰ Era na sega beka ni vakavulici iko, ka tukuna vei iko, Ka cavuta na vosa mai na lomadra?

¹¹ Ena tubu li na taria ni sa sega na lolobo? Ena tubu na kuta ni sa sega na wai?

¹² Ni sa drokadroka tu, ka sega ni tamusuki, Sa malai rawarawa ga oqori, ka dredre na co kecega.

¹³ Sa vakakina na nodra sala kecega era sa guilecava na Kalou; Ia ena sega ni yaco na ka e nuitaka na dauveivakaisini:

¹⁴ Ena muduki laivi na ka sa nuitaka ko koya; Ena dua na viritalawalawa ga na ka e vakararavi kina.

¹⁵ Ena ravita na nona vale, ia ena sega ni tu: Ena taura matua, ia ena sega ni dei.

¹⁶ Sa drokadroka tu ko koya e na mata-ni-siga, A sa tubu na tabana e nona were.

¹⁷ Sa vereverea tu na wakana e nai binibini; Sa kunea na tikina vatuvatu.

¹⁸ Kevaka ena cavu laivi ga ko koya mai na nona yasana, Ena qai cakitaki koya, ka vaka, Au a sega ni kunei iko.

¹⁹ Raica, sa vaka ga oqo na nona reki, Ia ena tubu eso tani tale mai na qele ko ya.

²⁰ Raica, ena sega ni biuta tani na tamata yalododonu na Kalou, Ena sega talega ni vukei ira nai valavala ca:

²¹ Ena vakasinaita mada na gusumu e na dredre, Kei na tebenigusumu e na marau:

²² Ko ira era cati iko era na vakaisulutaki e na madua; Ena yali sara talega na nonai tikotiko nai valavala ca.