Jope 5 - Vakavakadewa Makawa

A ka rarawa sa tubu e na vuku ni ca ni tamata, 1-7. E vinaka vua sa rarawa me nanuma vua na Kalou, 8-16. Ena qai yaga na ka rarawa vua sa vakararavi vei koya, 17-27.

¹ Mo ia mada na kaci; de dua beka me via rogo mai vei iko? Ia ko cei vei ira era a yalosavasava mo goleva?

² Ni sa vakamatea na tamata lialia na yaloca, A sa vakarusai koya sa sega ni vuku na vuvu.

³ Au sa kunea na lialia ni sa vakawakana tu: Ia ka'u a kaya vakasauri me sa ca na nonai tikotiko.

⁴ Sa yawa ni tiko vinaka ko iratou na luvena, A ra sa butuqaqi mai na matamata-ni-koro, A sa sega e dua me vakabulai ira.

⁵ Sa kania na kedra vuata ko koya sa viakana, A sa kauta tani mai na loma ni kau votovotoa, A sa tiloma na nodra i yau ko koya sa viagunu.

⁶ E dina sa sega ni tubu na ca mai na kuvu-ni-soso, A sa sega ni tubu mai na qele na rarawa;

⁷ A sa sucu ga na tamata me rarawa, Me vaka ni sa dauvuka cake na lidi-ni-buka.

⁸ Ia koi au ka'u na golevi koya kina na Kalou, Ka'u na vakalaiva na noqu ka vua na Kalou.

⁹ Ko koya sa cakava tiko na ka levu ka sa sega ni kilai rawa; Na ka e veivakurabuitaki sa sega ni wili rawa:

¹⁰ Ko koya sa vakatauca na uca ki vuravura, Ka sa solia na wai ki na veiwere:

¹¹ Me vakatikori ira ki cake era tiko era; Me ra vueti cake me ra tiko vinaka ko ira sa dautagi.

¹² Sa vukica ko koya na nodra i lawaki na tamata qaseqase, Ka sa sega kina ni kitaka rawa na ligadra na ka era segata tiko.

¹³ Sa coriti ira na vuku e na nodra qaseqase; A sa biliga tani na nodra lewa na yalovakatani.

¹⁴ Era sa ciciva na butobuto ni sa siga tu, A ra sa vakayayamo voli e na siga levu me vaka e na bogi.

¹⁵ Ka sa vakabula na dravudravua mai nai seleiwau; Mai na gusudra, kei na ligadra na kaukauwa.

¹⁶ A ka oqo sa nuidei kina ko koya na dravudravua, Ka sa sogorubu na gusuna sa sega ni dodonu.

¹⁷ Raica, sa kalougata na tamata sa vunauca ko koya na Kalou: A ka oqo mo kakua kina ni beca ni sa vakararawataki iko ko Koya sa Kaukauwa:

¹⁸ Ni sa vakararawataka, a sa vivia talega: Sa vakamavoataka, a sa vakabula talega e na ligana.

¹⁹ E na ka rarawa e ono, ena vakabulai iko ko koya: Ia e na kenai kavitu, ena sega na ca me tauvi iko.

²⁰ Ni sa dausiga, ena vakabulai iko mai na mate: E nai valu talega, mai na kaukauwa ni seleiwau.

²¹ Ko na vunitaki mai na kaukauwa ni vosa: Ia ni sa lako mai na veivakarusai, ko na sega ni rerevaka.

²² Ko na dredrevaka na veivakarusai kei na dausiga: Ko na sega talega ni rerevaka na manumanu ni vanua.

²³ Ni dou na tovata kei na veivatu ni vanua; Ka ra na veivinakati kei iko na manumanu ni vanua.

²⁴ Ia ko na kila talega ni na sautu na nomu vale; Ia ko na taleva na nomu i tikotiko, ka na sega na ka e yali kina.

²⁵ Ko na kila talega ni ra na le vuqa na luvemu, Ia na nomu kawa ena vaka na co ni vanua.

²⁶ Ko na yaco ki na nomu i bulubulu ni ko sa qase vinaka mai, Me vaka nai vau sila sa yau mai e na kena gauna.

²⁷ Raica oqo keitou sa qaqa ka sa vakakina; Mo rogoca, ka kila talega mo vinaka kina.