Jope 41 - Vakavakadewa Makawa

Sa tukuna na livaiacani na Kalou.

¹ Ko sa yavia rawa beka mai na livaiacani e na siwa? Se vauca na yamena e na dali ko sa vakatukuca sobu?

² Ko na daramaka beka e dua na dali ki na ucuna? Se cula basika na galegalena e nai qila?

³ Ena masuti iko vakalevu beka? Ena vosa vakamalumalumu vei iko?

⁴ Ena ia beka na veiyalayalati kei iko? Ko na kauti koya li me nomu tamata ka tawa mudu?

⁵ Drau na qito kaya beka me vaka ko qito kei na manumanu vuka? Se ko na vauca me nodra na nomu vada?

⁶ Ko ira na veitokani, era na cakava beka me nodra ka ni vovoli? Era na vota beka vei ira na dauveivoli?

⁷ Ko na vakaosoosoya beka na kulina e na saisai aironi? Se na uluna e na moto ni ika?

⁸ Mo tabaka e na ligamu; Nanuma na veivaluti, ka kakua ni kitaka tale.

⁹ Raica, sa sega ni yaga na nanuma me rawai ko koya: Ena domobula e dua ni sa raica walega, se segai?

¹⁰ Sa sega e dua sa doudou me via vakacudruya: Ia ko cei na yatedei me qai tu rawa e mataqu?

¹¹ Ko cei sa solia taumada vei au, me'u sauma tale vua? A ka kece sa tu e ruku ni lomalagi sa noqu ga.

¹² Au na sega ni galutaka na veitiki ni yagona, Se nona kaukauwa, se nona vatukai vinaka.

¹³ Ko cei sa luvata rawa na nonai sulu esau? Se ko cei me torova na nonai tarovi sa taqarua?

¹⁴ Ko cei me basuka nai sogo ni matana? Sa ka rerevaki tu na batina ka tu volita.

¹⁵ Sa dokai koya e na vuku ni varina, Sa sogodregati matua vata sara;

¹⁶ Sa vakata vata e dua na tikina ki na dua na tikina tani, Me dredre kina ni curuma na cagi;

¹⁷ Sa sema vata e dua na tikina ki na kenai sa, Sa veikabi ga, me dredre kina ni tawase.

¹⁸ Ni sa suru ko koya, sa cila mai kina na rarama; Ia na matana sa vaka ni sa kida na mataka:

¹⁹ Sa lako mai na gusuna na cina caucaudre, Sa lidi maikina na mata ni bukawaqa:

²⁰ Sa kuvu mai na ucuna na kubou, Me vaka mai na kuro sa kere, se na lovo:

²¹ A nonai cegu sa vakawaqaca na qilaiso ni buka, Ka sa lako mai na gusuna na yameyame ni buka.

²² Sa tiko e domona na kaukauwa, Ka sa vuki na rarawa me reki e matana.

²³ A ua ni lewena sa veikabiti vata: Sa kaukauwa tu; sa sega ni yavalati rawa.

²⁴ Sa kaukauwa na lomana me vaka na vatu: Io, sa kaukauwa me vaka na tiki ni vatu i qaqi e ra.

²⁵ Ni sa tu cake ko koya, era sa rere na qaqa: Ni sa yavala, sa yali na yalodra.

²⁶ Ai seleiwau ni tamata sa yaviti koya sa sega ni lau: Sa vakakina na moto, se nai wau, se na saisai.

²⁷ Sa nanuma na aironi ko koya me co malai, Kei na parasa me kau vuca.

²⁸ Ena sega ni dro e na vuku ni gasau: A vatu sa rabotaki sa vukica me vu-ni-sila:

²⁹ A i wau sa nanuma ko koya me vu-ni-sila: Sa dredrevaka na rorogo ni moto.

³⁰ Sa tu e rukuna na caca ni kuro gagata: Sa koto e na ka gagata e na lolobo.

³¹ Sa vakerea na wai titobu me vaka na kuro: Sa vakerea na waitui me tautauvata kei na kuro wali.

³² A we ni nonai lakolako sa caucaudre: Eda vakasama ua wai titobu me sika mai.

³³ Sa sega e vuravura me tautauvata kaya, Sa buli me sega ni rere rawa.

³⁴ Sa raiwaletaka na ka cecere kecega: Sa turaga ko koya vei ira kecega na gone dauviavialevu.