Jope 7 - Vakavakadewa Makawa

Sa vaka ko Jope sa dodonu na nona via mate, 1-11. Sa didivaka na ka eso vua na Kalou, 12-21.

¹ Sa sega beka nai valu me ia na tamata e vuravura? A nona siga sa sega beka ni tautauvata kei na siga ni tamata sa voli?

² Me vaka sa gadreva sara na rurugu na tamata, Ka me vaka na tamata sa voli sa waraka tiko nai sau ni nona cakacaka:

³ Sa noqu i votavota vakakina na veivula wale, A sa lesi vei au na bogi ni vutugu.

⁴ Ni'u sa la'ki koto, au sa kaya, Au na duri ninaica, me oti na bogi? Ka'u sa veivukiyaki koto ga, a sa kida na mataka.

⁵ Sa vakaisulu na lewequ e na baca kei na qele vavaku; Sa drakusi na kuliqu, ka sa boi ca mai.

⁶ Sa ka totolo na noqu siga ka berabera na nonai talitali na dautali sulu, A sa vakaoti ka sega na ka me'u nuitaka.

⁷ Mo nanuma sa cagi walega na noqu bula: Ena sega ni kunea tale na ka vinaka na mataqu.

⁸ A mata i koya sa raici au ena sega ni raici au tale: Sa raici au na matamuni, ia ka'u sa qai sega ga.

⁹ Sa seavu na o ka lako tani yani; Sa vakakina ko koya sa lako sobu ki nai bulubulu, ena sega ni lako cake tale mai.

¹⁰ Ena sega ni lesu tale mai ki nona vale, Ena sega ni kilai koya tale na nona yasana.

¹¹ Ia koi au, ka'u na sega ni tarova na gusuqu; Ka'u na vosa ni sa yaluma na yaloqu; Ka'u na didi ni sa gaga na lomaqu.

¹² Koi au beka na wasawasa, se na tavuto, Ko ni sa lesia kina e dua me vakatawai au?

¹³ Ni'u sa kaya, Ena vakacegui au na noqu i mocemoce; Ena vakacegui au mai na noqu mate na noqu i davodavo;

¹⁴ Ko ni sa qai vakarerei au e na tadra, Ka vakadomobulataki au e na raivotu:

¹⁵ Au sa digitaka kina na kukuna kei na mate, Ka cata me'u bula:

¹⁶ Au sa vakasisilataka; au sa sega ni via bula tikoga: Mo ni laivi au ga; ni sa ka wale na noqu bula.

¹⁷ A cava na tamata, mo ni vakalevulevui koya kina? Ka vakananumi koya kina?

¹⁸ Ka talevi koya e na mataka kecega, Ka vakatovolei koya tikoga?

¹⁹ A cava na kena dede ko ni sa sega ni gole tani kina vei au, Se laivi au tu me'u tei tiloma mada na noqu weli?

²⁰ Au sai valavala ca; a cava me'u cakava vei kemuni, koi kemuni sa daumaroroya na tamata? A cava ko ni sa lesi au kina me'u ka mo ni vanavana kina, Au sa yaco kina me'u ka bibi vei au vakai au ga?

²¹ Ia ka cava ko ni sa sega kina ni bokoca na noqu caka cala, ka kauta tani na noqu i valavala ca? Ni'u na qai koto sobu e na kuvu-ni-soso; Ia kemuni na qarai au vagumatua, ia ka'u na yali ga.