Jope 40 - Vakavakadewa Makawa

Sa vakamalumalumutaki koya ko Jope vua na Kalou, 1-5. Sa cikevi Jope ko koya me vakatakila ni sa dodonu, ka kaukauwa, ka vuku, 6-14. Sa tukuna na piimoci, 15-24.

¹ Sa vosa tiko vei Jope ko Jiova ka kaya,

² Ko koya sa veileti kei Koya sa Kaukauwa, ena vakavulici koya beka talega? Ko koya sa vunauca na Kalou, me vosa mada kina.

³ Sa qai vosa vei Jiova ko Jope, ka kaya,

⁴ Ni raica ga, ni'u sa ka walega; a cava me'u kaya vei kemuni? Au sa tabonaka na gusuqu e na ligaqu.

⁵ Au sa vosa oti vakadua: ia ka'u na sega ni vosa tale: Io, sa vakarua: ia ka'u na sega ga ni kuria.

⁶ Sa qai vosa tale vei Jope ko Jiova mai na covulaca, ka kaya,

⁷ Mo vauca mada vakatagane na tolomu: Ka'u na vakatarotarogi iko, ia mo vakatakila mai vei au.

⁸ Ko na via vakatawayagataka beka na noqu lewa? Ko sa via vakacalai au, mo dodonu kina ko iko?

⁹ A ligamu beka sa vaka na liga ni Kalou? Se ko sa kurukuru rawa beka e domomu me tautauvata kaya?

¹⁰ Mo vakaiukuukutaki iko mada e na ka vakaturaga kei na vakarokoroko; Ka vakaisulutaki iko e nai ukuuku kei na lagilagi.

¹¹ Mo duibiubiuta na katakata ni nomu cudru: Ka raici ira yadua era viavialevu, ka vakamalumalumutaki ira.

¹² Mo raici ira kecega era viavialevu, ka vakamalumalumutaka, Ka buturaki ira nai valavala ca e na nodra i tikotiko.

¹³ Mo vunitaki ira vata e na kuvu-ni-soso, Sogolati ira e na vanua vuni.

¹⁴ Ka'u na qai vakadinadina vei iko, Ni sa vakabulai iko rawa na ligamu i matau.

¹⁵ Mo raica mada na piimoci, ko koya ka'u sa bulia vata kei iko: Sa daukana co me vaka na pulumokau.

¹⁶ Mo raica mada, sa tiko e tolona na nona kaukauwa, Kei na nona gulevu sa tu e na ua ni ketena.

¹⁷ Sa sautakurekure na buina ka sa vaka na sitari: Na dali ni sagana sa tobe vata.

¹⁸ A suina sa vaka na paipo parasa kaukauwa; A suina sa vaka na uma aironi.

¹⁹ Ko koya ka uasivi e na cakacaka ni Kalou: Ko koya sa bulia sa solia vua na nonai yaragi.

²⁰ Sa tubura dina na kena na veiulu-ni-vanua, A ra sa dauqito maikina na manumanu kecega ni vanua.

²¹ Sa koto e ruku ni kau rugurugua, E na ruku ni gasau kei na lolobo.

²² Sa vakarurugi koya na yaloyalo ni kau rugurugua; Sa tu voliti koya na wilou mai na wai drodro.

²³ Raica, ni sa vuabale na uciwai, sa sega ni rere ko koya; Sa yatedei ga ni sa drodro sara mai na Joritani ki na gusuna.

²⁴ Ena rawai koya beka e dua ni sa rai tiko? Se na cula rawa na ucuna e nai cori?